Luka 5 - O LE TUSI PAIA

O LE MATAUPU V. Ua a‘oa‘o Iesu mai luga o le vaa o Peteru.

¹ Ua tu o ia i le auvai o le vai o Kenesareta, ua fetuleni mai foi le motu o tagata ia te ia e faalogologo i le afioga a le Atua.

² Ona silafia lea e ia vaa e lua ua talanai i le auvai, a ua o ese ai le au faiva, ua ta o latou upega.

³ Ona maliu ae lea o ia i le tasi vaa, o le vaa lea o Simona, ma faatoga atu ia te ia ia faaitiiti atu le vaa nai le auvai. Ona nofo lea o ia i lalo, ma a‘oa‘o atu nai le vaa i le motu o tagata.

⁴ Ua uma lana lauga, ona fetalai atu lea o ia ia Simona, Ina tuutuu atu ia i le loloto, ma tuu ifo ai o outou upega e maua ai ni i‘a.

⁵ Ua tali mai Simona, ua faapea mai ia te ia, Le Alii e, ua atoa le po ua tigaina ai i matou, e leai ni mea ua maua; a ona o lau fetalaiga ou te tuu ifo ai le upega.

⁶ Ua uma ona latou faia o lea mea, ona latou siomia lea o le au i‘a tele lava, ua masae ai lo latou upega.

⁷ Ua latou genogeno atu i o latou o i le tasi vaa, e o mai e fesoasoani ia te i latou; ona latou o mai lea, ua faatumu e i latou vaa uma e lua, ua tāli gogoto ai.

⁸ Ua iloa e Simona Peteru, ona faapaū lea o ia i tulivae o Iesu, ua faapea mai, Le Alii e, ina maliu ese atu ia oe ia te au, auā o a‘u le tagata agasala.

⁹ Auā ua ofo o ia atoa ma i latou uma sa ia te ia, auā o le au i‘a ua latou maua;

¹⁰ ua faapea foi Iakopo ma Ioane, o atalii o Sepetaio, o i latou ua fai faiva faatasi ma Simona. Ona fetalai atu lea o Iesu ia Simona, Aua e te fefe, e amata i nei ona po ona e maua tagata.

¹¹ Ua tūta o latou vaa, ona latou tuu ai lea o mea uma, a e mulimuli atu ia te ia.

¹² Sa i le tasi aai o ia, faauta o le tagata ua liloia i le lepela; ua iloa atu e ia o Iesu, ona faapaū fao ai lea o ia, ma aioi mai ia te ia, ua faapea mai, Le Alii e, a e finagalo i ai, e mafai lava ia te oe ona faamamā ia te au.

¹³ Ona aapa atu lea e ia lona aao, ua pa‘i atu ia te ia, ua faapea atu, Ou te loto i ai; ia mamā oe. Ona te‘a ese loa lava lea o le ma‘i lepela ia te ia.

¹⁴ Ona fetalai atu lea o ia ia te ia, Aua le ta‘u atu i se tasi; a ia e alu, ma faaali oe i le faitaulaga, ma avatu mo lou faamamāina e tusa ma le poloaiga a Mose, e fai ma faailoga ia te i latou.

¹⁵ A ua atili ai ona logo atu le tala ia te ia. Ona faapotopoto mai lea o le motu o tagata e toatele e faalogologo ia te ia, ma ia faamaloloina e ia o latou ma‘i.

¹⁶ A ua maliu ia i le mea tuufua ua tatalo ai.

¹⁷ Sa a‘oa‘o atu ia i le tasi aso, ua nonofo mai ai faresaio ma a‘oa‘o o le tulafono, e na o mai mai faoa aai uma o Kalilaia, ma Iutaia, ma Ierusalema; ua i ai foi le mana o le Alii e faamalolo ia te i latou.

¹⁸ Faauta foi, o tagata o loo fata mai i le moega le tagata ua ma‘i i le supa; ua latou mananao ina ia au mai ia te ia, ma tuu ifo i ona luma.

