Levitiko 23 - O LE TUSI PAIA

O LE MATAUPU XXIII. O tausamiga ia Ieova.

¹ Ua fetalai mai foi Ieova ia Mose, ua faapea mai,

² Fai atu ia i le fanauga a Isaraelu, ia faapea atu ia i latou, O tausamiga ia Ieova tou te tala‘i ai, o faapotopotoga paia, o tausamiga lava ia ia te au.

³ E ono aso e fai ai galuega; a o le aso fitu, o le sapati lea e malolo ai, e fai ai le faapotopotoga paia, aua tou te fai ai se galuega e tasi; o le sapati lea ia Ieova i mea uma tou te nonofo ai.

⁴ O tausamiga ia ia Ieova, o faapotopotoga paia, ia outou tala‘i ai i o latou aso ua atofaina.

⁵ O le masina muamua, o le aso e tasi le sefulu ma le fa o le masina, o le afiafi, o le paseka lea ia Ieova.

⁶ O le aso e tasi le sefulu ma le lima o lea lava masina, o le tausamiga lea ia Ieova o le areto e le faafefeteina; o aso lava e fitu tou te aai ai le areto e le faafefeteina.

⁷ O le aso muamua tou te fai ai se faapotopotoga paia, aua tou te fai ai se galuega mamafa.

⁸ A ia outou avatua taulaga e fai i le afi ia Ieova i aso e fitu; o le aso fitu o le faapotopotoga paia lea; aua lava tou te fai ai se galuega mamafa.

⁹ Ua fetalai mai foi Ieova ia Mose, ua faapea mai,

¹⁰ Fai atu ia i le fanauga a Isaraelu, ia faapea atu ia i latou, A outou oo i le nuu ou te avatua mo outou, ma outou fai ai le seleselegāsaito, ona outou au mai ai lea o le fusi saito o mea ua faapolopoloina o lo outou seleselega i le faitaulaga.

¹¹ E luluina foi e ia o le fusi saito i luma o Ieova, ina ia talia mo outou; o le aso e aupito mai i le sapati e luluina ai e le faitaulaga.

¹² O le aso foi tou te luluina ai le fusi saito, tou te avatua ai se mamoe poa e sao ona lelei, e tasi lona tausaga, e fai ma taulaga mu ia Ieova.

¹³ O le taulaga foi i mea e ‘ai e tatau i ai, e lua omera o le falaoa lelei ua palua ma le uu, o le taulaga e fai i le afi ia Ieova, o le mea manogi lelei; ma le taulaga i le mea e inu e tatau i ai, o lona vaega e fa o le sinu o uaina.

¹⁴ Aua tou te aai foi sina areto, po o saito tunua, po o saito mata seia oo i lea lava aso ua au mai ai se taulaga i lo outou Atua; o le tulafono lea e faavavau i o outou tupulaga amuli i mea uma tou te nonofo ai.

¹⁵ Ia outou faitaulia e amata i le aso e aupito mai i le sapati, o le aso lava na outou au mai ai le fusi saito o le taulaga lulu; ia atoatoa o sapati e fitu.

¹⁶ E oo lava i le aso e aupito mai i le sapati e fitu tou te faitau ai o aso e limagafulu; ona fai taulaga ai lea i le taulaga i mea e ‘ai fou ia Ieova.

¹⁷ Tou te au mai nai o outou fale o areto lulu e lua fua, e tailua omera, e fai i le falaoa lelei, ia tao ma le mea e faafefete a‘i, o mea faapolopolo ia ia Ieova.

¹⁸ Ia outou avatua faatasi ma areto o tamai mamoe e fitu, e tasi lo latou tausaga e sao ona lelei, atoa ma le tamai povi poa e tasi, ma mamoe poa e lua, e fai ia ma taulaga mu ia Ieova, atoa ma taulaga i mea e ‘ai e tatau i ai, ma taulaga i le mea e inu e tatau i ai, o le taulaga lava e fai i le afi, o le mea manogi lelei ia Ieova.

¹⁹ Ona fai taulaga ai lea outou i se ‘oti poa e tasi e fai ma taulaga mo le agasala, atoa ma tamai mamoe e lua e tasi lo la tausaga, e fai ma taulaga faafetai.

²⁰ Ona luluina ai lea o ia mea e le faitaulaga atoa ma le areto o mea faapolopoloina, e fai ma taulaga lulu i luma o Ieova, atoa ma tamai mamoe e lua; e paia ia mea ia Ieova mā le faitaulaga.

²¹ Ia outou tala‘i i lea lava aso e fai ai se faapotopotoga paia e outou; tou te le fai ai se galuega mamafa e tasi; o le tulafono lea e faavavau i mea uma tou te nonofo ai i o outou tupulaga amuli.

