Kenese 15 - O LE TUSI PAIA

O LE MATAUPU XV. O mea ua toe folafolaina e le Atua ia Aperamo.

¹ Ua mavae ia mea, ona tŭlei mai lea o le afioga a Ieova ia Aperamo i le faaaliga, ua faapea mai, Aperamo e, aua e te fefe; o a‘u nei o lou talita, o lou taui e matuā tele lava.

² Ona tali atu lea o Aperamo, Le Alii e, Ieova, se a se mea e te foai mai ia te au, auā e leai sa‘u fanau, o le e ona le tofi i lo‘u aiga o Elisara lea le Tamaseko?

³ Ua faapea foi a Aperamo, Faauta, ua e le foai mai ia te au sa‘u fanau; faauta foi, e fai mo‘u suli le tagata ua fanau i lo‘u aiga.

⁴ Faauta foi, ua tŭlei mai le afioga a Ieova ia te ia, ua faapea mai, E le fai lea tagata mou suli; a o le e fanaua e oe lava e fai o ia mou suli.

⁵ Ua ia aumaia foi o ia i fafo, ma faapea atu, Ina e vaavaai ae ia i le lagi, ma e faitauina fetu, pe afai e mafaia ona e faitauina; ua ia faapea atu foi ia te ia, E faapea lava lau fanau.

⁶ Ua faatuatua foi o ia ia Ieova, ona ia ta‘uamiotonuina mai ai lea ia te ia.

⁷ Ua ia fetalai mai foi ia te ia, O a‘u o Ieova, o le na aumaia oe ai Uro i Kaletaia, ina ia foaiina atu ai ia te oe lenei lava nuu e fai mou tofi.

⁸ Ona tali atu lea a ia, Le Alii e, Ieova, se a se mea ou te iloa ai e fai mo‘u tofi lenei nuu?

⁹ Ona fetalai mai lea o ia ia te ia, Au mai ia ia te au se povi fafine ua tolu ona tausaga, ma se ‘oti fafine ua tolu ona tausaga, ma se mamoe poa ua tolu ona tausaga, ma se manutagi, ma se tamai lupe.

¹⁰ Ona avane lea e ia o ia mea uma, ua ia taiisiluaina i latou, ma tuu faafesagai taitasi le itu ma le tasi ona itu; a o manu felelei ua ia le isiluaina.

¹¹ Ua felelei ifo foi manu feai i tino o manu mamate, ona tutuli lea e Aperamo ia te i latou.

¹² Ua tāli goto le la, ona oo lea ia Aperamo o le moe gase; faauta foi, o le mata‘u o le pouliuli tele lava ua oo ia te ia.

¹³ Ona fetalai mai lea o ia ia Aperamo, Ia e iloa lelei e āumau lau fanau i le nuu ese, e nofo pologa foi i latou ia te i latou, e faatigaina foi i latou e i latou, o tausaga ia e fa selau;

¹⁴ o le nuu foi latou te nofo pologa ai ou te faasalaina; mulimuli ane latou te o mai ai ma le oloa tele.

¹⁵ A o oe, e te alu atu ma le filemu i ou tamā, e tauumia oe pe a e matuā toeaina lava.

¹⁶ A o lona fa o tupulaga latou te toe foi mai ai iinei; auā ua le atoatoa le agasala a sa Amorī i nei ona po.

¹⁷ Ua oo foi ina goto o le la, ma ua pouliuli, faauta foi, o le ogāumu ua alu ae ai le asu, ma le lamepa ua mu ua ui i le va o na mea sa vaeluaina.

¹⁸ O le aso lava lea na osi ai le feagaiga e Ieova ma Aperamo, ua faapea ane, Ua ou foaiina mo lau fanau lenei laueleele, e afua i le vaitafe o Aikupito e oo atu i le vaitafe tele, o le vaitafe o Eufirate lea;

¹⁹ o sa Kenī, ma sa Kinasā, ma sa Katemonī,

²⁰ ma sa Hetī, ma sa Perisē, ma sa Rafā,

²¹ o sa Amorī foi, ma sa Kananā, ma sa Kirekasē, ma sa Iepusē.