Kenese 3 - O LE TUSI PAIA

O LE MATAUPU III. O le agasala muamua a le tagata.

¹ Ua sili le atamai o le gata i manu uma o le vao na faia e Ieova le Atua. Ua fai mai o ia i le fafine, E moni ea, na fetalai mai le Atua, lua te le aai i laau uma o le faatoaga?

² Ona tali atu ai lea o le fafine i le gata, O fua o laau o le faatoaga ma te aai ai lava;

³ a o le fua o le laau o i totonu o le faatoaga na fetalai mai ai le Atua, Aua ma te aai ai, aua foi ma te papai atu i ai, ne‘i ma oti.

⁴ Ona fai mai lea o le gata i le fafine, Lua te le oti lava;

⁵ auā ua silafia e le Atua, o le aso lua te aai ai, e pupula ai o oulua mata; ona avea ai lea o oulua e pei ni atua o loo iloa le lelei ma le leaga.

⁶ Ona vaai atu lea o le fafine i le laau e lelei lava pe a ‘ai, ma ua matagofie mai, o le laau foi e aoga e maua ai le poto, ona tago ai lea o ia i lona fua, ma ‘ai ai; na ia avatu foi i lana tane faatasi ma ia, na ‘ai ai foi o ia.

⁷ Ona pupula ai lea o laua mata, ua la iloa ua le lavalavā i laua; ona la fatu ai lea o lau o le mati ua fai mo laua titi.

⁸ Ua faalogo i laua i le siufofoga o Ieova le Atua o loo savali i le faatoaga i le itu aso e agi malie mai ai le matagi; ona lalafi ai lea o Atamu ma lana avā ai luma o Ieova le Atua i laau o le faatoaga.

⁹ Ona valaau atu lea o Ieova le Atua ia Atamu, ua faapea atu ia te ia, O fea o iai oe? Ona tali mai lea o ia,

¹⁰ Na ou faalogo atu i lou siufofoga i le faatoaga, ona ou fefe ai lea, auā ua ou le lavalavā; ona ou lafi lea.

¹¹ Ua fetalai atu o ia, O ai ea ua na ta‘u atu ia te oe ua e le lavalavā? Ua e ‘ai ea i le laau na ou fai atu ai ia te oe, e aua e te ‘ai ai?

¹² Ona faapea mai lea o Atamu, O le fafine na e aumai ia te au, ua na aumai ia te au le fua o le laau, ona ou ‘ai ai lea.

¹³ Ona fetalai atu lea o Ieova le Atua i le fafine, Se a lena mea ua e faia? Ona tali mai lea o le fafine, Na faasese mai le gata ia te au, ona ou ‘ai ai lea. Ona fetalai atu lea o Ieova le Atua i le gata,

¹⁴ E sili lou malaia i manu vaefa fanua uma, ma manu vaefa uma lava o le vao, ina ua e faia lena mea; e te sosolo i lou manava, o le efuefu e te ‘ai ai i aso uma o lou ola;

¹⁵ ou te faatupuina le feitagai ia te oulua ma le fafine, o lau fanau foi ma lana fanau; na te tu‘imomomoina lou ulu, a o oe e te tu‘imomomoina lona mulivae.

¹⁶ Ua fetalai atu o ia i le fafine, Ou te matuā faateleina le tiga o lou ma‘i to; e te fanau mai tama ma le tiga; e uai atu lou manao i lau tane, e pule foi o ia ia te oe.

¹⁷ Ua ia fetalai atu foi ia Atamu, Ua e usiusitai i le upu a lau avā, ma ua e ‘ai i le laau na ou fai atu ai ia te oe, na faapea atu, e aua e te ‘ai ai; o le mea lea ua malaia ai le laueleele ona o oe; e te ‘ai ai ma le tiga i aso uma o lou ola;

¹⁸ e tutupu mai ai o laau tuitui ma laau talatala ia te oe; e te ‘ai foi laau afu o le fanua;

¹⁹ e te ‘ai foi au mea e ‘ai ma le afu o ou mata, seia e toe foi atu i le eleele; auā na faiina a‘i lava oe; auā o le efuefu oe, e te toe foi atu lava i le efuefu.

²⁰ Ua faaigoaina e Atamu le igoa o lana avā o Eva; auā o le tinā o ia o tagata ola uma.

²¹ Ua faia foi ofu pa‘u e Ieova le Atua mo Atamu ma lana avā, ua faaofu ai ia te i laua.

²² Ua fetalai ane foi Ieova le Atua, Faauta, ua avea le tagata e pei o so tatou, ua iloa ai le lelei ma le leaga; o lenei, ne‘i aapa atu lona lima, ma tago atu foi i le laau o le ola, e ‘ai ai, ma ola e faavavau;

²³ ona tulia ai lea o ia e Ieova le Atua ai le faatoaga o Etena, ia galue i le eleele na faia mai ai o ia.

²⁴ Ua ia tuli atu lava ia Atamu; ua ia tofia foi kerupi e nonofo i le itu i sasae o le faatoaga o Etena, ma le pelu afi mumū, o loo feliuliuai e leoleo ai le ala i le laau o le ola.