Isaia 46 - O LE TUSI PAIA

O LE MATAUPU XLVI. E faatauvaa tupua. Ia faatuatua ia Ieova.

¹ Ua punou Pele, ua ifo Nepo, ua i manu ma manu ave avega a latou tupua; o a outou avega ua faaeetia ia, o le avega lea i manu ua tigaina.

² Ua latou ifo, ua punonou faatasi, ua latou le mafai ona laveaiina o le avega; a o i latou lava, ua latou o i le tafeaga.

³ Faalogo mai ia ia te au, outou le aiga o Iakopo, ma outou uma o e ua totoe o le aiga o Isaraelu, o e ua tauave e a‘u talu ina fanau mai i le manava; ua siitia e a‘u talu ina fanau mai.

⁴ E oo ina e toeaina, o a‘u lava o ia, e oo foi ina ulusina, o a‘u lava ou te tauave ia te oe; o a‘u na ou faia, ou te siitia foi, ou te tauave, ma ou laveaiina oe.

⁵ Po o ai ea tou te faatusa i ai a‘u, pe faagatusa ma a‘u, pe faatatau ia te au ina ia ma tutusa?

⁶ Ua latou soona sasaa mai le auro mai le taga, ua latou fuatia le ario i le fua faatautau; ua latou avatu le oloa i lē fai mea uamea, na te faia se atua, latou te ifo faō i ai, latou te tapuai lava i ai.

⁷ Latou te siitia o ia i o latou tau‘au, ua latou amo ia te ia, ua latou tuuina o ia i lana mea e tuu ai, ona tu ai lea o ia, e le alu ese o ia ai lona tulaga; e alaga lava se tasi ia te ia, a e le tali mai o ia; na te le faaolaina o ia i lona puapuaga.

⁸ Ia outou manatunatu i lenei mea, ma ia outou amio i amio a tagata; ia mafaufau i ai outou o e solitulafono.

⁹ Ia outou manatunatu i mea muamua talu mai le vavau; auā o a‘u o le Atua, e leai lava se tasi; o le Atua, e leai se ma te tutusa;

¹⁰ o loo faaali talu mai le amataga o mea e mulimuli; mai anamua foi o mea ua le faia; o loo fai ane, E tu la‘u pule, ou te faia foi mea uma ou te loto i ai.

¹¹ O loo valaau i le manu lele e feai mai sasae; o le tagata mai le nuu mamao ua ou tofia; na ou fai atu ai, ou te faaooina ai lava; na ou fuafuatia, ou te faia lava.

¹² Faalogo mai ia, outou o e loto faafinauvale, o e ua mamao ma se amiotonu.

¹³ Ua ou aumaia la‘u amiotonu, e le mamao ia; e le faatuai foi la‘u faaolataga; ou te avatu la‘u faaolataga i Siona mo Isaraelu o le e viia ai a‘u.