Luka 15 - O LE TUSI PAIA

O LE MATAUPU XV. O le faataoto i le mamoe na sē.

¹ Ua faalatalata ia te ia le au telona uma ma e agasala, e faalogologo ia te ia.

² Ona muimui ai lea o le au faresaio ma le au tusiupu, ua fapea ane, Ua talia e lenei tagata o e agasala, ua aai faatasi foi o ia ma i latou.

³ Ona fetalai atu ai lea o ia lenei faataoto ia te i latou, ua faapea atu,

⁴ O ai ea so outou e ana mamoe e selau, afai e le iloa le tasi, e le tuua e ia le ivagafulu ma le iva i le vao, a e alu ma saili i le na le iloa, seia maua?

⁵ A maua, ua faafuata ma le olioli.

⁶ A oo atu foi i lona aiga, ua faapotopoto ai ana uo ma e tuaoi ma ia, ua fai atu ia te i latou, Ia tatou olioli ia; auā ua ou maua la‘u mamoe na le iloa.

⁷ Ou te fai atu ia te outou, e faapea foi ona tele o le olioli i le lagi i le tagata agasala e toatasi e salamo, a e itiiti i e amiotonu e toaivagafulu ma le toaiva e le tusa i ai le salamo.

⁸ O ai ea foi le fafine e ana tupe e fuagafulu, afai e le iloa ia te ia le tasi tupe, e le tŭtŭ ea se afi, ma tafitafi le fale, ma matuā saili i ai, seia maua?

⁹ A maua, ua faapotopoto ai ana uo ma e tuaoi ma ia, ua fai atu, Ia tatou olioli ia; auā na ou maua le tupe na le iloa ia te au.

¹⁰ Ou te fai atu ia te outou, ua faapea le olioli i luma o agelu a le Atua, ona o le tagata agasala e toatasi ua salamo.

¹¹ Ua fetalai atu o ia, O le tasi tagata e toalua ona atalii.

¹² Ua fai atu le uii i lona tamā, Sena e, ia e au mai ia te au lo‘u tofi o le oa; ona vaelua lea e ia o ana mea ia te i laua.

¹³ Ua mavae nai aso, ona faapotopoto ai lea e le uii mea uma, ua alu malaga i le nuu mamao, ua faataapeape ai ana mea i lea nuu, ua soona ulavale.

¹⁴ Ua uma atu ana mea, ona oge tele ai lea o lea nuu; ona faatoa mativa ai lea o ia.

¹⁵ Ua alu ia ua nofo i le tasi tagata o lea nuu, ua ia auina foi o ia i ona fanua e fafaga ai puaa.

¹⁶ Ua tupu lona manao i atigi mea e ‘aina e puaa ia maona ai o ia; e leai lava se tasi ua avane sina mea ia te ia.

¹⁷ Ona atamai ai lea o ia, ua faapea ane, E lē toatele ea o auauna a lo‘u tamā ua faulai a latou areto ua totoe; a o au, ou te matelaina.

¹⁸ O le a a‘u tulai ma alu i lo‘u tamā, ou te fai atu ia te ia, Lo‘u tamā e, ua ou agasala i Lē o i le lagi, atoa ma ou luma;

¹⁹ ua ou le toe aoga ona ta‘ua o lou atalii; ia e avea a‘u ia pei o se tasi o au auauna.

²⁰ Ona tulai lea o ia, ua alu i lona tamā. Ua iloa mamao atu foi o ia e lona tamā, ona mutimuti vale lea o lona alofa, ua momo‘e atu ia, ua fusi ia te ia, ma sogi atu ia te ia.

²¹ A ua fai mai le atalii ia te ia, Lo‘u tamā e, ua ou agasala i Lē o i le lagi, atoa ma ou luma, ua ou le toe aoga ona ta‘ua o lou atalii.

²² A ua fai atu le tamā i ana auauna, Au mai ia le ofu tatapuvae e aupito lelei, ma faaofu ia te ia; ma ia tuu se mama i lona lima, ma faasee i ona vae;

²³ au mai ia foi le tamai povi peti, ma fasi; tatou te aai ma olioli;

²⁴ auā o lo‘u atalii lenei, na oti, ua toe ola mai; na le iloa foi o ia, a ua maua. Ona latou olioli ai lea.

²⁵ Sa i le vao lona atalii ulumatua; ua sau ia, ua latalata mai i le fale, ona faalogo ai lea o ia i laaupese ua ta, ma le siva.

²⁶ Ua valaau atu ia i le tasi auauna, ua fesili atu, po o le a le uiga o nei mea.

²⁷ Ua fai mai o ia ia te ia, Ua sau lou uso; ua fasi ai foi e lou tamā le tamai povi peti, ina ua toe oo mai o ia o ola.

²⁸ Ona ita ai lea o ia, e le mafaia ona ulufale i ai; ona alu atu ai lea o lona tamā i fafo, ua faaoleole ia te ia.

²⁹ Ona tali mai ai lea o ia, ua faapea mai i lona tamā. Faauta, o tausaga ua tele, ua ou auauna ai ia te oe, ua leai lava sau poloaiga ua ou solia; e te lei au mai lava se tamai ‘oti ma a‘u, matou te olioli ai ma a‘u uo.

³⁰ Peitai o lou atalii lena, sa na faaumatia au mea faatasi ma fafine talitane, ua sau o ia, ona e fasi lea le tamai povi peti māna.

³¹ Ua fai atu ia ia te ia. Tā e, ta te nonofo pea ma oe, o a‘u mea uma foi, o āu ia.

³² Ua tatau foi ona tatou fiafia ma olioli, auā o lou uso lena na oti, a ua toe ola mai; na le iloa foi, a ua maua.