Malaki 4 - O LE TUSI PAIA

O LE MATAUPU IV. E muamua ona sau Elia, i le oo ai i le aso o Ieova.

¹ Auā faauta, o le a oo mai le aso e mu ai pei se umu; ona fai ai lea ma tagutugutu o saito o e faamaualuluga uma, atoa ma ē fai amio leaga uma; e susunuina foi i latou i le aso o le a oo mai, ua fetalai mai ai Ieova o ‘au; e le faatoeina ai mo i latou se aa po o se la laau.

² A o outou o e matatau i lo‘u igoa, e alu ae ia te outou le La o le amiotonu; e i ai foi le mea e malolo ai i ona apaau; e o atu foi outou ma osooso, pei o tamai povi mai le fale povi.

³ Ona outou solia lea o e amio leaga; auā e fai i latou ma efuefu i lalo o outou alofivae i le aso ua ou tofia, ua fetalai mai ai Ieova o ‘au.

⁴ Ia outou manatunatu i le tulafono a Mose la‘u auauna, na ou poloai atu ai ia te ia i Horepa ia Isaraelu uma, o tulafono ma faamasinoga.

⁵ Faauta, ou te auina atu ia te outou o Elia le perofeta, a o lei oo mai le aso o Ieova e sili, ma le matautia.

⁶ Na te faaliliuina loto o mātua i fanau, ma loto o fanau i o latou mātua; ne‘i ou alu atu, ma ou taia le nuu i le faafanoga.