Mareko 15 - O LE TUSI PAIA

O LE MATAUPU XV. O le faasatauroina o Iesu.

¹ Ua ao, ona taupulepule loa lea o le au ositaulaga sili, atoa ma toeaina, ma le au tusiupu, ma le taupulega uma, ua latou noanoa ia Iesu, ma ta‘ita‘i atu ia te ia, ma tuuina atu ia Pilato.

² Ona fesili mai lea o Pilato ia te ia, O oe ea e le tupu o tagata Iutaia? Ona tali atu lea o ia ia te ia, ua faapea atu, O lea lava.

³ Ua momoli foi ia te ia e le au ositaulaga sili i mea e tele.

⁴ Ona toe fesili mai lea o Pilato ia te ia, ua faapea mai, E te le tali mai lava ea? Faauta i le tele o mea ua latou molimau ai ia te oe.

⁵ A ua le tali atu e Iesu sina upu; o le mea lea ua ofo ai Pilato.

⁶ O lea tausamiga ma lea tausamiga, ua ia tatalaina atu ai ia te i latou se tasi pagota, latou te fai ane ai.

⁷ Sa i ai le tasi ua igoa ia Parapa, ua noatia faatasi ma e na fouvale ma ia, e na fasioti tagata i le fouvale sa fai.

⁸ Ona alalaga atu ai lea o le motu o tagata, ma fai atu, ina ia faia e ia ia te i latou, faapei ona masani ai o ia.

⁹ Ona tali atu lea o Pilato ia te i latou, ua faapea atu, Tou te loto ea ina ia ou tatalaina atu ia te outou le tupu o tagata Iutaia?

¹⁰ Auā ua na iloa o le mataua na tuuina atu ai o ia e le au ositaulaga sili.

¹¹ A o le au ositaulaga sili, ua latou faaoso i le motu o tagata, ina ia tatalaina mai e ia o Parapa ia te i latou, a e tuu pea Iesu.

¹² Ona toe tali atu ai lea o Pilato ia te i latou, ua faapea atu, Se a foi se mea tou te loto i ai ou te faia ia te ia e ta‘ua te outou o le tupu o tagata Iutaia?

¹³ Ona latou toe alalaga ai lea, Ina faasatauro ia ia te ia.

¹⁴ Ona fai atu lea o Pilato ia te i latou, Se a foi se mea leaga ua na faia? A ua atili ai ona latou alalaga, Ina faasatauro ia ia te ia.

¹⁵ Ua loto Pilato e faalotomălie i le motu o tagata, ua ia tatalaina atu ai Parapa ia te i latou; ua uma ona sasaina o Iesu e ia, ona ia tuuina atu lea o ia ia faasatauroina.

¹⁶ Ona ta‘ita‘iina atu lea o ia e le ‘au i le maota, o le maota lea o le alii, ua latou faapotopotoina foi le ‘au uma.

¹⁷ Ona latou faaofu lea ia te ia i le ofu pāuli, ma latou taataai laau tuitui ua fai a‘i le pale, ua faapaleina ai o ia.

¹⁸ Ona latou alolofa mai lea ia te ia, ua faapea mai, Talofa le tupu o tagata Iutaia.

¹⁹ Ua latou ta foi i lona ao i le u, ma feanu ia te ia, ma tootuli ma ifo ia te ia.

²⁰ Ua uma ona latou faatauemu ia te ia, ona latou toeseina lea o le ofu pāuli ia te ia, ma faaofu ia te ia i ona lava ofu; ona latou ta‘ita‘i atu lea ia te ia ia faasatauroina o ia.

²¹ Ua alu ane le tasi tagata, o Simona le Kurene, ua sau mai le vao, o le tamā foi o ia o Alesana ma Rufo, ona latou faataunau lea ia te ia, ina ia ave e ia o lona satauro.

²² Ua latou ave foi ia te ia i Kolokota, o lona uiga pe a faamatalaina, O le mea o i ai le ulupoo;

²³ ona latou avane lea ia te ia le uaina ua fefiloi ma le muro, e inu ai; a ua le talia e ia.

²⁴ Ua uma ona latou faasatauroina o ia, ona latou tufatufa lea i ona ofu, ma fai ai le vili, e iloa ai le mea a le tagata.

