Isaia 63 - O LE TUSI PAIA

O LE MATAUPU LXIII. Ua solipalaina e le Atua e ua ita i lona nuu.

¹ O ai ea lenei lē afio mai mai Etoma, ua afio mai mai Posara ma ofu mūmū; o le ua matagofie lona ofu; o lē afio mai i le tele o lona malosi? O a‘u lea, o lē tautala i le amiotonu, o le ua malosi e faaola.

² Se a le mea ua mūmū ai lou ofu ma ou ofu e pei o le ua soli i le soligāvine?

³ Ua ou solia toatasi le tuugāuaina, a o le nuu sa leai so latou e toatasi ia te au; na ou solia i latou i lo‘u ita, ma a‘u solia lava i latou i lo‘u tiga; na pisia o‘u ofu i o latou toto, ua leaga ai o‘u ofu uma.

⁴ Auā sa i lo‘u loto le aso e taui ai ma sui; ua oo foi i le tausaga o e ua faatauina e a‘u.

⁵ Na a‘u vaai, a ua leai se fesoasoani; na ou ofo lava ina ua leai se lagolago mai ia te au; ona faia lea e lo‘u lava lima le faaolataga ma a‘u; na lāgomia foi a‘u e lo‘u lava ita.

⁶ Na ou solia le nuu i lo‘u ita, na ou faaona ia te i latou i lo‘u tiga; na ou sasaaina foi o latou toto i le eleele.

⁷ Ou te vivii i le alofa o Ieova, o viiga o Ieova, e tusa ma mea uma ua foai mai e Ieova ia te i tatou, ma lona agalelei tele lava i le aiga o Isaraelu, ua na foai mai ia te i latou e tusa ma lona alofa mutimutivale, e tusa foi ma le tele o lona alofa.

⁸ Auā na fetalai o ia, O lo‘u lava nuu i latou; o le fanau e le pepelo; na fai foi o ia mo latou Faaola.

⁹ O latou puapuaga uma na le fai ai o ia mo latou fili; na faaolaina i latou e le agelu mai ona luma; na ia faatauina i latou i lona alofa ma lona agalelei; na ia siitia i latou ma ave ia i latou i aso uma anamua.

¹⁰ A o i latou, na latou fouvale, ma latou faatigaina lona Agaga Paia; ona liliu ai lea o ia ua toasa ia i latou, o ia lava na tau ma i latou.

¹¹ Na ia manatua aso anamua, o Mose ma lona nuu. O ifea le na faaae mai ia te i latou mai le sami, faatasi ma le leoleo a lona lafu mamoe? O ifea le na tuu lona Agaga Paia i totonu ia te ia?

¹² o le na ta‘ita‘i ia te i latou i le lima taumatau o Mose, ma lona aao mamalu, na vaea e ia le sami i o latou luma, ina ia faia mo ia le suafa e faavavau?

¹³ o le na ta‘ita‘i ia te i latou i mea loloto, e pei o le solofanua i le vao, na latou le tausuai.

¹⁴ E pei o le lafu manu ua alu ifo i le vanu, ua avane le malologa ia te i latou e le Agaga o Ieova; sa faapea ona e ta‘ita‘iina o lou nuu e fai mo oe le suafa mamalu.

¹⁵ Silasila mai ia mai le lagi, ma e silafia mai lou afioaga paia ma le matagofie. O ifea lou maelega ma lou malosi? o le tagi o lou alo ma lou alofa ia te au ua taofia ea ia?

¹⁶ Auā o oe lava lo matou Tamā; e ui lava ina le iloa o i matou e Aperaamo, ua le vaai mai foi Isaraelu ia te i matou, o oe Ieova o lo matou Tamā oe, o le na faatauina i matou; mai anamuā lava lou suafa.

¹⁷ Ieova e, se a le mea ua e faaseseina ai i matou i ou ala? ma e faamaaaina o matou loto ina ia le matatau ia te oe? Foi mai ia ona o au auauna, o itu aiga o lou tofi.

¹⁸ E itiiti ona aso na faia ai e lou nuu paia mo i latou; o e ita mai ia te i matou ua latou solia lou malumalu.

¹⁹ Ua fai i matou e pei o i latou na e le pule i ai talu anamua; e lei ta‘ua lou suafa i luga o i latou.