Levitiko 24 - O LE TUSI PAIA

O LE MATAUPU XXIV. O le suāuu olive e mu ai pea le lamepa.

¹ Ua fetalai mai foi Ieova ia Mose, ua faapea mai,

² Ina fai atu ia i le fanauga a Isaraelu, latou te au mai ia te oe le suāuu olive lelei e tu‘ia mo le afi, e mu ai pea le lamepa.

³ Ia sauni lea e Arona, e amata i le afiafi e oo lava i le taeao, i le itu mai o le ie puipui o le atolaau o le tulafono i le fale fetafai o le faapotopotoga i luma o Ieova, i aso uma lava; o le tulafono e faavavau i o outou tupulaga amuli.

⁴ Na te saunia lamepa o i luga o le tuugālamepa auro lelei i aso uma lava i luma o Ieova.

⁵ Ia e ave foi falaoa lelei, ma tao ai ni potoi e sefulu ma le lua; tailua omera i le potoi e tasi.

⁶ Ia e tuuina ai foi i atu potoi e lua, ia taiono i atu, i luga o le laoai auro lelei i luma o Ieova.

⁷ Ia e tuuina foi le pulu lipano lelei i luga o atu potoi, ia i ai lava ia i luga o areto e fai ma faamanatuga, o le taulaga e fai i le afi ia Ieova.

⁸ Na te saunia e le aunoa i luma o Ieova i lea aso sapati ma lea aso sapati, e au mai e le fanauga a Isaraelu, o le feagaiga e faavavau.

⁹ E fai mā Arona, ma ona atalii, latou te aai ai i le mea paia; auā e sili ona paia lea ia te ia i taulaga ia Ieova e fai i le afi, o le tulafono lea e faavavau.

¹⁰ O le tama a le fafine o Isaraelu, a o le Aikupito lona tamā na latou o mai ma le fanauga a Isaraelu; ua la femisai o lenei tama a le fafine Isaraelu ma le tagata o Isaraelu i le toagālauapi;

¹¹ ona faifai lea e le tama a le fafine Isaraelu le suafa o Ieova, ma upu leaga i ai, ona latou aumaia lea o ia ia Mose; (o le igoa foi o lona tinā o Salome, o le afafine o Tiperi, o le itu aiga o Tanu;)

¹² na latou tuuina atu o ia ia leoleoina, seia faaalia mai ia i latou le finagalo o Ieova.

¹³ Ona fetalai mai ai lea o Ieova ia Mose, ua faapea mai,

¹⁴ Ia outou ave i le na upu leaga i tua o le toagālauapi, ma ia faaee e i latou uma e na faalogologo i ai o latou lima i lona ulu, ma ia fetogi ia te ia i maa e le faapotopotoga uma.

¹⁵ Ia e fai atu foi i le fanauga a Isaraelu, ia faapea atu, Ai sē upu leaga i lona Atua e nofo sala lava o ia.

¹⁶ O le na te faifaia le suafa o Ieova, e fasiotia lava o ia, e fetogi lava ia te ia i maa e le faapotopotoga uma; o le tagata ese atoa ma le tama a le eleele pe a faifai o ia i le suafa o Ieova, e fasiotia lava o ia.

¹⁷ Ai sē fasioti foi i le tasi tagata e fasiotia lava o ia.

¹⁸ O sē fasimate i se manu e totogi e ia; o le manu e sui a‘i le manu.

¹⁹ Afai foi e faia e se tasi se mea e leaga ai le tino o le tasi; e faapei ona ia faia, e faapea lava ona faia ia te ia; e suia le manua i le manua,

²⁰ e suia le mata i le mata, e suia le nifo i le nifo; e pei o le leaga ua faia e ia i le tasi tagata, e faapea lava ona faia ia te ia.

²¹ Ai sē fasimate i le manu e avatu e ia le totogi; ai sē fasioti i le tagata e fasiotia lava o ia.

²² E tasi lava le tulafono ia te outou, e tusa lava le tagata ese ma le tama a le eleele; auā o a‘u o Ieova lo outou Atua.

²³ Ona fai atu lea o Mose i le fanauga a Isaraelu, ia latou ave i lē na upu leaga i tua o le toagālauapi, ma fetogi ia te ia i maa; ona fai ai lea e le fanauga a Isaraelu, e pei ona poloai mai ai o Ieova ia Mose.