²⁵ O le itu aso e tolu na latou faasatauro ai ia te ia.

²⁶ Ua tusia foi le tusi i le mea na molia ai o ia, O LE TUPU O TAGATA IUTAIA,

²⁷ Ua latou faasatauro foi faatasi ma ia tagata fao mea e toalua; o le tasi i lona itu taumatau, ma le tasi i lona itu tauagavale.

²⁸ Na taunuu ai le Tusi, ua faapea, Na faitauina o ia faatasi ma pagotata.

²⁹ O i latou foi na ui ane, ua latou upu leaga ia te ia, ma lialiai o latou ulu, ua faapea mai, Ue! o oe na o lē lepeti le malumalu, ma toe faia i aso e tolu,

³⁰ ina faaola ia oe ia te oe, ma alu ifo i le satauro.

³¹ Ua faapea foi le au ositaulaga sili ua faatauemu i latou faatasi, atoa ma le au tusiupu, ua faapea ane, Na ia faaolaina isi tagata, na te le mafaia ona faaola o ia ia te ia.

³² Ina alu ifo nei lava le Keriso, le tupu o Isaraelu, i le satauro, tatou te iloa ai, ma tatou talitonu ai. O e na faasatauroina foi faatasi ma ia, ua la upu leaga ia te ia.

³³ Ua oo i le itu aso e ono, ona pogisa uma ai lea o le nuu, ua oo lava i le itu aso e iva.

³⁴ O le itu aso e iva foi ua alaga ai Iesu, ua leo tele, ua faapea atu, Eloi, Eloi, lama sapatani? o lona uiga pe a faamatalaina, Lo‘u Atua e, lo‘u Atua e, se a le mea ua e tuulafoai mai ai a‘u?

³⁵ Ua faalogo ai nisi o e na tutū mai, ona latou faapea ane ai lea, Faauta, o loo valaau atu o ia ia Elia.

³⁶ Ona momo‘e lea o le tasi, ma fufui le omomi i le vineta, ua tuu i luga i le pito laau, ma faainu ia te ia, ua faapea atu, Tuu pea ia; se‘i tatou iloa pe sau Elia e ave ifo ia te ia.

³⁷ Ua alaga Iesu ua leo tele, ona to ai lea o lana mānava.

³⁸ Ona saeluaina lea o le ie puipui o le malumalu, ua amata ifo i luga, ua oo lava i lalo.

³⁹ O le ta‘ita‘i o le toaselau, o le na tu atu i ona luma, ua iloa e ia ua faapea ona alaga o ia, ona to lea o lana mānava ona faapea atu ai lea o ia, E moni, o le Alo o le Atua lenei tagata.

⁴⁰ Sa i ai foi fafine o matamata mamao mai, sa i ai foi ia te i latou o Maria le Makatala, ma Maria le tinā o Iakopo le itiiti ma Iose, atoa ma Salome;

⁴¹ o e na mulimuli atu ia te ia ina o i Kalilaia o ia, ma auauna ia te ia; atoa ma isi fafine e toatele, o e na o ae faatasi ma ia i Ierusalema.

⁴² Ua oo i le afiafi, (auā o le aso e sauni ai lea, o le aso lea i tua atu o le sapati),

⁴³ ua alu ane ai Iosefa le Arimataia, o le tasi faipule sili, o ia foi sa faatalitali i le malo o le Atua, ua faamalosi o ia ona alu atu ia Pilato, ma faanoi atu ai i le tino o Iesu.

⁴⁴ Ona ofo lea o Pilato ina ua vave maliu o ia; ua na valaau atu foi i le ta‘ita‘i o le toaselau, ma fesili atu i ai, po o ua leva lona maliu.

⁴⁵ Ua iloa e ia i le ta‘ita‘i o le toaselau, ona avatu ai lea o le tino ia Iosefa.

⁴⁶ Na taulia foi e ia le ie lino, ua ave ifo foi ia te ia, ona aui lea i le ie lino, ua tuu foi ia te ia i le tuugamau na foa i le papa, ona fuli ane lea o le maa i le gutu o le tuugamau.

⁴⁷ Ua vaavaai foi Maria le Makatala, ma Maria le tinā o Iose i le mea na tuuina ai o ia.