Kenese 45 - O LE TUSI PAIA

O LE MATAUPU XLV. Ua ta‘utino atu e Iosefa i ona uso o ia o lo latou uso, ma ua aami atu lona tamā.

¹ Ona le mafai ai lea e Iosefa ona oono i luma o latou uma na tutū mai i ona luma, ona alaga ai lea o ia, Ia o ese tagata uma ia te au. E lei tu mai foi se tasi ia Iosefa ina ua faaali o ia i ona uso.

² Ua na tagi foi ma le leo tele; ona lagona ai lea e tagata Aikupito, ua lagona foi e le aiga o Farao.

³ Ua fai atu Iosefa i ona uso, O a‘u o Iosefa; o ola mai pea ea lo‘u tamā? Ona le mafai ai lea e ona uso ona tali mai ia te ia; auā ua matuā atuatuvale i ona luma.

⁴ Ona fai atu ai lea o Iosefa i ona uso, Ina soso mai ia ia te au. Ona latou soso mai ai lea. Ona fai atu ai lea o ia, O a‘u o lo outou uso o Iosefa, na outou faatau mai i Aikupito.

⁵ O lenei, aua ne‘i tiga outou, pe fai ma mea leaga i o outou manatu ina ua outou faatau mai ia te au i le mea nei; auā na auina mai a‘u e le Atua e muamua ia te outou e fai ma faaola;

⁶ auā o ia tausaga e lua ua i ai le oge i le nuu, o loo totoe foi tausaga e lima e le i ai se galuega i le suasolo po o se seleselegāsaito

⁷ Na auna mai foi a‘u e le Atua e muamua ia te outou e faasaoina outou i le lalolagi, e faaola foi ia te outou i le faaolataga tele.

⁸ O lenei, e le o outou na auna mai a‘u iinei, a o le Atua; ua ia fai foi a‘u ma tamā o Farao, ma alii i lona aiga uma, ma pule i le nuu uma o Aikupito.

⁹ Ia outou vave ona o ae i lo‘u tamā, ma outou fai atu ia te ia, O faapea mai lou atalii o Iosefa, Ua fai a‘u e le Atua ma alii o Aikupito uma; ia e sau ia te au, aua e te tuai mai.

¹⁰ E te nofo foi i le nuu o Kosena, e te latalata mai ia te au, o oe, ma au fanau, ma fanau a au fanau, ma au mamoe, ma au povi, ma au mea uma;

¹¹ ou te tausi foi ia te oe i lea mea, auā e toe lima tausaga o le oge, ina ne‘i faamativaina ai oe, ma lou aiga, ma mea uma ua ia te oe.

¹² Faauta, ua iloa mai o outou mata, ma mata o lo‘u uso o Peniamina, o lo‘u lava gutu o lē tautala atu nei ia te outou.

¹³ Ia outou ta‘u atu foi i lo‘u tamā lo‘u mamalu uma i Aikupito, ma mea uma ua outou vaai i ai; ia outou faataalise foi ona au mai o lo‘u tamā iinei.

¹⁴ Ona fusi ai lea o ia ia Peniamina lona uso, ma tagi i lona ua; ua tagi foi Peniamina i lona ua.

¹⁵ Ua taufeasogi foi ma ona uso uma, ma tagi ia te i latou. Mulimuli ane ona fetautalatalai lea ona uso ma ia.

¹⁶ Ua logoa foi le tala i le maota o Farao, ua faapea, Ua o mai uso o Iosefa; ua fiafia ai Farao ma ana auauna.

¹⁷ Ona fetalai mai lea o Farao ia Iosefa, Ia e fai atu i ou uso, Ia outou faia le mea nei; faaee mea i a outou manu, ma ia outou o i le nuu o Kanana,

¹⁸ ia outou au mai ai lo outou tamā ma o outou aiga, ma ia outou o mai ia te au; ou te avatu ia te outou le lelei o le nuu o Aikupito; tou te aai ai mea e sili ona lelei o i le nuu.

¹⁹ A o oe, ua oo ia te oe le poloaiga, ia outou fai le mea nei, ia ave fata faataavalevale ai le nuu o Aikupito mo a outou fanau, ma a outou avā, ma outou au mai lo outou tamā, i le o mai ai.

²⁰ Aua foi ne‘i manatua a outou mea; auā e ia te outou le lelei o le nuu uma o Aikupito.

²¹ Ua faapea ona faia e atalii o Isaraelu; ua avatu foi e Iosefa o fata faataavalevale ia te i latou, faapei o le fetalaiga o Farao; na ia avatu foi ia te i latou o oso o le malaga.

²² Na ia avatu foi ia te i latou uma e taitasi ma lona ofu; a o Peniamina, na ia avatu i ai tupe e tolu galau ma ofu e lima.

²³ A o lona tamā, ua ia aveina atu i ai nei mea; o asini e sefulu ua ave ai mea lelei a Aikupito, ma asini fafine e sefulu ua ave ai saito, ma areto, atoa ma mea e ‘ai mā lona tamā i le malaga.

²⁴ Ona ia aauina atu lea o ona uso, ona latou o ai lea; ua na fai atu foi ia te i latou, Aua ne‘i outou femisai i le ala.

²⁵ Ua latou o ae ai Aikupito, ua o mai i le nuu o Kanana ia Iakopo lo latou tamā.

²⁶ Ona latou ta‘u atu lea ia te ia, ua faapea atu, O loo ola Iosefa, ua pule foi o ia i le nuu uma o Aikupito. Ona vaivai ai lea o lona loto, auā ua na le talia a latou upu.

²⁷ A ua latou tautala atu ia te ia i upu uma a Iosefa na ia tautala mai ai ia te i latou; ua ia iloa foi fata faataavalevale na aauina mai e Iosefa e aami ia te ia, ona toe malosi ai lea o le loto o Iakopo lo latou tamā.

²⁸ Ona faapea mai ai lea o Isaraelu, Soia, o loo ola mai pea lo‘u atalii o Iosefa; ou te alu, ma te feiloai ma ia manū ou te lei oti.