Kenese 35 - O LE TUSI PAIA

O LE MATAUPU XXXV. Ua auina Iakopo e le Atua i Peteli.

¹ Ua fetalai mai le Atua ia Iakopo, Tulai ia, ina e alu ae i Peteli ma nofo ai; ma e fai ai le fata faitaulaga i le Atua na faaali ia te oe ina ua e sola ese ia Esau lou uso.

² Ona fai ane lea o Iakopo i lona aiga ma i latou uma sa ia te ia, Tuu ese ia o atua ese o loo i ai ia te outou, ma ia outou faamamā ia te outou, ma fesui i o outou ofu;

³ ina tatou tulai ia, ma tatou o ae i Peteli, ou te fai ai le fata faitaulaga i le Atua na tali mai ia te au i le aso na ou puapuaga ai, sa ia te au foi i le ala na ou ui ai.

⁴ Ona latou avane lea ia Iakopo o latou atua ese uma lava sa ia te i latou, ma a latou mama sa i o latou taliga, ua nana ai e Iakopo i lalo o le aluna e lata ane i Sekema.

⁵ Ua latou o ese ai, sa i ai le mata‘u mai le Atua i aai uma na vagavagai ia te i latou, ua latou le tulituliloa i le fanau a Iakopo.

⁶ Ua oo Iakopo i Lusa i le nuu o Kanana, (o Peteli foi lea,) o ia atoa ma tagata uma sa ia te ia.

⁷ Ua ia fai ai le fata faitaulaga, ma na faaigoa lea mea o Elipeteli, auā na faaali mai ai le Atua ia te ia ina ua sola ese i lona uso.

⁸ Ona oti lea o Tepora le na tausi ia Repeka, na tanu ai o ia i lalo ifo o Peteli, i lalo o le aluna, ua faaigoa ai o Aluna-pakata.

⁹ Ua toe faaali mai le Atua ia Iakopo ina ua sau nai Patanarama, ua faamanuia foi ia te ia.

¹⁰ Ua fetalai mai le Atua ia te ia, O Iakopo lou igoa; e te le toe igoa a‘i ia Iakopo, a o Isaraelu e te igoa ai; ua na faaigoa ia te ia o Isaraelu.

¹¹ Ua fetalai mai le Atua ia te ia, O a‘u le Atua e o‘u le malosi uma lava; ia faatoateleina oe, ma ia uluola; o le nuu ma le vao nuu e tutupu mai ai ia te oe; e fanaua foi e oe o tupu.

¹² O le laueleele na ou foaiina atu ia Aperaamo ma Isaako, ou te foai atu ai ia te oe, o lau fanau foi pe a mavae atu oe ou te foai atu ai le laueleele.

¹³ Ua afio ae le Atua nai ia te ia ai le mea sa fetalai mai ai ia te ia.

¹⁴ Ona faatu lea e Iakopo le faailoga i le mea na fetalai mai ai o ia ia te ia, o le faailoga maa; na ia liligi ifo i ona luga le taulaga i mea e inu, ma liligi i ai le suāuu.

¹⁵ Ua faaigoa e Iakopo le mea na fetalai ai le Atua ia te ia, o Peteli.

¹⁶ Ua alu ese o ia nai Peteli, ua tāli oo atu i Efarata, ona faatiga lea o Rasela, ua faigata lona fanauga.

¹⁷ Ua oo ina faigata lona fanauga, ona fai mai lea ia te ia o le na faatosaga le fanauga, Aua le fefe, auā e ia te oe foi lenei tama.

¹⁸ Ua oo ina a mavae atu lona agaga, (auā ua oti ai o ia,) ua ia faaigoa ia te ia o Penani; a o lona tamā na ia faaigoa ia te ia o Peniamina.

¹⁹ Ua oti Rasela, ua tanu i le ala i Efarata, o Peteleema foi lea.

²⁰ Ua faatu e Iakopo le faailoga i lona tuugamau; o le faailoga lea o le tuugamau o Rasela ua oo i le aso nei.

²¹ Ona alu ai lea o Isaraelu ua to lona fale ie i tala atu o le ‘olo o Eteru.

²² Sa nofo Isaraelu i lea nuu, ona alu ai lea o Reupena ua momoe ma Pila le palake o lona tamā; ua lagona ai e Isaraelu le tala. O atalii o Iakopo ua toatinoagafulu ma le toalua i latou.

²³ O tama a Lea; o le ulumatua a Iakopo, o Reupena, ma Simeona, ma Levi, ma Iuta, ma Isakara, ma Sepulona.

²⁴ O tama a Rasela; o Iosefa ma Peniamina.

²⁵ O tama a Pila le auauna fafine a Rasela; o Tanu ma Nafatali.

²⁶ O Tama a Selepa le auauna fafine a Lea; o Kato ma Asera; o atalii ia o Iakopo na fanaua ia te ia i Patanarama.

²⁷ Ua oo atu Iakopo ia Isaako lona tamā i Mamere i Kiriatarapa, (o Heperona lea,) sa āumau ai Aperaamo ma Isaako.

²⁸ O aso na ola ai Isaako, ua selau tausaga ma le valugafulu.

²⁹ Ona to lea o le mānava a Isaako, ua oti o ia, ma ua faatasi atu i lona nuu, ua toeaina, ua tuu tulu‘i lona ola; na tanu foi o ia e Esau ma Iakopo ona atalii.