Mataio 10 - O LE TUSI PAIA

O LE MATAUPU X. Ua aauina e Iesu ona soo e a‘oa‘o atu i le nuu.

¹ Ua valaau atu e ia ona soo e toasefulu ma le toalua, ona tuu atu lea e ia ia te i latou le pule i agaga leaga, ina ia tutuli ia te i latou, ma faamalolo i ma‘i uma ma ma‘i tiga uma.

² O igoa nei o le au aposetolo e toasefulu ma le toalua; e muamua Simona e igoa ia Peteru, ma Aneterea lona uso, o Iakopo le atalii o Sepetaio ma Ioane lona uso, o Filipo ma Patolomaio,

³ o Toma ma Mataio le telona, o Iakopo le atalii o Alefaio ma Lepaio e igoa ia Tataio,

⁴ o Simona le Kanana ma Iuta le Sekara, o ia foi na faalata ia te ia.

⁵ Ua aauina atu e Iesu o lenei toasefulu ma le toalua, ua ia fetalai atu ia te i latou, ua faapea atu, Aua tou te ui i se ala o nuu ese, aua foi tou te o atu i se aai o Samaria;

⁶ a e lelei ona outou o atu i mamoe o le aiga o Isaraelu ua le iloa.

⁷ A outou o, ia outou tala‘i atu, ia faapea atu, Ua latalata mai le malo o le lagi.

⁸ Ia outou faamalolo i e mamai, faamamā lepela, faatutū i e ua oti, tutuli i temoni. Ua maua fua e outou, ia outou foaifuaina atu.

⁹ Aua ne‘i teu ma outou o auro, po o ario, po o ‘apa memea i o outou fusi.

¹⁰ Aua foi le ave se taga i le malaga, aua foi le tailua o ofu tino, po o see vae, po o se tootoo; auā e tatau ona avatu le mea e ‘ai i le fai galuega.

¹¹ O se aai po o se faoa aai tou te oo atu i ai, ia fesili po o ai se i ai ua tatau; ia outou nonofo ai i le tou o ai.

¹² A outou ulufale atu i se aiga, ia outou ofo alofa atu i ai.

¹³ Pe afai foi ua tatau lea aiga, ia oo atu i ai la outou faamanuia; a e afai ua le tatau, ia toe foi mai ai ia te outou la outou faamanuia.

¹⁴ Ai se le talia outou, pe le faalogo i a outou upu, a outou o atu nai lea fale po o lea aai, ia outou tūtū atu le eleele nai o outou vae.

¹⁵ E moni, ou te fai atu ia te outou, O le aso faamasino e feoloolo ai Sotoma ma Komoro i lea lava aai.

¹⁶ Faauta, ou te aau atu ia te outou e pei o mamoe i le va o luko; o lenei, ia outou atamamai pei o gata, a ia fifilemu e pei o lupe.

¹⁷ Ia outou ma tagata; auā latou te tuuina atu outou i fono, ma latou sasa ia te outou i o latou sunako.

¹⁸ E ta‘ita‘iina atu foi outou i luma o alii ma tupu ona o a‘u, e fai ma molimau ia te i latou atoa ma nuu ese.

¹⁹ Pe a latou tuuina atu outou, aua tou te popole pe faapefea, pe se a foi tou te fai atu ai; auā e foaiina mai ia te outou i lea lava itu aso se upu tou te fai atu ai.

²⁰ Auā e le o outou e tautala atu ai, a o le Agaga o lo outou Tamā e tautala mai ai i totonu ia te outou.

²¹ E tuuina atu le uso e le uso ia oti, e tuuina atu foi le fanau e le tamā; e tutū atu foi le fanau i o latou matua ina ia fasiotia i latou.

²² E inosia foi outou e tagata uma ona o lo‘u igoa; a o lē tumau seia oo atu i le gataaga, e faaolaina o ia.

²³ Pe a latou faasaua ia te outou i le tasi aai, ia outou sosola i se tasi; auā e moni, ou te fai atu ia te outou, e le soo aai o Isaraelu ia te outou seia sau le Atalii o le tagata.

²⁴ E le silli le soo i le a‘oa‘o, e le sili foi le auauna i lona alii;

²⁵ tau lava ina avea le soo ia faapei o lona a‘oa‘o, o le auauna foi ia faapei o lona alii. Afai ua latou ta‘ua le matai o le aiga o Pelesepulo, pe le sili ona latou faapea atu i lona aiga i se a?

²⁶ O lenei, aua tou te matatau ia te i latou; auā e leai se mea o loo ufiufitia e le faaalia, e leai foi se mea lilo e le faailoaina.

²⁷ O la‘u e fai atu ia te outou i le pouliuli, tou te ta‘u atu lea i le malamalama; o le mea foi ua lagona i o outou taliga, ia outou tala‘i atu i luga o fale.

²⁸ Aua foi tou te matatau i e fasioti le tino, a e latou te le mafaia ona fasioti le agaga; a e lelei ona outou matatau i le ua mafai ona fano ia te ia le agaga atoa ma le tino i Kēna.

²⁹ E le faataulia ea ni manu iti se lua i le asari? e leai foi so laua e paū i le eleele e aunoa ma lo outou Tamā.

³⁰ A o outou lauulu lava ua faitaulia uma ia.

³¹ O lea aua tou te matatau ai; e sili outou i manu iti e tele.

³² O lenei, ai se na te ta‘uta‘u a‘u i luma o tagata, o a‘u foi ou te ta‘uta‘uina o ia i luma o lo‘u Tamā o i le lagi.

³³ Ai se faafiti foi ia te au i luma o tagata, ou te faafitia foi o ia i luma o lo‘u Tamā o i le lagi.

³⁴ Aua tou te manatunatu ua ou sau e avatu le filemu i le lalolagi; ou te lei sau e avatu le filemu, a o le pelu.

³⁵ Auā ua ou sau e faamasesei le tagata ma lona tamā, o le tama teine foi e faamasesei ma lona tinā, o le avā foi e faamasesei ma le tinā o lana tane.

³⁶ E fai foi le tagata ma fili o lona aiga.

³⁷ O le ua tele lona alofa i lona tamā po o lona tinā, a e itiiti ia te au, e le aoga lea ia te au; o le ua tele foi lona alofa i lona atalii po o lona afafine, a e itiiti ia te au, e le aoga foi lea ia te au.

³⁸ O se le ave lona satauro, ma le lē mulimuli mai ia te au, e le aoga foi lea ia te au.

³⁹ O lē maua lona ola, e māumau ai ia te ia; a o le faamāumau i lona ola ona o a‘u, e maua e ia.

⁴⁰ O lē talia outou, ua talia e ia o a‘u; o lē talia foi a‘u, ua talia e ia o le na auina mai a‘u.

⁴¹ O lē talia foi o se perofeta i le igoa o le perofeta, e maua e ia le taui o le perofeta; o lē talia foi se tagata amiotonu i le igoa o le tagata amiotonu, e maua e ia le taui o le tagata amiotonu.

⁴² Ai se avane foi tau lava se ipu vai mālulu e inu ai se tasi o i latou nei e faatauvaa i le igoa o le soo, e moni, ou te fai atu ia te outou, e le māumau lona taui.