Luka 7 - O LE TUSI PAIA

O LE MATAUPU VII. Ua faamalolo e Iesu le auauna a le alii o le toaselau.

¹ Ua faauma e ia ana fetalaiga uma, o faalogo ai le nuu, ona maliu ai lea o ia i Kapanaumi.

² Ua ma‘i le auauna a le tasi ta‘ita‘i o le toaselau, sa faapelepeleina e ia, ua tāli oti.

³ Ua faalogo o ia ia Iesu, ona auina mai lea e ia o toeaina o Iutaia e aioi mai ia te ia ina ia maliu atu ma faaola lana auauna.

⁴ Ua latou o mai ia Iesu, ona latou matuā faatoga mai lea ia te ia, ua faapea mai, Ua aoga o ia e te fai ai le mea nei;

⁵ auā ua alofa mai o ia i lo tatou nuu, ua na faia foi le sunako mo i matou.

⁶ Ona maliu atu ai lea o Iesu ma i latou; ua latalata ia i le fale, ona auina mai lea e le ta‘ita‘i o le toaselau o ana uo ia te ia, ua faapea mai ia te ia, Le Alii e, aua ne‘i faalavelaveina oe; auā ou te le aoga ina ia ulu mai oe i lo‘u fale.

⁷ O lea foi na ou manatu ai ou te le aoga ona ou alu atu ia te oe; a ia oo mai sau fetalaiga, e faamaloloina ai la‘u auauna.

⁸ Auā o a‘u foi le tagata ua pule i ai le tasi, ua ou pule foi i le ‘au tau; a a‘u fai atu i se tasi, Ina alu ia, ona alu ai lea; ma le tasi, Ina sau ia, ona sau ai lea; ma la‘u auauna, Ina faia lenei mea, ona fai ai lea.

⁹ Ua faafofoga Iesu i nei mea, ona ofo ai lea ia te ia; ua fāliu o ia, ma fetalai atu i le motu o tagata e ua mulimuli mai ia te ia, Ou te fai atu ia te outou, ou te lei iloa ia Isaraelu lava se faatuatua e faapena ona tele.

¹⁰ O e na auina mai ua foi atu i le fale, ona iloa lea e i latou o le auauna sa ma‘i, ua malolo.

¹¹ O le taeao ua maliu ai o ia i le aai, o Naina le igoa, ua o faatasi ma ia ona soo e toetele, ma le motu o tagata e toatele.

¹² Ua latalata ia i le faitotoa o le aai, faauta foi, ua fata mai le tagata oti, o le tama e toatasi o ia a lona tinā, o ia foi le fafine ua oti lana tane; ua ia te ia foi tagata o le aai e toatele.

¹³ Ua silasila atu le Alii ia te ia, ona mutimuti alofa lea o ia ia te ia, ua fetalai atu ia te ia, Aua e te tagi.

¹⁴ Ua maliu ane ia, ua pa‘i atu i le fata; ona tutū mai ai lea o le au fata, ona fetalai atu lea o ia, Le tauleale e, ou te fai atu ia te oe, Ina tulai ia.

¹⁵ Ona nofo ai lea i luga o le na oti, ua tautala; ona ia tuuina atu lea o ia i lona tinā.

¹⁶ Ua oo le mata‘u ia te i latou uma, ua latou vivii atu i le Atua, ua faapea ane, Ua tu mai ia te i tatou le perofeta sili; i le ma lea, Ua asiasi mai le Atua i lona nuu.

¹⁷ Ua soo lava Iutaia uma ma le itu uma i lenei tala ia te ia.

¹⁸ Ua faailoa atu ia Ioane nei mea uma e ona soo.

¹⁹ Ona valaau atu lea e Ioane i ona soo se toalua, ua aauina atu i laua ia Iesu, ua faapea ane, Po o oe ea lē maliu mai? pe matou te faatali atu i se tasi?

²⁰ Ua o mai ia tagata ia te ia, ua faapea mai, Ua aauina mai i maua e Ioane le papatiso ia te oe, ua fai mai, Po o oe ea lē maliu mai? pe matou te faatali atu i se tasi?

²¹ O lea lava itu aso ua faamalolo ai e ia tagata e toatele sa i ai ma‘i, ma ma‘i tiga, ma agaga leaga; ua foai atu foi ina ia vaai o e tauaso e toatele.

²² Ona tali atu lea o Iesu ia te i laua, ua faapea atu, Ina o atu ia oulua, ma faailoa atu ia Ioane o mea ua oulua vaai i ai, ma faalogo i ai; ua pupula tauaso, ua savavali pipili, ua faamamāina lepela, ua logo tutuli, ua faatutūina e na oti, ua folafolaina le tala lelei i e matitiva.

²³ E manuia foi se le tausuai ia te a‘u.

²⁴ Ua o e na auina mai e Ioane, ona oo ane ai lea o lana lauga i le motu o tagata ia Ioane, Na outou o i le vao e matamata i ni a? o le u ea na luluina e le matagi?

