Kenese 36 - O LE TUSI PAIA

O LE MATAUPU XXXVI. O le tala i gafa o Esau.

¹ O gafa nei o Esau, o Etoma foi ia.

² Na fai ana avā e Esau, o fafine Kanana; o Ata le afafine o Ailona o lo sa Hetī, ma Alipama le tamafafine a Ena, le afafine ia o Sepeono o lo sa Hivī;

³ ma Pasemeta le afafine o Isamaeli, le tuafafine o Nepaiota.

⁴ Ua fanau mai Ata ia Esau, o Elifasa; ua fanau mai foi Pasemeta o Reuelu.

⁵ Ua fanau Alipama o Iuso, ma Ialama, ma Kara; o atalii ia o Esau na fanau ia te ia i le nuu o Kanana.

⁶ Ua ave e Esau ana avā, ma ona atalii, ma ona afafine, ma tagata uma o lona aiga, ma ana lafu, ma ana manu uma, atoa ma ana mea uma ua ia maua i le nuu o Kanana, na ia alu atu i le tasi nuu ai lona uso o Iakopo;

⁷ auā ua tele a la mea e le mafai ona nonofo faatasi i laua; ua le mafai foi ona la mau faatasi i le nuu na la āumau ai, ona o le tele o a la manu.

⁸ Ua nofo Esau i le mauga o Seira; o Esau o Etoma lava lea.

⁹ O gafa nei o Esau le tupuga o Etoma i le mauga o Seira.

¹⁰ O igoa nei o atalii o Esau; o Elifasa le tama a Ata le avā a Esau; o Reuelu le tama a Pasemeta le avā a Esau.

¹¹ O atalii nei o Elifasa; o Timanu, o Amara, o Sefo, ma Katamo, ma Kinasa;

¹² o Timena sa fai o ia ma palake ia Elifasa le atalii o Esau; na fanau o ia ia Elifasa, o Amaleka; o tama lava ia a Ata le avā a Esau.

¹³ O atalii nei o Reuelu; O Nakata ma Sera, o Sama ma Misa; o i latou nei o tama a Pasemeta le avā a Esau.

¹⁴ O i latou nei o tama a Alipama le tamafafine a Ena, le afafine o Sepeono, le avā a Esau, na fanau o ia ia Esau, o Iuso, ma Iālama, ma Kara.

¹⁵ O matai i latou nei, o atalii o Esau; o atalii o Elifasa le ulumatua a Esau, o le matai o Timanu, o le matai o Amara, o le matai o Sefo, o le matai o Kinasa,

¹⁶ o le matai o Kara, o le matai o Katamo, o le matai o Amaleka; o i latou nei o matai o sa Elifasā i le nuu o Etoma, o i latou nei o tama a Ata.

¹⁷ O i latou nei o atalii o Reuelu le atalii o Esau; o le matai o Nakata, o le matai o Sera, o le matai o Sama, o le matai o Misa; o i latou nei o matai o sa Reuelū i le nuu o Etoma, o i latou nei o tama a Pasemeta le avā a Esau.

¹⁸ O i latou nei o tama a Alipama le avā a Esau; o le matai o Iuso, o le matai o Ialama, o le matai o Kara; o matai i latou nei, o fanau a Alipama le tamafafine a Ena, le avā a Esau.

¹⁹ O i latou nei o atalii o Esau, o i latou nei foi o i latou matai; o Etoma foi ia.

²⁰ O i latou nei o atalii o Seira, o le sa Horī, ē sa nonofo ai i le nuu; o Lotana, ma Sovala, ma Sepeono, ma Ena, ma Tisono, ma Eseri,

²¹ ma Tisano, o i latou ia o matai o sa Horī, o atalii o Seira i le nuu o Etoma.

²² O i latou nei o atalii o Lotana; o Hori ma Aimamu; o le tuafafine o Lotana o Timena ia.

²³ O i latou nei o atalii o Sovala; o Aluana, ma Manaka, ma Epalu, o Sefo, ma Onama.

²⁴ O i latou nei o atalii o Sepeono, o Aia atoa ma Ena; o Ena lea ua maua iamina i le vao ina o fafaga e ia o asini a Sepeono lona tamā.

²⁵ O i laua nei o fanau a Ena; o Tisono ma Alipama le afafine o Ena.

²⁶ O i latou nei o atalii o Tisono; o Amatana, ma Esepana, ma Itirana, ma Karana.

²⁷ O i latou nei o atalii o Eseri; o Pileana, ma Savana, ma Akana.

²⁸ O i laua nei o atalii o Tisano; o Usa ma Arana.

²⁹ O i latou nei o matai o sa Horī; o le matai o Lotana, o le matai o Sovala, o le matai o Sepeono, o le matai o Ena, o le matai o Tisono,

³⁰ o le matai o Eseri, o le matai o Tisano; o i latou ia o matai o sa Horī, e taitasi o i latou ma lona matai i le nuu o Seira.

³¹ O i latou nei o tupu sa fai ma tupu i le nuu o Etoma, a o leai se tupu i le fanauga a Isaraelu.

³² Sa fai ma tupu i Etoma o Pala le atalii o Peora; o le igoa o lona aai o Tineava.

³³ Ua oti Pala, ona soloai ane lea o Iopapa le atalii o Sera o le Posara e fai ma tupu.

³⁴ Ua oti Iopapa, ona soloai ane lea o Kusamu mai le nuu o sa Timanū e fai ma tupu.

³⁵ Ua oti Kusamu, ona soloai ane lea o Atata le atalii o Petata e fai ma tupu; o ia na fasi ia Mitiana i le nuu o Moapi; o le igoa o lona aai o Avita.

³⁶ Ua oti Atata, ona soloai ane lea o Samelu o le Maseraka e fai ma tupu.

³⁷ Ua oti Samelu, ona soloai ane lea o Saulo o le Reopo i tala ane o le vaitafe e fai ma tupu.

³⁸ Ua oti Saulo, ona soloai ane lea o Paalaanana le atalii o Akapora e fai ma tupu.

³⁹ Ua oti Paalaamana le atalii o Akapora, ona soloai ane lea o Atara e fai ma tupu; o le igoa o lona aai o Pagu, o le igoa o lana avā o Meatapala le tama fafine a Matarata, le tama fafine ia a Maisaava.

⁴⁰ O igoa nei o matai o sa Esaū, e taitasi o i latou ma lona itu aiga, e taitasi foi ma lona nuu i o latou lava igoa; o le matai o Timena, o le matai o Aleva, o le matai o Ieteta, o le matai o Alipama,

⁴¹ o le matai o Ele, o le matai o Pinona,

⁴² o le matai o Kinasa, o le matai o Timanu, o le matai o Mepesara,

⁴³ o le matai o Maketialu, o le matai o Irama; o i latou ia o matai o Etoma, e taitasi ma lona nuu e nofo ai na maua mo i latou; o ia o Esau le tupuga o sa Etomā.