Kenese 5 - O LE TUSI PAIA

O LE MATAUPU V. O gafa ma tausaga o tupuga, e afua mai ia Atamu e oo ia Noa.

¹ O le tusi lenei i le gafa o Atamu. O le aso na faia ai e le Atua le tagata na ia faia o ia ua faatusa i le Atua.

² Na ia faia i laua, o le tane ma le fafine, na ia faamanuia foi ia te i laua, ma na faaigoaina ai o la igoa o Atamu, i le aso na faia ai i laua.

³ Na ola Atamu i tausaga e tasi le selau ma le tolugafulu, ona fanaua lea e ia o lona atalii e foliga ia te ia ma faatusa i ai; ma ua faaigoaina e ia lona igoa o Setu.

⁴ O aso lava o Atamu talu ina fanauina e ia o Setu e valu selau o ona tausaga, ma ua fanaua ai e ia o atalii ma afafine.

⁵ O aso uma foi na ola ai Atamu, e iva selau ma le tolu gafulu, o ona tausaga ia; ona oti ai lea.

⁶ Na ola Setu i tausaga e tasi le selau ma le lima, ona fanaua lea e ia o Enosa.

⁷ O le olaga foi o Setu talu ina fanauina e ia o Enosa, o tausaga e valu selau ma le fitu ia, ma ua fanaua ai e ia o atalii ma afafine.

⁸ O aso uma foi o Setu e iva selau ma le sefulu ma le lua, o ona tausaga ia; ona oti ai lea.

⁹ Na ola Enosa i tausaga e ivagafulu, ona fanaua lea e ia o Kainano.

¹⁰ O le olaga foi o Enosa talu ina fanauina e ia o Kainano, o tausaga ia e valu selau ma le sefulu ma tausaga e lima, ma ua fanaua ai e ia o atalii ma afafine.

¹¹ O aso uma foi o Enosa e iva selau ma le lima, o ona tausaga ia; ona oti ai lea.

¹² Na ola Kainano i tausaga e fitugafulu, ona fanaua lea e ia o Maalaelu.

¹³ O le olaga foi o Kainano talu ina fanauina e ia o Maalaelu, o tausaga ia e valu selau ma le fagafulu, ma ua fanaua ai e ia o atalii ma afafine.

¹⁴ O aso uma foi o Kainano e iva selau ma le sefulu, o ona tausaga ia; ona oti ai lea.

¹⁵ Na ola Maalaelu i tausaga e onogafulu ma le lima, ona fanaua ai lea e ia o Iareto.

¹⁶ O le olaga foi o Maalaelu talu ina fanauina e ia o Iareto, o tausaga ia e valu selau ma le tolugafulu, ma ua fanaua ai e ia o atalii ma afafine.

¹⁷ O aso uma foi o Maalaelu e valu selau ma le ivagafulu ma le lima, o ona tausaga ia; ona oti ai lea.

¹⁸ Na ola Iareto i tausaga e tasi le selau ma le onogafulu ma tausaga e lua, ona fanaua ai lea e ia o Enoka.

¹⁹ O le olaga foi o Iareto talu ina fanauina e ia o Enoka, o tausaga e valu selau ia, ma ua fanaua ai e ia o atalii ma afafine.

²⁰ O aso uma foi o lareto e iva selau ma le onogafulu ma le lua, o ona tausaga ia; ona oti ai lea.

²¹ Na ola Enoka i tausaga e onogafulu ma le lima, ona fanaua ai lea e ia o Metusela.

²² Na la feooai foi o Enoka ma le Atua talu ina fanauina e ia o Metusela, i tausaga e tolu selau, ma ua fanaua ai e ia o atalii ma afafine.

²³ O aso uma foi o Enoka e tolu selau ma le onogafulu ma le lima, o ona tausaga ia.

²⁴ Na la feooai foi o Enoka ma le Atua; ua le iloa foi e ia, auā na avea o ia e le Atua.

²⁵ Na ola Metusela i tausaga e selau ma le valugafulu ma tausaga e fitu, ona fanaua ai lea e ia o Lameko.

²⁶ O le olaga foi o Metusela talu ina fanauina e ia o Lameko, o tausaga ia e fitu selau ma le valugafulu ma tausaga e lua, ma ua fanaua ai e ia o atalii ma afafine.

²⁷ O aso uma foi o Metusela e iva selau ma le onogafulu ma le iva, o ona tausaga ia; ona oti ai lea.

²⁸ Na ola Lameko i tausaga e selau ma le valugafulu ma tausaga e lua, ona fanaua ai lea e ia lona atalii,

²⁹ ma ua faaigoaina e ia lona igoa o Noa, o loo faapea. E faamafanafanaina i tatou e ia i la tatou galuega ma le tiga o tatou lima, ona o le laueleele ua malaia ia Ieova.

³⁰ O le olaga foi o Lameko talu ina fanauina e ia o Noa, o tausaga ia e lima selau ma le ivagafulu ma tausaga e lima, ma ua fanaua ai e ia o atalii ma afafine.

³¹ O aso uma foi o Lameko e fitu selau ma le fitugafulu ma le fitu, o ona tausaga ia; ona oti ai lea.

³² Ua lima selau tausaga o Noa, ona fanaua ai lea e Noa o Semu, ma Hamo, ma Iafeta.