²² A outou selesele foi le seleselegāsaito i o outou fanua, aua le faauma ou pito fanua pe a e selesele i ai; aua foi e te ao ni fua ua pauu i lau seleselega, a ia tuu mo e matitiva ma le tagata ese; o a‘u o Ieova lo outou Atua.

²³ Ua fetalai mai foi Ieova ia Mose, ua faapea mai,

²⁴ Fai atu ia i le fanauga a Isaraelu, ia faapea atu, O le fituga masina, o le aso muamua o le masina, ia outou fai ai se sapati, o le faamanatuga i le iligāpu, o le faapotopotoga paia.

²⁵ Aua tou te fai ai se galuega mamafa e tasi, a ia outou avatu se taulaga e fai i le afi ia Ieova.

²⁶ Ua fetalai mai Ieova ia Mose, ua faapea mai,

²⁷ O le aso sefulu o lea lava fituga masina, o le aso o le togiola lea; o le faapotopotoga paia lea ia te outou; ia puapuagatia ai outou e outou, ma avatu ai se taulaga e fai i le afi ia Ieova.

²⁸ Aua tou te faia se galuega e tasi i lea lava aso; auā o le aso lea o le togiola, e fai ai se togiola mo outou i luma o Ieova lo outou Atua.

²⁹ Ai se tagata e le puapuagatia o ia e ia i lea lava aso, e vavaeeseina o ia i lona nuu.

³⁰ Ai se tagata foi na te faia se galuega e tasi i lea lava aso, e fano ia te au o lea tagata ai lona lava nuu.

³¹ Aua tou te fai ai se galuega e tasi; o le tulafono lea e faavavau i o outou tupulaga amuli, i mea uma tou te nonofo ai.

³² E fai lea ma sapati e malolo ai outou, e puapuagatia ai outou e outou; o le afiafi o le aso iva o le masina, e amata mai i le afiafi e oo lava i le tasi afiafi, tou te fai ai ma sapati e malolo ai.

³³ Ua fetalai mai foi Ieova ia Mose, ua faapea mai,

³⁴ Fai atu ia i le fanauga a Isaraelu, ia faapea atu, O le aso sefulu ma le lima o lea lava fituga masina, o le tausamiga o fale apitaga lea, e faia i aso e fitu ia Ieova.

³⁵ O le aso muamua, o le faapotopotoga paia lea; aua tou te fai ai se galuega mamafa e tasi.

³⁶ O aso e fitu ia outou avatu ai taulaga e fai i le afi ia Ieova; o le aso valu e fai ai le faapotopotoga paia e outou; ia outou avatu ai se taulaga e fai i le afi ia Ieova; o le faapotopotoga lea; aua tou te fai ai se galuega mamafa e tasi.

³⁷ O tausamiga ia ia Ieova tou te tala‘i ai, o faapotopotoga paia, e avatu ai se taulaga e fai i le afi ia Ieova, o le taulaga mu, ma le taulaga i mea e ‘ai, o le taulaga i mea ua fasia, ma le taulaga i mea e inu, o le aso ma ana mea; atoa ma sapati o Ieova,

³⁸ atoa foi ma a outou mea foai fua, atoa foi ma mea uma ua outou tauto ai, atoa foi ma taulaga ua outou loto fua ina fai, tou te aumaia ia Ieova.

³⁹ O le aso sefulu ma le lima o le fituga masina, pe a uma ona faaputuina e outou le fua o le fanua, ia outou faia lava se tausamiga ia Ieova i aso e fitu; o le aso muamua e fai ma sapati lea, i le ma le aso valu e fai ma sapati foi lea.

⁴⁰ O le aso muamua foi tou te ave ai fua o laau matagofie, o lau pama, ma la o laaufefele, ma garava mai le alia; ma ia outou olioli i luma o Ieova lo outou Atua i aso e fitu;

⁴¹ ma ia outou fai ai le tausamiga ia Ieova i aso e fitu i lea tausaga ma lea tausaga; o le tulafono e faavavau i o outou tupulaga amuli; ia outou faia le tausamiga i le fituga masina.

⁴² Tou te nonofo i fale apitaga i aso e fitu, o tama a le eleele uma i Isaraelu latou te nonofo i fale apitaga;

⁴³ ina ia iloa e o outou tupulaga amuli na ou faanofo ai le fanauga a Isaraelu i fale apitaga, ina ua ou au mai ia i latou ai le nuu o Aikupito; o a‘u o Ieova lo outou Atua.

⁴⁴ Ona ta‘u atu lea e Mose i le fanauga a Isaraelu o tausamiga ia Ieova.