Isaia 54 - O LE TUSI PAIA

O LE MATAUPU LIV. O le manuia e maua e tagata o le Atua; o le a tupu tele le galuega a le Atua.

¹ Ia pese oe na le fafine pa sa le fanau; ia leo tele, ma ia alaga fiafia oe sa le faatiga, auā ua sili ona toatele o le fanau a le nofo fua, i le fanau a le nofo tane, ua fetalai mai ai Ieova.

² Ia faalautele le mea e tu ai lou fale ie; ia fālōina ie puipui o mea e te nofo ai; aua e te faaitiitia; ia faaumiumiina au maea, ma ia malolosi au fao;

³ auā e te osofia le tuapa i le itu taumatau ma le itu tauagavale; o lau fanau foi e fai mo latou tofi nuu ese, e āina foi e i latou o aai tuufua.

⁴ Aua e te fefe, auā e te le mā; aua foi e te masiasi, auā e le faamaina oe; auā e galo ia te oe lou mā ina o ē teine muli; e te le toe manatua foi lou luma ina o ē nofo fua.

⁵ Auā o le na faia oe o lau tane lea, o Ieova o ‘au o lona igoa lea; o le na faatauina oe, o le Paia o Isaraelu lea; e ta‘ua o ia, O le Atua o le lalolagi uma.

⁶ Auā ua valaau Ieova ia te oe, e pei o le avā ua lafoaiina, ma ua faanoanoa lona loto, o le avā foi sa nofo a o teine muli ina ua lafoaiina oe, ua fetalai mai ai lou Atua.

⁷ Ua se emo lava o le mata na ou lafoaiina ai oe, a o le alofa tele lava ou te faapotopotoina mai ai oe.

⁸ O le sasaaina atu o lo‘u ita na ‘alo ai o‘u mata ia te oe, ua se emo o le mata; a o le alofa e faavavau ou te alofa atu ai ia te oe, ua fetalai mai ai Ieova, o le na faatauina oe.

⁹ Auā e pei o le lolo ia Noa lenei mea ia te au; na ou tauto ai a‘u e le toe lofia le lalolagi i le lolo ia Noa; e faapea ona ou tauto, ou te le ita ia te oe, ou te le aoai atu foi ia te oe.

¹⁰ Auā e mavae atu o atu mauga, e luluina foi mauga; a o lo‘u alofa e le mavae atu lea nai ia te oe, ma la‘u feagaiga e manuia ai e le luluina lea, ua fetalai mai ai Ieova o lē alofa ia te oe.

¹¹ O oe na le ua tiga, ua afatia, ua le faamafanafanaina; faauta, ou te atiina ae au maa i mea e vali a‘i mata, ma ou faavaeina oe i safaira.

¹² Ou te faia ou matagi‘olo i maa mūmū, ma ou faitotoa i maa tioata, ma ou tuaoi uma i maa matagofie.

¹³ E a‘oa‘oina lau fanau uma lava e Ieova; e tele foi le manuia o lau fanau.

¹⁴ E faatumauina oe i le amiotonu; e mamao ma oe le sauaga, auā e te le fefe; e mamao foi ma le mata‘u, auā e le faalatalata mai lea ia te oe.

¹⁵ Faauta, latou te faapotopoto lava i latou, a e le ona o a‘u; o i latou uma o e faapotopoto e tau ma oe, e vavae mai i latou ia te oe.

¹⁶ Faauta, o a‘u ua ou faia lē fai mea uamea, o loo tapili i malala ola, ma gaosi ai auupega i lana galuega; o a‘u foi ua ou faia le na te faatafunaina, na te faaumatia.

¹⁷ O auupega uma e faia e tau ma oe e le manuia ia; o laulaufaiva uma e finau atu ia te oe i le faamasinoga e te faasalaina ia; o le tofi lena o auauna a Ieova, o a latou amiotonu foi mai ia te au lea, ua fetalai mai ai Ieova.