Kenese 43 - O LE TUSI PAIA

O LE MATAUPU XLIII. Ua iu ina tuuina atu Peniamina e Iakopo, ia alu i le malaga.

¹ Ua tele lava le oge i le nuu.

² Ua uma foi ona latou aai i saito na latou aumaia i Aikupito, ona fai atu ai lea o lo latou tamā ia te i latou, Ina toe o ia e faatau mai sina mea e ‘ai ma tatou.

³ Ona fai mai ai lea o Iuta ia te ia, ua faapea mai, Na matuā fai mai le tagata ia te i matou, ua faapea mai, Pe afai tou te le o mai ma lo outou uso, tou te le iloa lava o‘u mata.

⁴ Afai e te aauina i matou ma lo matou uso, matou te o ifo e faatau i mea e ‘ai ma oe.

⁵ A e afai e te le tuuna mai o ia, matou te le o ifo; auā na fai mai le tagata ia te i matou, Tou te le iloa o‘u mata pe afai tou te le o mai ma lo outou uso.

⁶ Ona faapea atu ai lea o Isaraelu, Se a le mea ua outou agaleaga mai ai ia te au i lo outou ta‘u atu i le tagata ua toe lo outou uso?

⁷ Ona latou fai mai ai lea, Na matuā fesili mai le tagata i lo tatou aiga, ua faapea mai, Po ua ola mai ea lo outou tamā? Pe ai se isi o outou uso? Ona matou tala atu ai lea ia te ia e tusa ma ia upu; na matou iloa ea a fai mai o ia, Au mai ia lo outou uso?

⁸ Ona fai mai ai lea o Iuta ia Isaraelu lona tamā, Tuu mai ia le tama ia te au, ona matou tulai ai lea ma o, ina ia tatou ola a e le oti, o i matou, ma oe, atoa ma o matou tama iti.

⁹ E fai a‘u mona moni; e te saili mai o ia ia te au; afai ou te le toe au mai o ia ia te oe, ma tuu ia te ia i ou luma, ona ou nofo sala ai lea ia te oe i aso uma lava.

¹⁰ Auā ana matou le faatuai, po o pe na, ona aso ia ua matou foi faalua mai ai.

¹¹ Ona fai atu ai lea o Isaraelu lo latou tamā ia te i latou, Afai lava o lea, ia outou faia lenei mea, ina ave ia ni mea o le fanua e sili ona lelei i a outou ato, ia ave ifo ai se mea alofa i le tagata, o sina pulu pasama, ma sina meli, ma pulu seturo, ma pulu latano, ma petuni, ma sekati.

¹² Ia outou ave lua foi tupe i o outou lima; o tupe foi na toe au mai i gutu o a outou taga, ia toe ave ia i o outou lima; ai lava o le sese.

¹³ Ave foi lo outou uso, ina tutū ia i luga, ina toe o i le tagata

¹⁴ Ia foaiina foi ia te outou e le Atua e ona le malosi uma lava ona ia alofaina outou e le tagata, ia na tuuna mai foi ia te outou le isi o outou uso atoa ma Peniamina; a o a‘u, afai e aveeseina a‘u fanau ia te au, ua aveeseina lava.

¹⁵ Ona ave ai lea e le nuu ia mea alofa, ma tupe ave lua i o latou lima, atoa foi ma Peniamina; ona latou tulai ai lea, ma o ifo i Aikupito, ma latou tutū i luma o Iosefa.

¹⁶ Ua iloa e Iosefa o Peniamina ma i latou, ona fai atu ai lea o ia i le na pule i lona aiga, Au mai ia o na tagat i le fale, ma ia fasi ni manu, ma ia sauni; auā matou te aai ma ia tagata pe a oo i le aoauli.

¹⁷ Ona faia foi lea e le tagata faapei ona fai atu ai Iosefa, ua na au mai le nuu i le fale o Iosefa.

