Kenese 26 - O LE TUSI PAIA

O LE MATAUPU XXVI. Ua alu ifo Isaako i Kira. Ua toe foi mai i Peresepa.

¹ Na i ai foi le oge i le nuu, a e ese le uluai oge sa i ona po o Aperaamo. Ona alu ai lea o Isaako i Kira ia Apimeleko le tupu o tagata o Filisitia.

² Ua faaali mai Ieova ia te ia, ua faapea mai, Aua e te alu ifo i Aikupito, a ia e nofo i le nuu ou te fai atu ai ia te oe,

³ ia e nofo faaāumau i lenei nuu, ou te i ai foi ia te oe, ma ou faamanuia ia te oe, auā ou te foai atu ia te oe ma au fanau ia nuu uma lava; ou te faataunuuina foi le tautoga na a‘u tauto ai ia Aperaamo lou tamā;

⁴ ou te faatoateleina foi au fanau pei o fetu o le lagi, ma ou faoiina atu i au fanau ia nuu uma, o lau fanau foi e manuia ai nuu uma o le lalolagi;

⁵ auā na faalogo Aperaamo i a‘u upu, ma na tausi i a‘u sauniga, ma a‘u poloaiga, ma a‘u faatonuga, ma a‘u tulafono.

⁶ Ona nofo ai lea o Isaako i Kira;

⁷ ona fesili mai ai lea o tagata o le nuu i lana avā, ona fai atu ai lea o ia, O lo‘u tuafafine ia; auā na fefe ia e fai atu, O la‘u ava ia, sa faapea o ia, Ne‘i fasia a‘u e tagata o le nuu ona o Repeka; auā o ia ua lalelei.

⁸ Ua loa ona nofo ai o ia, ona vaai atu ai lea o Apimeleko le tupu o Filisitia i le faamalama, faauta foi, ua iloa, ua taaalo Isaako ma Repeka lana avā.

⁹ Ona valaau atu ai lea e Apimeleko ia Isaako, ua faapea atu. Faauta ea, o lau avā lava ia, pe se a foi le mea na e fai mai ai, O lo‘u tuafafine ia? Ona fai mai ai lea o Isaako ia te ia, Auā na a‘u faapea, Ne‘i ou oti ona o ia.

¹⁰ Ona faapea atu ai lea o Apimeleko, Se a lenei mea ua e faia ia te i matou? A na mao atu se tasi o le nuu i lau avā, po ua oo mai ia te i matou le agasala ona o oe.

¹¹ Ona fetalai atu ai lea o Apimeleko i le nuu uma, ua faapea atu, O se papai atu i lenei tagata po o lana avā e matuā oti lava ia.

¹² Ona luluina lea e Isaako o saito i lea nuu, na maua ai foi le taiselau i fua i lea tausaga; na faamanuia foi e Ieova ia te ia.

¹³ Ua tagata ola lenei tagata, ua tupu pea lava, ua atili ai ua oo ina matuā tagata ola lava ia;

¹⁴ auā sa ia te ia lafu mamoe, ma lafu povi, ma auauna e toatele; na mataua foi Filisitia ia te ia.

¹⁵ O vaieli uma foi na eli e auauna a lona tamā i ona po o Aperaamo lona tamā, na tatanu e Filisitia, ma faatutumu i eleele.

¹⁶ Ua fai atu foi Apimeleko ia Isaako, Ia e alu ese ia te i matou; auā ua sili lava oe ia te i matou.

¹⁷ Ona alu ese ai lea o Isaako, ua to lona fale ie i le vanu o Kira, ua nofo ai.

¹⁸ Ua toe eli foi e Isaako o vaieli na latou eli i ona po o Aperaamo lona tamā, auā na tatanu e Filisitia ina ua oti o Aperaamo; ua ia faaigoaina i igoa na faaigoa a‘i e lona tamā.

¹⁹ Ua eli auauna a Isaako i le vanu, ona maua ai lea o le vaipuna.

²⁰ Ona fefinauai ai lea o le leoleo manu a Kira ma leoleo manu a Isaako, ua faapea ane, O lo matou vai lea; ua ia faaigoa le vaieli, o Eseki, auā na latou fefinauai ma ia.

²¹ Ua latou toe eli le tasi vai, ona latou toe fefinauai ai lea; ua ia faaigoa ai o Setani.

²² Ua tuua e ia lea mea, ua eli le tasi vai; ua latou le fefinauai ai, ona ia faaigoa ai lea o Reopo, ua faapea ana, Auā ua faalauteleina nei e Ieova se mea e nonofo ai, tatou te uluola ai i le nuu.

²³ Ona ia alu ae ai lea ai lea mea i Peresepa.

²⁴ Ona faaali mai ai lea o Ieova ia te ia i lea lava po, ua faapea mai, O a‘u o le Atua o Aperaamo lou tama; aua e te fefe, auā ou te ia te oe, ou te faamanuia foi ia te oe, ma faatoateleina lau fanau, ona o la‘u auauna o Aperaamo.

²⁵ Ua ia fai ai le fata faitaulaga, ma valaau i le suafa o Ieova; ua ia to ai foi lona fale ie, ua eli ai foi e auauna a Isaako le vaieli.

²⁶ Ona alu atu ai lea ia te ia o Apimeleko mai Kira, o i latou ma Aasata o le tasi o ana uo, atoa ma Fikolu le alii e pule i ana ‘au.

²⁷ Ona fai ane ai lea o Isaako ia te i latou, Se a le mea ua outou o mai ai ia te au, auā ua outou ‘ino‘ino ia te au, ua outou tulia foi a‘u?

²⁸ Ona latou fai atu ai lea, Ua matou matuā iloa ua ia te oe Ieova, ona matou faapea ai lea, ia tatou faia nei le tautoga o i matou lava ma oe, ia tatou faia foi la tatou mavaega ma oe;

²⁹ e te le agaleaga mai lava ia te i matou, pai ona matou le tagofia oe, pei ona matou faia foi ia te oe na o le lelei, ma matou tuu atu ia te oe e alu ma le filemu; ua faamanuia nei oe e Ieova.

³⁰ Ua ia sauni se taumafataga mo i latou, ua latou aai ma inu.

³¹ Ua latou tulai i le taeao, ua tauto Ie tasi i le tasi, ona tuuina atu lea o i latou e Isaako, ona latou o ese ai lea ia te ia ma le filemu.

³² O lea lava aso ua o mai ai auauna a Isaako, ua ta‘u mai ai ia te ia i le vaieli na latou elia, ua faapea mai ia te ia, Ua matou maua le vai.

³³ Ua ia faaigoa ai o Sepa, o le mea lea ua igoa ai le aai o Peresepa, ua oo i lenei aso.

³⁴ Ua oo Esau i ona tausaga e fagafulu, ona fai avā ai lea ia Iutiti le afafine o Peeri, o le sa Hetī, ma Pasemeta le afafine o Aluna, o le sa Hetī.

³⁵ Ua fai i laua ma faatiga loto ia Isaako ma Repeka.