Kenese 11 - O LE TUSI PAIA

O LE MATAUPU XI. Ua faia Papelu; o le faauigaeseina o gagana; o gafa o tupuga.

¹ Sa tasi lava le gagana e tasi foi le tautala a le lalolagi uma.

² Ua oo foi iua latou o mai mai sasae, ona maua lea e i latou le fanua laugatasi i le nuu o Senara, ona latou mau ai lea.

³ Ona latou fetautalatalai lea o le tasi ma le tasi, Sau ia, ina tatoa faia ia o maaomea, ma matuā tunu ai i le afi. Ona fai loa o maaomea mo latou maa, ua fai foi le pulu emeri mo latou panisina.

⁴ Ona latou fai aue lea, O mai ia, ina tatou fai ia o se aai, ma se ‘olo, ia oo lona tumutumu i le lagi, ia tatou faia foi se mea e ta‘ua ai i tatou, ne‘i faataapeapeina, i tatou i le fogāeleele uma.

⁵ Ona afio ifo lea o Ieova e silasila i le aai ma le ‘olo ua faia e tagata.

⁶ Ona fetalai ane lea o Ieova, Faauta, ua tasi le nuu, e tasi foi le gagana ia te i latou uma; ua amata foi i latou ona fai o lenei mea; o lenei foi, e le toe taofia i latou i se mea e tasi ua latou manatu i ai e fai.

⁷ O mai ia, ina tatou o ifo ia, ma ia tatou faaeseeseina i lea mea a latou gagana, ina ia le lagona e le tasi i le gagana a le tasi.

⁸ Ona faataapeape lea e Ieova ia te i latou ai lea mea i le lalolagi uma; ona tuua lea e i latou ona faia o le aai.

⁹ O le mea lea ua igoa ai ia o Papelu; auā na faaeseeseina i lea mea e Ieova o le gagana a le lalolagi uma; na faataapeape foi e Ieova ia te i latou ai lea mea i le lalolagi uma.

¹⁰ O le gafa lenei o Semu; na ola Semu i tausaga e selau, ona fanaua lea e ia o Afasata i le lua o tausaga talu mai le lolo;

¹¹ ona ola lea o Semu talu ina fanauina e ia o Afasata i tausaga e lima selau, ma ua fanaua ai e ia o atalii ma afafine.

¹² Na ola Afasata i tausaga e tolugafulu ma le lima, ona fanaua lea e ia o Selaa;

¹³ ona ola lea o Afasata talu ina fanauina e ia o Selaa i tausaga e fa selau ma le tolu, ma ua fanaua ai e ia o atalii ma afafine.

¹⁴ Na ola Selaa i tausaga e tolugafulu, ona fanaua lea e ia o Eperu;

¹⁵ ona ola lea o Salaa talu ina fanauina e ia o Eperu i tausaga e fa selau ma le tolu, ma ua fanaua ai e ia o atalii ma afafine.

¹⁶ Na ola Eperu i tausaga e tolugafulu ma le fa, ona fanaua lea e ia o Peleko;

¹⁷ ona ola lea o Eperu talu ina fanauina e ia o Peleko i tausaga e fa selau ma le tolugafulu, ma ua fanaua ai e ia o atalii ma afafine.

¹⁸ Na ola Peleko i tausaga e tolugafulu, ona fanaua lea e ia o Reu;

¹⁹ ona ola lea o Peleko talu ina fanauina e ia o Reu i tausaga e lua selau ma le iya, ma ua fanaua ai e ia o atalii ma afafine.

²⁰ Na ola Reu i tausaga e tolugafulu ma le lua, ona fanaua lea e ia o Seruka;

²¹ ona ola lea o Reu talu ina fanauina e ia o Seruka i tausaga e lua selau ma le fitu, ma ua fanaua ai e ia o atalii ma afafine.

²² Na ola Seruka i tausaga e tolugafulu, ona fanaua lea e ia o Nakori;

²³ ona ola lea o Seruka talu ina fanauina e ia o Nakori i tausaga e lua selau, ma ua fanaua ai e ia o atalii ma afafine.

²⁴ Na ola Nakori i tausaga e lua sefulu ma le iva, ona fanaua lea e ia o Tara;

²⁵ ona ola lea o Nakori talu ina fanauina e ia o Tara i tausaga e selau ma le sefulu ma le iva, ma ua fanaua ai e ia o atalii ma afafine.

²⁶ Na ola Tara i tausaga e fitugafulu, ona fanaua lea e ia o Aperamo, ma Nakori, ma Arana.

²⁷ O gafa foi nei o Tara; na fanaua e Tara o Aperamo, o Nakori ma Arana; na fanaua foi e Arana o Lota.

²⁸ Ua oti foi Arana, a o nofo mai lona tama o Tara, i le nuu na fanau ai o ia, o Uro lea i Kaletaia.

²⁹ Ona fai avā lea o i laua o Aperamo ma Nakori; o le igoa o le avā a Aperamo o Sarai lea; a o le igoa o le avā a Nakori o Meleka, o le afafine o Arana, o le tamā o ia o Meleka, o le tamā foi o Iseka.

³⁰ O Sarai foi ua pa ia, ua leai sana tama.

³¹ Na ave foi e Tara lona atalii o Aperamo, ma Lota le atalii o Arana, o le atalii lea o lona atalii, o Sarai foi le avā a lona atalii, o le avā lea a lona atalii o Aperamo; ona latou o atu lea ma i latou ai Uro i Kaletaia, o le a o atu i le nuu o Kanana; ona latou oo lea i Karana ma nonofo ai.

³² O aso foi o Tara e lua selau ma le lima, o ona tausaga ia; ona oti lea o Tara i Karana.