¹⁸ Ona matatau ai lea o le nuu ina ua aumaia o i latou i le fale o Iosefa, ua faapea, Ai ua aumaia i tatou ona o tupe na toe tuuina i a tatou taga ina ua tatou muai o mai, ina ia na oso mai ai ia te i tatou, ma pupue mai ia te i tatou ma a tatou asini, ia fai foi i tatou ma pologa.

¹⁹ Ona latou soso atu ai lea i le tagata ua pule i le aiga o Iosefa, ma tautala atu ia te ia i le faitotoa o le fale.

²⁰ Ua latou faapea atu, Le alii e, faafofoga mai ia, na matou muai o mai lava e faatau ni mea e ‘ai.

²¹ Na oo foi i matou i le mea e moe ai, ona matou talai ai lea o a matou taga, faauta foi, taitasi le tagata ma aua tupe i le gutu o lana taga, o a matou tupe atoa lava; ua matou toe aumaia foi i o matou lima.

²² Ua matou aumaia foi isi tupe i o matou lima e faatau a‘i ni mea e ‘ai, a e matou te lei iloa po o ai na na tuu a matou tupe i a matou taga.

²³ Ona fai mai ai lea o ia, Ia fifilemu outou, aua ne‘i fefefe; o lo outou Atua ma le Atua o lo outou tamā ua avane e ia le oloa ia te outou i a outou taga; na ia te au a outou tupe. Ona ia au mai ai lea o Simeona ia te i latou.

²⁴ Ona aumaia lea o i latou e le tagata i le fale o Iosefa, ma ua tuu atu ia te i latou le vai, ona latou mulumulu ai lea o latou vae; ua na fafaga foi a latou asini.

²⁵ Ona latou sauni lea le mea alofa, a o lei sau Iosefa i le aoauli, auā na latou faalogo o le a latou aai i lea mea.

²⁶ Ua sau Iosefa i le fale, ona latou au mai ai lea ia te ia i le fale le mea alofa nai o latou lima, ma latou ifo toele mai ia te ia.

²⁷ Ua na ofo alofa atu foi ia te i latou, ua fai atu, Po o malolo ea lo outou tamā, le toeaina na outou fai mai ai, po o ola mai pea ia?

²⁸ Ona latou tali mai ai lea, O malolo lau auauna lo matou tamā, o loo ola mai lava ia; ona latou punonou ai lea, ma ifo ia te ia.

²⁹ Ua ia tepa atu, ona iloa ai lea Peniamina lona uso, le tama a lona tinā; ona fai atu ai lea, O lo outou uso aupito itiiti ea lea, na outou fai mai ai ia te au? Ua na fai atu foi, Lo‘u atalii e, ia alofa atu le Atua ia te oe.

³⁰ Ona faataalise ai lea o Iosefa, auā na mutimutivale lona alofa i lona uso, ua na saili se mea e tagi ai, ona ulu atu ai lea o ia i lona afeafe, ua tagi ai.

³¹ Ua mulumulu ona mata, ona alu ane lea o ia, ua oono, ma fai atu, Laulau mai ia o mea e ‘ai.

³² Ona latou laulau mai ai lea o ana mea, na o ia; a e laulau a latou mea, na o i latou; a e laulau mea a tagata Aikupito, e na aai ma ia, na o i latou lava; auā e le aai faatasi tagata Aikupito ma tagata Eperu; auā o le mea lea e ‘ino‘ino ai tagata Aikupito.

³³ Ua latou nonofo i ona luma, o le ulumatua i le mea e nofo ai le ulumatua, ma le uii i le mea e nofo ai le uii; ona ofo ai lea o le nuu, ua fetepai o le tasi i le tasi.

³⁴ Ua ia avatu foi tufaaga ia te i latou i mea na i ona luma; a o le tufaaga o Peniamina ua faasili i o latou uma, ua lima. Ua latou feinu, ma ua malilie ai faatasi ma ia.