²⁵ Pe na outou o e matamata i ni a? o le tagata ea ua ofu i ofu malulu? faauta, o e ofu i ofu matagofie, ma ua solo lelei, o i maota o tupu ia.

²⁶ Pe na outou o e matamata i ni a? o le perofeta ea? E moni, ou te fai atu ia te outou, E sili lava ia i le perofeta.

²⁷ O ia lea ua tusi mai i ai, Faauta, ou te auina atu la‘u sāvali i ou luma, na te teuteua lou ala i ou luma.

²⁸ Ou te fai atu foi ia te outou, E leai se perofeta i e na fananau i fafine e sili ia Ioane le papatiso; a o lē aupito itiiti i le malo o le Atua, e sili lea ia te ia.

²⁹ Ona ta‘uamiotonuina ai lea o le Atua e le nuu uma lava e na faalogo ai, atoa ma le au telona, ina ua papatisoina i latou i le papatisoga a Ioane.

³⁰ A o le au faresaio ma le au a‘oa‘a tulafono, ua latou faaleaoga ia te i latou le pule a le Atua, ina ua le papatisoina i latou e ia.

³¹ Ua fetalai atu le Alii, Ou te faatusa i ni a tagata o lenei tupulaga? latou te tusa ma ni a?

³² E tusa ia ma tama iti ua nonofo i le malae, ma fevalaauai, ua faapea ane, Ua matou faaili atu ia te outou, a e tou te lei saasaa mai; ua matou fetagisi atu ia te outou, a e tou te lei taufaitagitu‘i mai.

³³ Auā na sau Ioane le papatiso, ua le ‘ai areto, ua le inu foi uaina; ona outou fai ane lea Ua ia te ia le temoni.

³⁴ Ua sau le Atalii o le tagata, ua ‘ai o ia ma inu; ona outou fai ane lea, Faauta, o le tagata ‘ai tele ma le inu uaina, o le uo a telona ma ē agasala.

³⁵ A ua ta‘uamiotonuina le poto e ana tama uma.

³⁶ Ua fai mai le tasi o le au faresaio se‘i la aai ma ia; ua maliu atu ia i le fale o le faresaio, ona taoto ai lea o ia e taumafa.

³⁷ Faauta foi, o le fafine o le aai, o ia o le fafine agasala, ua iloa e ia ua taoto o ia e taumafa i le fale o le faresaio, ona au mai lea e ia o le fagu alapasa ua tumu i le suāuu manogi;

³⁸ ua tu foi o ia i tua i ona vae, ua tagi, ua faasisina ifo e ia loimata i ona vae, ua sōloi ai i lona lava lauulu, ua sogi foi i ona vae, ma faauuina i le suāuu manogi.

³⁹ Ua iloa e le faresaio na fai atu ia te ia, ona faapea ifo ai lea o ia i lona loto, A se perofeta lenei, po ua iloa e ia lenei fafine, ma lana amio, ua ia pa‘i atu ia te ia; auā o le fafine agasala ia.

⁴⁰ Ona fetalai atu ai lea o Iesu ia te ia, ua faapea atu, Simona e, o la‘u upu ou te fai atu ia te oe. Ua fai mai o ia, Le a‘oa‘o e, fetalai mai ia.

⁴¹ O tagata e toalua sa la nonō mai tupe i le tagata e toatasi; sa nonō mai le tasi i tenari e lima selau, e a le tasi e limagafulu.

⁴² Ua leai ni a la tupe e toe avatu, ona faamagalo fua lea o ia ia te i laua uma. Ina fai mai ia, po o ai so laua e tele lona alofa ia te ia?

⁴³ Ua tali mai Simona, ua faapea mai, Ai lava o lea na faamagaloina atu ana mea e tele. Ua fetalai atu ia ia te ia, Ua tonu lau taofi.

⁴⁴ Ona fāliu atu lea o ia i le fafine, ua fetalai atu ia Simona, Ua e iloa ea le fafine nei? na ou ulu mai i lou fale, e te lei au mai ni vai mo o‘u vae; peitai o ia, ua faasisina ifo e ia o loimata i o‘u vae, ma sōloi ai i lona lava lauulu.

⁴⁵ E te lei feasogi mai ia te au; peitai o ia, ua le aunoa ona sogi i o‘u vae talu lava ona ulufale mai o ia.

⁴⁶ E te lei faauu mai i lo‘u ulu i le suāuu fua; peitai o ia, ua faauu e ia i o‘u vae i le suāuu manogi.

⁴⁷ O lea foi ou te fai atu ai ia te oe, Ua faamagaloina ana agasala e tele, auā ua alofa tele mai o ia; a o le ua faamagaloina i ai se mea itiiti, ua itiiti foi lona alofa.

⁴⁸ Ua fetalai atu ia i le fafine, Ua faamagaloina au agasala.

⁴⁹ O e na taooto e aai ua latou faapea ifo i o latou loto, O ai foi lenei o lē faamagaloina agasala?

⁵⁰ Ua fetalai atu o ia i le fafine, Ua e ola i lou faatuatua; ina alu ia oe ma le manuia.