Kenese 30 - O LE TUSI PAIA

O LE MATAUPU XXX. Ua avatu e Rasela ma Lea a la auauna ia Iakopo.

¹ Ua iloa e Rasela e lei fanau ia ia Iakopo, ona mataua lea o Rasela i lona uso, ua fai mai ai ia Iakopo, Au mai ia ni tama ia te au, a leai ona ou oti ai lea.

² Ona ita tele ai lea o Iakopo ia Rasela, ua na fai atu ai, O a‘u ea le sui o le Atua, o le ua le avatu ia te oe ni fanau?

³ Ona fai mai ai lea o ia, Faauta, o la‘u auauna o Pila, ia e alu atu ia te ia, ona ou fai tama ai lea ia te ia, ia ou maua ni fanau mai ia te ia.

⁴ Ona au mai ai lea e ia o lana auauna fafine o Pila ia te ia e fai mana avā, ona alu atu ai lea o Iakopo ia te ia.

⁵ Ona to ai lea o Pila, ua fanau ai ia Iakopo le tama tane.

⁶ Ona faapea lea o Rasela, Ua faamasinoina a‘u e le Atua, ua ia faafofoga mai foi i lo‘u leo, ma na au mai ia te au le tama tane, o le mea lea ua ia faaigoa ai ia te ia o Tanu.

⁷ Ua toe to foi Pila le auauna a Rasela, ua fanau ai ia Iakopo lona toalua o tama tane.

⁸ Ona faapea lea o Rasela, O fagatuaga tetele ua ou fagatua ai ma lo‘u uso, ua ou manumalo ai foi; ua ia faaigoa ai foi ia te ia o Nafatali.

⁹ Ua iloa e Lea ua pa o ia, ona ave ai lea e ia o Selepa lana auauna, ua avatu ia Iakopo e fai ma ana avā.

¹⁰ Ona fanau ai lea e Selepa le auauna a Lea le tama tane ia Iakopo.

¹¹ Ona faapea lea o Lea, O loo sau le ‘au; ua na faaigoa ai ia te ia o Kato,

¹² Ua toe fanau foi e Selepa le auauna a Lea lona toalua o tama tane ia Iakopo.

¹³ Ona faapea lea o Lea, Amuia a‘u auā e faaamuia mai fafine ia te au; ua na faaigoa ai ia te ia o Asera.

¹⁴ O ona po e selesele ai saito na alu atu ai Reupena, ua maua foi tutaima i le vao, ua au mai ai i lona tinā o Lea. Ona fai atu ai lea o Rasela ia Lea, Se‘i au mai ia te au nai tutaima a lau tama.

¹⁵ Ona fai mai ai lea o ia ia te ia, Se mea māmā ea ina ua e fao la‘u tane? A ē fao ea foi ma tutaima a la‘u tama? Ona fai atu ai lea o Rasela, O lea foi, lua te momoe ai ma ia i le po nanei, ona o tutaima a lau tama.

¹⁶ Ua sau Iakopo ai le vao i le afiafi, ona alu atu ai lea o Lea e faafetaiai ia te ia, ua faapea atu, E te alu ane ia te au, auā ua ou faatauina lava oe i tutaima a la‘u tama. Ona la momoe ai lea ma ia i lea po.

¹⁷ Ua faafofoga le Atua ia Lea, ona to ai lea o ia, ua fanau e ia ia Iakopo le tama tane, o lona toalima lea.

¹⁸ Ona faapea lea o Lea, Ua foai mai e le Atua lo‘u taui, auā na ou avatu la‘u auauna i la‘u tane; ua na faaigoa ai ia te ia o Isakara.

¹⁹ Ua toe to foi Lea, ua fanau ai le tama tane ia Iakopo, o le toaono lea.

²⁰ Ona faapea lea o Lea, Ua foaiina mai e le Atua ia te au le oloa lelei; o lenei, o le a ma mau ma la‘u tane auā ua ou fanau tama tane e toaono ia te ia; ua na faaigoa ai ia te ia o Sepulona.

²¹ Ua muli ai fanau e ia se tama teine, ua faaigoa ia te ia o Tina.

²² Ua manatua foi Rasela e le Atua, ua faafofoga le Atua ia te ia, ua faafanauina ia.

²³ Ona to ai lea o ia, ua fanau le tama tane, ua faapea ai, Ua aveeseina e le Atua lo‘u luma.

