Isaia 39 - O LE TUSI PAIA

O LE MATAUPU XXXIX O le feau a le tupu o Papelonia ia Esekia, ma le sese o Esekia.

¹ O ona po ia na aauina ai e Merota-palata le atalii o Palata, le tupu o Papelonia, nisi e au mai tusi ma le mea alofa ia Esekia; auā na ia faalogo, na ma‘i o ia, a ua malolo.

² Ua fiafia Esekia ia te i latou, ua faaali atu foi ia te i latou le fale o lana oloa, o ario, ma auro, ma mea manogi ma le uu lelei, atoa ma le fale uma o lana auupega, ma mea uma sa i ana mea e teu ai oloa; e leai lava se mea i lona fale ma lona nuu uma e lei faaali atu ai e Esekia ia te i latou.

³ Ona sau ai lea o Isaia le perofeta i le tupu o Esekia, ua faapea mai ia te ia, Pe se a na fai mai ai ia tagata? O fea foi na latou o mai ai ia te oe? Ona tali atu ai lea o Esekia, O le nuu mamao na latou o mai ai ia te au, o Papelonia lava.

⁴ Ona fai mai ai lea o ia, Pe ni a mea ua latou iloa i lou fale? Ona tali atu ai lea o Esekia, Na latou maimoa i mea uma o i lo‘u fale, e leai se mea i a‘u mea e teu ai oloa ou te lei faaali atu ai ia te i latou.

⁵ Ona fai mai ai lea o Isaia ia Esekia, Faafofoga mai ia i le afioga a Ieova o ‘au,

⁶ Faauta, e oo mai ona aso e aveina atu ai i Papelonia o mea uma o i lou fale, atoa ma mea ua faaputuina e ou tamā ua oo mai i le aso nei; e le toe ai se mea e tasi, ua fetalai mai ai Ieova.

⁷ Latou te ave foi nisi o ou atalii e tutupu mai ia te oe, e fanaua e oe, e avea foi i latou ma eunuka i le fale o le tupu o Papelonia.

⁸ Ona fai atu ai lea o Esekia ia Isaia, Ua lelei le afioga a Ieova ua e fai mai ai na; ua fai atu foi o ia, Auā e i ai le manuia ma le faamaoni i lo‘u olaga.