Isaia 21 - O LE TUSI PAIA

O LE MATAUPU XXI. O le malaia o Papelonia ma Arapi.

¹ O le avega a le vao o le sami. E ui ane e pei o asiosio i le itu i toga, e sau lava mai le vao, mai le nuu matautia.

² O le faaaliga faigata ua faaalia mai ia te au, o le ua saua o loo faasaua, o le ua faatafuna o loo faatafuna; Elama e, ina alu ae ia; Metai e, ina vagaia ia le ‘olo; ua ou faaiuina mapuitiga uma.

³ O le mea lea ua matuā tiga ai lo‘u tua, ua maua a‘u i le tiga e pei o le faatiga o le fafine a fanau; ua tigaina a‘u, e le mafai ona faalogo atu; ua ou soona atuatuvale, e le mafai ona vaai.

⁴ Ua polepole vale lo‘u loto; ua osofia a‘u i le mata‘u; o le po na ou olioli ai ua faia lea e ia ma mea e matautuia ai a‘u.

⁵ Ua laulau atu mea i le laoai; ua tofia le matāmoe; o loo aai, o loo inu; alii e, tutū ia i luga, ina faauu ia le talita.

⁶ Auā ua faapea ona fetalai mai o le Alii ia te au, Alu ia, ina e tofia se tagata e vaai, o le mea na te iloa, ia te faaali ane.

⁷ Ona iloa lea e ia o ‘au e ō taitoalua, e tietie i solofanua, o ‘au e tietie i asini, ma ‘au e tietie i kamela; ona matuā faalogologo ai lava lea o ia.

⁸ Ona alaga lea o ia e pei o le leona, Le alii e, ou te tu a‘u nei i le olo e leoleo ai e le aunoa i le ao; ou te tu foi a‘u i le mea ou te matāmoe ai i po uma lava.

⁹ Faauta foi, o loo o mai ‘au e ō taitoalua e tietie i solofanua. Ona toe fai mai ai lea o ia, Ua paū, ua paū Papelonia; o tupua uma foi a ona atua ua ia tu‘ipalaina i le eleele.

¹⁰ La‘u sasaga e, ma le saito o i la‘u mea e sasa ai saito; o mea ua ou faalogologo ai ia Ieova o ‘au o le Atua o Isaraelu, ua ou faaali atu ai ia te outou.

¹¹ O le avega a Tuma. Na valaau mai le tasi ia te au mai Seira, Le leoleo e, po ua a ea le po? Le leoleo e, po ua a ea le po?

¹² Ua fai atu le leoleo, O loo sau le taeao, atoa foi ma le po; afai tou te fesili, ina fesili ia; ia outou liliu ia, ina o mai ia.

¹³ O le avega a Arapi. O le vao o Arapi tou te momoe ai outou malaga a Titana.

¹⁴ O e nonofo i le nuu o Tema ua latou avatu le vai e faafetaiai i e ua fia inu, ua latou fonofono ma mea e ‘ai i e ua sosola mai.

¹⁵ Auā ua latou sosola ese i pelu, o le pelu foi ua toina, ma le aufana ua lolou, atoa ma le taua ua faigata.

¹⁶ Auā o loo faapea ona fetalai mai o le Alii ia te au, Toe tasi le tausaga, e tusa ma tausaga o le ua galue i le totogi, ona faaumatia ai lea o le mamalu uma o Kitara.

¹⁷ O e ua totoe o e fai aufana, o tagata totoa o Kitara e faatoaitiitia i latou; auā ua fetalai mai ai Ieova le Atua o Isaraelu.