Luka 2 - O LE TUSI PAIA

O LE MATAUPU II. O le poloaiga a Aokuso; o le fanau mai o Iesu.

¹ O aso lava ia na oo mai ai le poloaiga a Kaisara Aokuso ia tusia uma ai le lalolagi.

² (Na faia lenei uluai tusi ina o pule Kurenio i Suria).

³ Ua o uma atu foi i latou ia tusia, e taitasi i lana lava aai.

⁴ Ua alu ae foi Iosefa mai Kalilaia, mai le aai o Nasareta, i Iutaia i le aai a Tavita, ua igoa ia Peteleema, auā o le aiga ia ma le gafa o Tavita,

⁵ ia tusia faatasi ma Maria lana avā sa fāufautane ia te ia, ua to o ia.

⁶ Sa i ai i laua, ona oo lea i ona po e fanau ai o ia.

⁷ Ua fanau e ia lana tama ulumatua, ua ia aui ia te ia i le ie, ma faataoto ia te ia i le fale povi, auā latou te le ofi i le fale e tali ai malo.

⁸ Sa i le vao o lea nuu leoleo mamoe, sa nonofo ai ma leoleo po i lo latou lafu mamoe.

⁹ Faauta foi, ua tu mai ia i latou le agelu a le Alii, ua pupula faataaliolio mai foi ia te i latou le pupula o le Alii, ua matuā fefefe ai lava i latou.

¹⁰ Ona fai mai lea o le agelu ia te i latou, Aua tou te matatau; auā faauta, ou te au mai ia te outou le tala e olioli tele i le nuu uma;

¹¹ auā o le aso nei ua fanau ai i le aai a Tavita, lo outou Faaola, o le Alii ia o Keriso.

¹² O le faailoga lenei ia te outou, e iloa e outou le tama meamea ua aui i le ie, o loo taoto i le fale povi.

¹³ Ona faafuasei lea ona faatasi mai ma le agelu o ‘au mai le lagi e toatele, ua vivii i le Atua, ua faapea ane,

¹⁴ O le viiga i le Atua i mea aupitoaluga; ma le manuia i le lalolagi; o le finagalo alofa i tagata.

¹⁵ Ua o i le lagi agelu sa ia i latou, ona fetautalatala‘i ai lea o leoleo mamoe, Ina tatou o ia i Peteleema, tatou te vaavaai i lenei mea ua faia, ua faailoa mai ia te i tatou e le Alii.

¹⁶ Ua latou faataalise atu, ona maua lea o Maria, ma Iosefa, ma le tama meamea o taoto i le fale povi.

¹⁷ Ua latou iloa, ona latou faailoa ai lea o le upu na ta‘ua mai ia te i latou i lea tama.

¹⁸ O i latou uma e na faalogo ai, ua ofo i latou i mea ua ta‘ua mai ia te i latou e leoleo mamoe.

¹⁹ A o Maria ua taofi ia upu uma, ua mafaufau ai lona loto.

²⁰ Ona foi mai lea o leoleo mamoe, o vivii ma faafetai i le Atua, ona o mea uma ua latou faalogo ai ma vaai i ai, pei ona ta‘ua mai ia te i latou.

²¹ Ua oo i le aso valu e peritome ai le tama, ona faaigoaina ai lea o ia o Iesu, na faaigoa ai e le agelu a o lei i le manava o lona tinā.

²² Ua atoa ona aso o le faamamāina o ia, e tusa ma le tulafono a Mose, ona la au mai lea ia te ia i Ierusalema, e tuu atu ai i luma o le Alii;

²³ (pei ona tusia i le tulafono a le Alii, O tama tane ulumatua uma e taua i latou e paia mo le Alii;)

²⁴ e avatu foi le taulaga, pei ona fai mai ai le tulafono a le Alii, O le uluga manutagi, po o tamai lupe e lua fua.

²⁵ Faauta foi, sa i Ierusalema le tagata e igoa ia Simeona; o le tagata amiotonu o ia ma le mata‘u i le Atua, sa faatalitali atu o ia i le faamafanafanaina o Isaraelu; ua i luga ia te ia le Agaga Paia.

²⁶ Ua iloa e ia i le Agaga Paia, e le oo ia te ia le oti seia muai iloa atu le Keriso o le Alii.

