Isaia 61 - O LE TUSI PAIA

O LE MATAUPU LXI. O le manuia e maua mai le Mesia e lona nuu.

¹ Ua i o‘u luga le Agaga o le Alii o Ieova; auā ua faauuina a‘u e Ieova e tala‘i le tala lelei i e ua tigaina, ua ia auina mai a‘u e fufusi i e loto momomo, e tala‘i le saolotoga i le tafeaga, ma le matuā tatalaina o e ua fusifusia.

² E tala‘i le tausaga e talileleia mai ai e Ieova, ma le aso e taui ai ma sui e lo tatou Atua; e faamatalaloto i e faanoanoa uma lava;

³ e avatu le fiafia i e faanoanoa i Siona, e foaiina atu ia i latou le matagofie e sui a‘i le lefulefu, o le uu o le olioli e sui a‘i le faanoanoa, o le ofu e fai a‘i viiga e sui a‘i le loto faavaivai; e igoa i latou, O laau o le amiotonu, o le faatoaga a Ieova, e fai mona viiga.

⁴ Latou te atiina ae foi mea na faatafunaina mai le vavau; latou te faatuina mea na faatuufuaina anamua; latou te toe faia aai sa faatafunaina o mea sa tuufua i lea tupulaga ma lea tupulaga.

⁵ E tutū tagata ese ma latou leoleo i a outou lafu mamoe, o tagata o nuu ese e fai i latou ma a outou galuefanua ma a outou galuevine.

⁶ A o outou, e igoa outou, O faitaulaga a Ieova; e ta‘ua outou, O auauna a lo tatou Atua; tou te aai mea lelei a nuu ese, e fai foi ma outou o a latou oa.

⁷ E tailua ni mea e sui a‘i lo outou masiasi; latou te olioli foi i lo latou vaega e sui a‘i le mā; auā e fai mo latou tofi le tailua i lo latou nuu; e ia te i latou le olioli e faavavau.

⁸ Auā o a‘u o Ieova, ou te fiafia i le faamasinoga, ou te ‘ino‘ino i mea ua faoa faaletaupulea; ou te avatua lo latou taui ma le faamaoni; ou te osia le feagaiga e faavavau ma i latou.

⁹ E iloga la latou fanau i nuu ese, e iloga foi ē tutupu ia te i latou i totonu o nuu; e iloa i latou e i latou uma o e vaai i ai, o i latou lava o le fanau ua faamanuia e Ieova.

¹⁰ Ou te matuā fiafia ia Ieova, e olioli lo‘u loto i lo‘u Atua; auā ua na faaofuina a‘u i ofu o le olataga, ua na faapulupuluina a‘u i le ofu o le amiotonu; e pei o le faatoafaiavā ua pulou o ia pei se faitaulaga; e pei o le faatoanofotane foi ua teuteu o ia i ana teuga.

¹¹ Auā e pei ona faatupuina e le laueleele lona fua, e pei ona faatupuina foi e le faatoaga mea ua totō ai, e faapea lava ona faatupuina e le Alii o Ieova o le amiotonu ma le viiga i luma o nuu uma.