Mataio 3 - O LE TUSI PAIA

O LE MATAUPU III. O le tala‘iga a Ioane le papatiso.

¹ O ona po ia na sau ai Ioane le papatiso, ua tala‘i atu i le vao o Iutaia, ua faapea atu,

² Ina salamo ia outou; auā ua latalata mai le malo o le lagi.

³ Auā o ia lava lenei na fai mai ai le perofeta o Isaia, ua faapea mai, O le leo o le ua alaga i le vao, Ina teuteu ia outou le ala o le Alii, ia faalaulelei ona ala.

⁴ A o Ioane ia, sa ofu i le fulufulu kamela, ma le fusi pa‘u i lona sulugātiti; a o ana mea e ‘ai, o sē akerise ma le meli vao ia.

⁵ Ona o atu ai lea ia te ia o Ierusalema, ma Iutaia uma, atoa ma le itu uma o Ioritana;

⁶ ua papatisoina foi i latou i Ioritana e ia, ua faaali atu e i latou a latou agasala.

⁷ Ua na iloa atu le au faresaio ma le au satukaio e toatele ua o mai i lana papatisoga, ona ia faapea atu ai lea ia te i latou, Fanau a gata feai e, o ai ea ua na faaali atu ia te outou ia sosola ese i le toasa atali?

⁸ Ia outou fua mai ni fua e tatau ma le salamo;

⁹ aua foi ne‘i outou manatu e faapea ifo i o outou loto, O Aperaamo, o ia o lo matou tamā; auā ou te fai atu ia te outou, e mafaia lava e le Atua ona faatupuina mai i nei maa ni fanau mā Aperaamo.

¹⁰ O loo tuu nei foi le mătau i tafu‘e o laau; o laau uma foi e le fua mai i fua lelei, e taia ma lafoina i le afi.

¹¹ O a‘u nei, ou te papatiso atu ia te outou i le vai ina ia salamo; a e peitai o lē mulimuli mai e silisili o ia ia te au, e le aoga a‘u ona tauave i ona see vae; o ia lea na te papatisoina atu ia te outou i le Agaga Paia ma le afi.

¹² O i lona aao lana asu, na te faamamāina ai lana faaputugāsaito; na te faapotopotoina foi ana saito i le fale saito, a e susunuina le otaota o saito i le afi e le matineia.

¹³ Ona maliu atu ai lea o Iesu mai Kalilaia i Ioritana ia Ioane, ia papatisoina ai e ia.

¹⁴ A ua vavao e Ioane ia te ia, ua faapea mai, E ao ona e papatisoina mai o a‘u, a ē maliu mai ea oe ia te au?

¹⁵ A ua tali atu Iesu, ua faapea atu ia te ia, Tuu mai nei pea ia; auā e faapea ona tatau ia te i tatou ona faataunuuina o mea tonu uma. Ona tuu mai lea ia te ia.

¹⁶ Ua papatisoina Iesu, ona maliu ae loa lea o ia nai le vai, faauta foi, ua faaavanoaina le lagi ia te ia, ua ia iloa atu foi le Agaga o le Atua ua afio ifo e peiseai se lupe, ua oo i ona luga.

¹⁷ Faauta foi, o le siufofoga mai le lagi, ua faapea mai, O lo‘u atalii pele lenā, ua ou fiafia lava ia te ia.