Isaia 25 - O LE TUSI PAIA

O LE MATAUPU XXV. O viiga i le Atua; o le manuia i ona po o le Mesia.

¹ Ieova e, o lo‘u Atua lava oe; ou te faaneenee ia te oe; ou te vivii atu i lou suafa; auā ua e faia mea e ofo ai; o mea na e pule ai talu anamua e faamaoni ia, e moni lava;

² auā ua e faia le aai ma faupuega maa; o le aai nofo ‘olo ua e lepetia; ua e faia le maota o tagata ese ia leai se aai; e le toe faia lava e faavavau;

³ o le mea lea e vivii atu ai ia te oe le nuu malosi; e matatau ia te oe le aai o nuu ese e matautia;

⁴ auā o oe e malosi ai le ua vaivai, e malosi ai le ua mativa i lona puapuaga, o le malu i le afā, o le paolo i le vevela, pe a oo mai le ita o e o matautia e pei o se afā i le pa.

⁵ E pei o le vevela i le nuu naumati, e te faamaulaloina le taalili o tagata ese; e pei o le vevela i le paolo o le ao, e faamaulaloina lava le pese a tagata matautia.

⁶ E faia e Ieova o ‘au i lenei mauga mo nuu uma le faigaai o mea lelei, o le tausamiga o uaina ua tuu ai ‘alu; o mea e silisili ona lelei, o uaina ua faamaninoina sa tuu ai ‘alu.

⁷ E faaumatia foi e ia i lenei mauga le ie ufiufi, o loo ufitia a‘i nuu uma, ma le ufiufi ua ufitia a‘i nuu ese uma lava.

⁸ E faaumatia e ia le oti e faavavau; e soloiesea foi e le Alii o Ieova o loimata i mata uma lava; e faateaeseina foi e ia le gao o lona nuu i le lalolagi uma lava; auā ua fetalai mai ai Ieova.

⁹ O lea aso e faapea ai, Faauta, o lo tatou Atua lenei; sa tatou faatalitali ia te ia, ua ia faaolaina foi i tatou; o Ieova lava lenei, sa tatou faatalitali ia te ia; tatou te fiafia ma olioli i lana faaolataga.

¹⁰ Auā e tumau le aao o Ieova i lenei mauga; e solia foi Moapi i lona lava nuu, e pei ona solia o ‘au o saito i le faaputuga nasu.

¹¹ E faaloloa foi e ia ona aao i totonu ia te i latou, e pei ona faaloloa lima o le tagata e aau ina ua aau; na te faamaulaloina lo latou faamaualuluga, atoa ma togafiti o latou lima.

¹² Na te lafotuina le ‘olo maualuga o ou pa, na te faamaulaloina, na te faagatasia ma le eleele, e oo lava i le efuefu.