¹⁹ A e lei iloa e i latou se mea e au mai ai ia te ia, ona o le motu o tagata, ona o ae lea o i latou i luga o le fale, ua tuutuu ifo ia te ia ma lona moega i maa omea o le fale i totonu i luma o Iesu.

²⁰ Ua silafia e ia lo latou faatuatua, ona fetalai atu lea o ia ia te ia, Sole, ua faamagaloina au agasala.

²¹ Ona manatunatu lea o le au tusiupu ma le au faresaio, ua faapea ane, O ai ea lenei ua na upu leaga i le Atua? O ai na te mafaia ona faamagaloina agasala, ua na o le Atua lava?

²² Ua silafia e Iesu o latou manatunatu, ona tali atu ai lea o ia, ua faapea atu ia te i latou, Se a le mea tou te manatunatu ai i o outou loto?

²³ Po o le fea le faigofie? po o le fai atu. Ua faamagaloina au agasala; po o le fai atu, Tulai ia, ina savali?

²⁴ A e peitai ina ia iloa ai e outou o i le Atalii o le tagata le pule i le lalolagi e faamagalo ai agasala, (ua fetalai atu ia i le supa,) Ou te fai atu ia te oe, Tulai ia, ina ave lou moega, ma e alu i lou fale.

²⁵ Ona tulai loa lea o ia i o latou luma, ua ave le mea na taoto ai o ia, ona alu ai lea i lona fale, ua vivii atu i le Atua.

²⁶ Ua matuā ofo i latou uma, ma vivii atu i le Atua; ua latou matuā fefefe foi, ua faapea ane, Ua fāi ese na mea ua tatou iloa i le aso nei.

²⁷ Ua mavae ia mea, ona ulufafo ai lea o ia, ua silafia e ia le telona e igoa ia Levi, ua nofo i le fale e tali ai taulaga; ona faapea atu lea ia te ia, Ina mulimuli mai ia ia te au.

²⁸ Ona tuua lea e ia o mea uma, ua tulai ma mulimuli ia te ia.

²⁹ Ua faia foi e Levi le faigaai tele māna i lona fale; sa i ai telona e toatele lava, ma isi tagata e na taooto e aai faatasi ma i latou.

³⁰ A o latou tusiupu ma faresaio, ua latou muimui i ona soo, ua faapea atu, Se a le mea tou te aai ai ma feinu ai faatasi ma le au telona ma e ua agasala?

³¹ Ua tali atu Iesu, ua faapea atu ia te i latou, O e malolo e le aoga i ai le fomai, na o e mamai.

³² Ou te lei sau e valaau i e ua amiotonu, a o e ua agasala, ina ia latou salamo.

³³ Ua latou fai mai ia te ia, Se a le mea e anapopogi soo ai, ma tatalo ai le au soo o Ioane, ua faapea foi ma soo o le au faresaio, peitai ou soo, ua latou aai ma inu?

³⁴ Ona fetalai atu lea o ia ia te i latou, E mafai ea ona anapopogi o aumea a le faatoafaiavā, ina o ia te i latou le faatoafaiavā?

³⁵ A e oo mai ona po e aveeseina ai ia te i latou le faatoafaiavā, o ona po ia latou te anapopogi ai.

³⁶ Ua fetalai atu foi o ia ia te i latou i le faataoto, E leai se tagata na te fonoa le matuā ofu i le fasi ie o le ofu fou; a faapea, ona masae lea i le mea fou, e le tusa foi le fasi ie fou ma le mea pala.

³⁷ E leai foi se tasi na te utufia le uaina fou i fagu pa‘u tuai; a faapea, ona pa ai lea o fagu pa‘u i le uaina fou, ona masaa ai lea, e māumau foi fagu pa‘u.

³⁸ A e peitai e utufia le uaina fou i fagu pa‘u fou, ona faatau saogalemu ai lea.

³⁹ E leai foi se tagata e inu i le uaina tuai, ona manao loa lea i le uaina fou; auā ua fai mai o ia, Ua lelei le uaina tuai.