Isaia 43 - O LE TUSI PAIA

O LE MATAUPU XLIII. O upu faamafanafana a le Atua i lona nuu.

¹ A o lenei, o loo faapea ona fetalai mai o Ieova, o le na faia oe, Iakopo e, ma na faia oe, Isaraelu e; aua le fefe, auā ua ou faatauina oe, ua ou valaauina oe i lou lava igoa; e faia oe mo‘u.

² A ē sopoia atu le vai, ou te ia te oe; a ē sopoia atu vaitafe, e le lofia ai oe; a ē savali i totonu o le afi, e le mu ai oe; e le susunuina foi oe i le mumū o le afi.

³ Auā o a‘u o Ieova lou Atua, o le Paia o Isaraelu, lou Faaola; na a‘u avatua Aikupito e fai mou togiola, o Aitiope ma Sepa e sui a‘i oe.

⁴ Auā na faapelepeleina oe e a‘u, ua ou faamamaluina ai oe; auā foi na ou alofa ia te oe, o le mea lea ou te avatu ai tagata e sui a‘i oe, ma nuu e sui a‘i lou ola.

⁵ Aua le fefe, auā ou te ia te oe; ou te aumaia lau fanau mai sasae; ou te faapotopotoina foi outou mai sisifo.

⁶ Ou te fai atu i le itu i matu, tuu mai ia; ma le itu i toga, Aua le toafia; au mai ia o‘u atalii ai mea mamao, ma o‘u afafine ai le tuluiga o le lalolagi;

⁷ o i latou uma ua igoa i lo‘u igoa, na ou faia ia viia ai a‘u; na a‘u gaosia ma ou faia lava i latou.

⁸ Ta‘ita‘i mai ia le nuu tauaso, ua i ai o latou mata; ma e tutuli, ua i ai o latou taliga.

⁹ Ia faapotopotoina nuu ese uma faatasi, ma ia aofia nuu uma. O ai ea so latou na te faaalia mai lenei mea, pe faailoa mai ia te i tatou mea muamua? Se‘i latou tuu mai ia a latou molimau, ina ia ta‘uamiotonuina i latou; pe faalogo mai i latou, ma latou fai mai, E moni.

¹⁰ Ua fetalai mai Ieova, O outou o a‘u molimau, ma la‘u auauna o le na a‘u filifilia; ina ia outou iloa, ma ia outou faatuatua mai ia te au, ma ia outou lagona, o a‘u lava o ia; e leai se atua na gaosia e muamua ia te au; e leai foi se tasi e mulimuli ia te au.

¹¹ O a‘u o a‘u lava o Ieova; a e leai se faaola ua na.

¹² O a‘u lava, na ou faaali atu, ma ou faaolaina, ma ou faailoa atu, sa leai foi ia te outou se atua ese; o outou foi o a‘u molimau, o a‘u lava o le Atua, ua fetalai mai ai Ieova.

¹³ A o leai lava ni aso, o a‘u lava o ia; e leai foi se na te laveaiina nai lo‘u lima; ou te faia, a o ai se na te faaleaogaina?

¹⁴ O loo faapea ona fetalai mai o Ieova, o le na faatauina outou, o le Paia o Isaraelu; ona o outou ua ou aauina atu nisi i Papelonia, ma a‘u aveina ifo le solaaga, o i latou uma, lava, atoa ma Kaletaia, o loo alalaga i latou i vaa.

¹⁵ O a‘u o Ieova, o lo outou Alii Paia; o le na faia Isaraelu, o lo outou Tupu.

¹⁶ O loo faapea ona fetalai mai o Ieova, o le na faia le ala i le sami, ma le magaala i le sami sousou tele.

¹⁷ O lē aumaia le kariota ma le solofanua, o ‘au, ma e fitafita; ua latou taooto faatasi; ua latou le toe tulai, ua tineia i latou, ua pepē e pei o le vavae o le lamepa.

¹⁸ Aua tou te manatua mea na muamua, aua foi le mafaufau i mea anamua.

¹⁹ Faauta, ou te faia se mea e faatoa iloa, e tupu ae nei lava; tou te le iloa ea? E moni, ou te faia se ala i le vao lafulafua, ma vaitafe i le nuu naumati.

²⁰ E viia a‘u e manu o le vao, o luko ma iaena; auā ou te avatu vai i le vao lafulafua, o vaitafe i le nuu naumati; e feinu ai lo‘u nuu ua ou filifilia.

²¹ O le nuu lenei na a‘u faia mo a‘u; latou te ta‘uatua lo‘u viiga.

²² A ua e le valaau mai ia te au, o oe Iakopo e; auā ua e musu ia te au, o oe Isaraelu e.

²³ Ua e le aumaia ia te au o mamoe o au taulaga mu; ua e le viia foi a‘u i au taulaga; ua le mafatia oe e a‘u i taulaga i mea e ‘ai ua ou le faatigaina foi oe i le pulu lipano.

²⁴ Ua e le faatau mo a‘u ni kani i tupe; ua le au mai ia te au le ga‘o o au taulaga ia a‘u mălie ai; a e peitai ua mafatia a‘u e oe i au agasala, ua faatigaina a‘u i au amio leaga.

²⁵ O a‘u, o a‘u lava lē sōloiesea au solitulafoni, ona o a‘u lava; o au agasala foi ou te le manatua ia.

²⁶ Ia faamanatu mai ia te au, ia ta fefaamasinoai; ta‘u mai ia oe, ina ia ta‘uamiotonuina ai oe.

²⁷ O lou tamā e sili, ua agasala ia; ma ou a‘oa‘o ua latou foua a‘u;

²⁸ o le mea lea ua gafua ai ia te au alii o le malumalu; ua ou tuuina foi Iakopo ia faafanoina, ma Isaraelu ia faalumaina.