Kenese 44 - O LE TUSI PAIA

O LE MATAUPU XLIV. O le togafiti a Iosefa e taofi i ona uso, ma le faatoga atu o Iuta ia te ia.

¹ Ua ia fai atu foi i le na pule i lona aiga, ua faapea atu, Ia faatutumu taga a ia tagata i mea e ‘ai, ia tuugataina i latou; ia tuu foi tupe a le tagata taitasi i le gutu o lana taga.

² I tuu foi la‘u ipu faaofuofu, le ipu ario, i le gutu o le taga a le aupito itiiti, atoa ma tupe o lana saito. Ona faia lea e ia faapei ona fai atu ai e Iosefa.

³ Ua malama ae le taeao, ona aauina atu lea o ia tagata, o i latou atoa ma a latou asini.

⁴ Ua tuanai e i latou le aai, a e lei mamao foi, ona fai atu ai lea o Iosefa i le ua pule i lona aiga, Tu ia i luga, tuliloa atu ia i na tagata; pe a e maua atu foi ia te i latou, ia e fai atu i ai, Se a le mea ua outou taui mai ai le lelei i le leaga?

⁵ E le o le mea ea lena e inu ai lo‘u alii, ma ua iite ai lava? Ua outou agaleaga mai i le mea ua outou faia.

⁶ Na ia maua atu foi ia te i latou, ona fai atu ai lea ia te i latou ia lava upu.

⁷ Ona latou fai mai ai lea ia te ia. Se a ea le mea e faapea mai ai ia upu e le alii? E mamao ma au auauna ona latou fai se mea faapena.

⁸ Faauta ea, o tupe na matou maua i gutu o a matou taga na matou toe au mai ia te oe ai le nuu o Kanana; se a le mea a matou gaoi ai ario po o auro i le maota o lou alii?

⁹ O so matou o au auauna e maua ai le mea, ia oti lava ia; e fai foi i matou ma pologa ia te oe lo matou alii.

¹⁰ Ona fai atu ai lea o ia, O lena lava, ia faia a outou upu; o le ua i ai le mea ia fai lea mo‘u pologa, a e magalo outou.

¹¹ Ona latou taitasi ai lea ma vave tuu i lalo lana taga i le eleele, ua taitasi foi ma tatala lana taga.

¹² Ona ia suesue ai lea, ua amata i le aupito matua, ua oo i le aupito itiiti, ua maua foi le ipu i le taga a Peniamina.

¹³ Ona latou saei ai lea o latou ofu, ua taitasi ma faaee le avega i lana asini, ma latou foi atu i le aai.

¹⁴ Ua o ma Iuta ma ona uso i le fale o Iosefa, auā na i ai pea ia; ona latou faapauu fao mai ai lea i ona luma.

¹⁵ Ona fai atu ai lea o Iosefa ia te i latou, Se a lenei mea ua outou faia? po ua outou le iloa ea e mafai lava e le tagata faapei o a‘u nei ona iite?

¹⁶ Ona tali mai lea o Iuta, Se a se mea matou te fai atu i lo matou alii? Se a sa matou upu? Pe faapefea ona matou faatonuina atu o i matou? Ua faaalia e le Atua le agasala a au auauna; faauta, o auauna i matou ia te oe lo matou alii, o i matou atoa ma le ua maua ua iai le ipu.

¹⁷ Ona fai atu ai lea o ia, E mamao ia te au ona ou fai lea mea; o le ua maua ua i ai le ipu, e fai lea ma‘u auauna, a o outou, o pea ia outou ma le manuia i lo outou tamā.

¹⁸ Ona soso mai ai lea o Iuta ia te ia, ua faapea mai, Le alii e, tuu mai ia i lau auauna se‘i fai atu se upu e faafofoga i ai oe le alii, aua foi ne‘i e toatamai ai i lau auauna; auā o oe e faapei o Farao lava.

¹⁹ Le alii e, na e fesili mai i au auauna, ua faapea mai, Pe ai so outou tamā, po o so outou uso?

²⁰ Ona matou fai atu ai lea ia te oe lo matou alii, O lo matou tamā lava, o le toeaina, ma le tama na fanaua e ia ina ua toeaina, o le tama itiiti; ua oti foi lona uso, o le toe tama foi ia a lona tinā, e faapelepele lava lona tamā ia te ia.

²¹ Ona e fetalai mai lea i au auauna, Ia au mai o ia ia te au, ou te matamata i ai.

²² Ona matou fai atu ai lea i lo matou alii, E le mafai ona tuua e le tama lona tamā; auā pe afai na te tuua lona tamā e oti lava lona tamā.

²³ Ona e fetalai mai ai lea i au auauna, Afai tou te le o mai ma lo outou uso aupito itiiti, tatou te le toe fesilafai.

²⁴ Ua o ae i matou i lau auauna o lo matou tama, ona matou ta‘u atu ai lea ia te ia le fetalaiga a lo matou alii.

²⁵ Ua fai mai foi lo matou tamā, Toe ō ia e faatau mai sina mea e ‘ai mā tatou.

²⁶ Ona matou fai atu ai lea, E le mafai ona matou o ifo; a e afai matou te o ma lo matou uso aupito itiiti, ona matou o ifo ai lea; auā e le mafai ona matou iloa o fofoga o le alii pe afai e le i ai ia te i matou lo matou uso aupito itiiti.

²⁷ Ona fai mai ai lea o lau auauna, o lo matou tamā, ia te i matou, Ua outou iloa na fanau mai la‘u avā ia te au o atalii e toalua.

²⁸ Na alu ese foi le tasi ia te au, ona ou faapea ane ai lea, Ai lava ua saeia lava ia, ou te lei toe iloa foi ia talu ai.

²⁹ Afai tou te aveeseina foi lenei ia te au, a oo atu foi ia te ia se leaga, tou te aveina ifo ai o‘u lauulu sina i le tuugamau ma le faanoanoa.

³⁰ O lenei, pe a a‘u alu atu i lau auauna o lo‘u tamā, a e le o ia te i matou le tama, (auā o le ola o le tama e ola ai o ia,)

³¹ pe a iloa e ia e le o i ai le tama, ona oti ai lea; ona aveina ifo ai lea e au anauna o lauulu sinā o lau auauna, o lo matou tamā, i le tuugamau ma le faanoanoa.

³² Auā na fai lau auauna ma moni o le tama i lo‘u tamā, ua faapea atu, Afai ou te le toe aumaia o ia ia te oe, ona ou nofo sala ai lea i lo‘u tamā i aso uma.

³³ O lenei, ou te aioi atu; ia nofo a‘u o lau auauna e fai ma pologa i lo‘u alii e sui a‘i le tama, a ia alu ae le tama faatasi ma ona uso;

³⁴ auā ou te mafaia faapefea ona alu ae i lo‘u tamā, a e le o ia te au le tama? Ne‘i ou iloa le leaga e oo i lo‘u tamā.