²⁴ Ua na faaigoa ia te ia o Iosefa, ua faapea, E faaopoopo mai e Ieova ia te au se tasi tama tane.

²⁵ Ua fanau e Rasela o Iosefa, ona fai atu ai lea o Iakopo ia Lapana, Tuu mai ia o a‘u, ina ia ou alu i lo‘u nuu ma lo‘u laueleele.

²⁶ Tuu mai ia o a‘u avā ma a‘u fanau, sa ou auauna ai ia te oe, a ou alu; auā ua e iloa la‘u galuega ua ou auauna ai ia te oe.

²⁷ Ona fai mai ai lea o Lapana ia te ia, Afai e te alofa ia te au, ia e nofo mai pea, auā ua ou matuā iloa ua faamanuia mai a‘u e Ieova ona o oe.

²⁸ Ua faapea mai foi o ia, Ia e ta‘utino mai ia te au sou totogi; ou te avatua lava ia te oe.

²⁹ Ona fai atu ai lea o ia ia te ia, Ua e iloa le uiga o la‘u auauna atu ia te oe, ma au mea ua ia te au.

³⁰ Auā sa itiiti mea ia te oe a ou te lei sau, a ua tupu, ua matuā tele, ua faamanuia oe e Ieova ona o a‘u; a o lenei, o afea ea ou te sauni ai mea ma lo‘u lava aiga?

³¹ Ona fai mai ai lea o ia, Se a le mea ou te avatu ia te oe? Ona fai atu ai lea o Iakopo, Aua e te au mai se mea ia te au; afai e te fai le mea nei ma a‘u, ou te toe fafaga lou lafu ma leoleo ai;

³² ou te fealualuai i lou lafu uma i le aso nei, e tuu ese ai o mamoe uma e ilaila solo ma pulepule; o mamoe efuefu uma i le lafu, ma ‘oti pulepule uma, ma e ilaila solo, e fai ia mo‘u totogi.

³³ O le mea lea e iloa ai la‘u amiotonu i se aso, pe a oo mai lo‘u totogi i ou luma; o ‘oti uma e le ilaila solo pe pulepule, ma mamoe uma e le efuefu, e ta‘ugaoia a‘u i lea mea.

³⁴ Ona fai mai ai lea o Lapana, Ou te manao ina ia faia le mea ua e fai mai ai.

³⁵ O lea aso foi na ia tuu ese ai o ‘oti poa sa tusitusi ma pulepule, ma ‘oti fafine uma sa ilaila solo ma pulepule, atoa ma ‘oti uma lava ua i ai se ila sinasina, ma mamoe uma ua efuefu, ona tuu atu ai lea i ona atalii.

³⁶ Ua ia tuu foi le va i ala e po tolu le savaliga i lo la va ma Iakopo; a e leoleoina e Iakopo le toe lafu o Lapana.

³⁷ Ona ave ai lea e Iakopo o tatupu o le lipene mata, ma le lusa, ma le aremoni, na ia fofoe ai le pa‘u ia pulepule sisina laau.

³⁸ Ua ia faatutuina laau na na fofoe i mea faaliu, o mea ia e inu ai vai, i luma o le lafu, ina ua o atu le lafu e feinu ai, ina ia ofi ai le lafu pe a o atu e inu.

³⁹ Ona ofi ai lea o le lafu i luma o laau, ua fananau ai o manu tusitusi, ma ilaila solo, atoa ma e pulepule.

⁴⁰ Ua tuu ese e Iakopo tamai mamoe, ua na faasaga atu foi mata o le lafu i manu tusitusi, ma manu efuefu uma i le lafu o Lapana; ona tuu ese ai lea e ia lona lava lafu, a e lei tuu faatasi ma le lafu o Lapana.

⁴¹ Ua oo ina a ofi manu malolosi ona tuu ai lea e Iakopo o laau i mea e inu ai i luma o manu, ina ia ofi ai i luma o laau.

⁴² A e peitai o manu ua vaivai, ua ia le tuu ai laau, ona fai ai lea o manu vaivai ma Lapana, a o e malolosi ua fai ia mā Iakopo.

⁴³ Ua matuā faateleina lava mea a lea tagata, na ia te ia mamoe e tele, ma auauna fafine, ma auauna tane, ma kamela, atoa ma asini.