²⁷ O le Agaga ua alu ai o ia i le malumalu; ua au mai le tama o Iesu e ona mātua, ia la faia ia te ia faapei ona tatau i le tulafono,

²⁸ ona sapaia lea e ia i ona lima, ua faafetai atu i le Atua, ua faapea atu,

²⁹ Le Alii e, e te tuuina atu nei lau auauna ia alu ma le manuia pei o lau afioga;

³⁰ auā ua iloa e o‘u mata le faaolataga mai ia te oe,

³¹ ua e saunia i luma o nuu uma lava;

³² o le malamalama e faamalamalama a‘i nuu ese, ma le mamalu o lou nuu o Isaraelu.

³³ Ua ofo lava Iosefa ma lona tinā i mea ua ta‘ua ia te ia.

³⁴ Ua faamanuia atu Simeona ia te i laua, ua fai atu foi ia Maria lona tinā, Faauta, ua tuu le tama nei e pauu ai ma toe tutū ai tagata e toatele o i Isaraelu; e fai foi ma faailoga e faaleagaina;

³⁵ (e tū‘ia foi lou lava loto ia ati i le pelu), ina ia faaalia mai ai manatu o loto i tagata e toatele.

³⁶ Sa i ai le perofeta fafine o Ana, o le afafine o Fanuelu o le itu aiga o Asera, ua loomatua ia, sa la nonofo ma lana tane talu ina o taupou, ua oo i lona fitu o tausaga.

³⁷ O ia foi le fafine nofo fua, pe atoa ona tausaga e valugafulu ma le fa, e lei alu ese ia i le malumalu, a ua auauna o ia i le Atua i anapogi ma talosaga i le ao ma le po.

³⁸ O lea lava itu aso, ua sau ai o ia, ua faafetai atu i le Alii, ma tautala ia te ia i tagata uma lava e na faatali atu i le togiola i Ierusalema.

³⁹ Ua uma ona faia e i laua o mea uma e tatau i le tulafono a le Alii, ona foi atu lea i Kalilaia, i la laua aai o Nasareta.

⁴⁰ Ua tupu le tama, ma ua malosi lona loto, ua tumu i le poto; ua ia te ia foi le alofa o le Atua.

⁴¹ Ua o i Ierusalema ona mātua i lea tausaga ma lea tausaga i le tausamiga o le paseka.

⁴² Ua oo i ona tausaga e sefulu ma le lua, ona o ae lea o i latou i Ierusalema, e tusa ma le tu o le tausamiga.

⁴³ Ua mavae ona aso, ona foi mai lea o i laua, a ua nofo le tama o Iesu i Ierusalema, a e lei iloa e Iosefa ma lona tinā.

⁴⁴ Fa te i laua o i le au malaga o ia; ua la po tasi i le ala, ona la saili lea ia te ia i lo la aiga ma e na latou masani.

⁴⁵ Ua le iloa o ia, ona la foi atu lea i Ierusalema, o saili ia te ia.

⁴⁶ Ua mavae aso e tolu, ona la maua ai lea o ia i le malumalu o nofo i totonu o le au a‘oa‘o, o loo faalogologo ia te i latou, ma taufesili ia te i latou.

⁴⁷ Ua matuā ofo uma lava e na faalogo ia te ia i lona poto ma ana upu e tali.

⁴⁸ Ua la ofo ina ua iloa atu o ia e i laua; ona fai ane lea o lona tinā ia te ia, La‘u tama e se a le mea ua e faapea mai ai ia te i maua? Faauta, o i maua ma lou tamā sa ma saili lava ia te oe ma le tiga.

⁴⁹ Ona fai atu lea o ia ia te i laua, Se a ea le mea na oulua saili mai ai ia te au? lua te le iloa ea e tatau ona ou i le fale o lo‘u Tamā?

⁵⁰ A ua le lagona e i laua le upu ua fai mai ai o ia ia te i laua.

⁵¹ Ua latou o ifo ma i laua, ua oo i Nasareta, ua anaana o ia ia te i laua; a o lona tinā ua taofi ia mea uma i lona loto.

⁵² Ua tupu le poto ma le tino o Iesu, ua alofagia o ia e le Atua atoa ma tagata.