Luka 21 - O LE TUSI PAIA

O LE MATAUPU XXI. Ua vavalo mai Iesu i le faatafunaina o le malumalu, atoa ma Ierusalema.

¹ Ua tepa ae ia, ua silafia o e mauoa, o lafo a latou taulaga i le mea e teu ai tupe.

² Ua silafia foi e ia le tasi fafine mativa ua oti lana tane, ua lafo i ai tupe iti e lua.

³ Ona fetalai atu lea o ia, E moni, ou te fai atu ia te outou, o mea a lenei fafine mativa ua oti lana tane ua lafo i ai, ua sili lea i a latou uma.

⁴ Auā o i latou uma, ua latou lafo atu i taulaga a le Atua nisi mea mai a latou mea ua tele; a o ia ua mativa, ua lafo e ia ana mea uma e ola ai sa ia te ia.

⁵ Ua tautalatala nisi i mea a le malumalu, i lona teuteuina i maa lalelei ma taulaga, ona fetalai atu lea o ia,

⁶ O ia mea ua outou vaavaai i ai, e oo mai lava ona aso e le toe ai se tasi maa i luga o le tasi maa, a e uma ona sōloia i lalo.

⁷ Ona latou fesili mai ai lea ia te ia, ua faapea mai, Le a‘oa‘o e, e taunuu ea ia mea afea? se a foi le faailoga pe a tāli taunuu ai ia mea?

⁸ Ua fetalai atu ia, Ia outou, ne‘i faaseseina outou; auā e toatele e o mai i lo‘u igoa, e taitasi ma faapea ane, O a‘u o ia; ua latalata foi ona po; aua foi tou te mulimuli atu ia te i latou.

⁹ Pe a outou faalogo i taua ma fouvalega, aua tou te atuatuvale; auā e ao ina muai taunuu mai o ia mea, a e le oo loa mai le gataaga.

¹⁰ Ona fetalai atu lea o ia ia te i latou, E sii le taua e le tasi nuu i le tasi nuu ma le tasi malo i le tasi malo.

¹¹ E i ai mafuie tetele i lea mea ma lea mea, o oge foi, ma faamai; ma faaiteite ma faailoga tetele mai le lagi.

¹² A o lei oo nei mea, latou te pupue ma faasaua ia te outou, e tuuina atu ia te outou i sunako ma fale puipui, latou te ta‘ita‘iina atu outou i tupu ma alii ona o lo‘u igoa.

¹³ E oo ia mea ia te outou e fai ma molimau.

¹⁴ O lenei, ia tuu i o outou loto, tou te le muai mafaufau i se upu tou te tali atu ai.

¹⁵ Auā ou te avatu mo outou le upu ma le poto, e leai so latou o e finau mai ia te outou na te mafaia ona tali mai, pe tetee mai ia te outou.

¹⁶ E tuuina atu foi outou e mātua, ma uso, ma aiga, ma uo; o isi foi o outou e fasiotia e i latou.

¹⁷ E inosia foi outou e tagata uma ona o lo‘u igoa.

¹⁸ A e leai lava so outou lauulu e tasi e paū.

¹⁹ O lo outou onosai ia maua ai lo outou ola.

²⁰ A iloa e outou ua siosiomia Ierusalema i ‘au o le taua, ia outou iloa i lea aso ua latalata ona faatafunaina.

²¹ O lea aso, o e ua i Iutaia ia latou sosola i mauga; o e ua i totonu o lea aai, ia latou o ese; o e ua i le vao foi, aua ne‘i latou o atu i totonu o le aai.

²² Auā o ona aso ia e faasalaina ai, ina ia taunuu mai o mea uma ua tusia.

²³ Oi talofa i fafine ua totō, atoa foi ma ē failele i ia lava aso; auā e oo le puapuaga tele i le nuu, ma le toasa i le nuu nei.

²⁴ E oti i latou i le mata o le pelu; e tāfea foi i nuu uma; e solia foi Ierusalema e nuu ese, seia faaiuina tausaga o nuu ese.

²⁵ E i ai foi faailoga i le la, ma le masina, ma fetu; o i le lalolagi foi le atuatuvale o nuu i le fememeai; e ū foi le sami ma le sousou;

²⁶ e oti foi tagata i le matatau ma le faatalitali i mea e oo mai i le lalolagi; auā e luluina ‘au a le lagi.

²⁷ Ona iloa atu ai lea e i latou o le Atalii o le tagata e sau i le ao, ma le mana ma le mamalu tele.

²⁸ A afua ona faia o ia mea, ia tepa ae outou, ma ia ea i luga o outou ulu; auā e latalata ina faaolaina outou.

²⁹ Ua fetalai atu ia ia te i latou i le faataoto; Ina vaai ia i le mati atoa ma laau uma;

³⁰ pe a faatoa matala mai lau, ua outou vaai, ona outou iloa ai lea ua latalata le tausaga vevela.

³¹ Ia faapea foi outou, pe a iloa e outou ia mea ua faia, ia outou iloa ua latalata le malo o le Atua.

³² E moni, ou te fai atu ia te outou, E le mavae atu lenei tupulaga, seia taunuu mea uma.

³³ E mavae atu lava le lagi atoa ma le lalolagi; peitai o a‘u upu, e le mavae atu lava ia.

³⁴ Ia outou, ne‘i faamamafaina o outou loto, ma le faaniniva, ma le onā, ma le popole i mea a le olaga nei, ne‘i faafuasei mai lea aso ia te outou.

³⁵ Auā e pei o se mailei ona oo mai ai i e nonofo uma lava i le fogāeleele uma.

³⁶ O lea ia outou mataala ai ma tatalo e le aunoa, ina ia ta‘uaogaina outou e sao mai ia mea uma ua tāli oo mai, ma ia tutū i luma o le Atalii o le tagata.

³⁷ Sa masani ia i a‘oa‘o atu i le malumalu i le ao; a o le po, ua maliu atu ai ia i tua, ma nofo i le mauga o Olive le igoa.

³⁸ Ua malama ae le taeao, ona o ane ai lea ia te ia o le nuu uma i le malumalu e faalogologo ai ia te ia.