Kenese 7 - O LE TUSI PAIA

O LE MATAUPU VII. O le lolo.

¹ Ua fetalai atu Ieova ia Noa. Ina ulu atu ia o oe atoa ma lou aiga uma i le vaa; auā ua ou iloa oe o le amiotonu i o‘u luma i lenei tupulaga.

² Ia e ave e taifitu i manu vaefa uma e mamā, o le manu poa ma le manu fafine; a o manu vaefa e le mamā e tailua ia, o le manu poa ma le manu fafine.

³ O manu felelei foi e taifitu, o le manu poa ma le manu fafine, ia ola mai ai a latou fanau i le fogāeleele uma.

⁴ Auā e toe fitu aso ona ou faatotoina ifo ai lea o le ua i le lalolagi e fagafulu ona ao e fagafulu foi ona po; ou te soloiesea foi i le fogāeleele o mea ola uma ua ou faia.

⁵ Na faia foi e Noa e tusa ma mea uma na poloai atu ai Ieova ai te ia.

⁶ O le ono selau o tausaga o Noa na oo ai le lolo i le lalolagi.

⁷ Ua ulu atu Noa, ma ona atalii, ma lana avā, ma avā a ona atalii faatasi ma ia i le vaa ona o le lolo.

⁸ O manu vaefa e mamā, ma manu vaefa e le mamā ma manu felelei, atoa ma mea uma e fetolofi i le eleele,

⁹ ua tailua ona ulu atu i latou ia Noa i le vaa, o le manu poa ma le manu fafine, e faapei ona poloai atu ai le Atua ia Noa.

¹⁰ Ua oo foi i le aso fitu, ona oo ai lea o le vai o le lolo i le lalolagi.

¹¹ O le tausaga e ono selau o le olaga o Noa, o le masina e lua, o le aso e sefulu ma le fitu o le masina, o le aso lava lea na lepeti ai o punāvai uma o i le moana sausau, ma ua faaavanoaina pupuni o le lagi.

¹² Sa i ai le uaga i le lalolagi i ao e fagafulu ma po e fagafulu.

¹³ O le aso lava lea na ulu atu ai Noa, ma atalii o Noa, o Semu, ma Hamo, ma Iafeta, ma le avā a Noa, ma avā e toatolu a ona atalii, e faatasi ma i latou, i le vaa;

¹⁴ o i latou nei, ma manu o le vao uma e taitasi ma lona uiga, ma manu vaefa fanua uma e taitasi ma lona uiga, ma mea fetolofi uma e fetolofi i le eleele e taitasi ma lona uiga, ma manufelelei uma e taitasi ma lona uiga, o mea felelei uma e taitasi ma uiga, eseese,

¹⁵ ua latou ulu atu foi ia Noa i le vaa, e tailua i mea ola uma o i ai le mānava ola.

¹⁶ Ua latou ulu atu, o le poa ma le fafine i mea ola uma, ua latou ulu atu, e faapei ona poloai atu le Atua ia te ia; ona pupuni ai lea e Ieova ia te ia.

¹⁷ Sa i ai foi le lolo i le lalolagi i ona aso e fagafulu; ua faatuputeleina le vai, ma ua opeopea ai le vaa, ua neetia foi i luga o le eleele.

¹⁸ Ua malo lava le vai, ma ua matuā faateleina i le lalolagi; ua alu foi le vaa i le fogāvai.

¹⁹ Ua matua malo tele lava le vai i le lalolagi; ma ua ufitia ai mauga maualuluga uma o i lalo o le lagi uma.

²⁰ E sefulu ma le lima kupita na malo ai le vai i luga, ma ua ufitia ai mauga.

²¹ Ona faauma ai lea o le ola o mea ola uma na feoai i le lalolagi, o manu felelei, ma manu vaefa fanua, ma manu feai, ma mea fetolofi uma na fetolofi i le eleele,

²² atoa ma tagata uma; na faauma le ola o mea uma sa i ai le mānava o le ola i o latou pogaiisu i mea uma sa i le eleele matutu.

²³ Na faaumatia o mea ola uma sa i le fogāeleele, o tagata, ma manu vaefa, ma mea fetolofi, atoa ma manu felelei; na faaumatia i latou ai le lalolagi; na o Noa, i le ma i latou sa i le vaa ma ia ua totoe.

²⁴ Sa malo le vai i le lalolagi i ona aso e selau ma le limagafulu.