Isaia 2 - O LE TUSI PAIA

O LE MATAUPU II. O le valoaga i le malo o le Mesia.

¹ O le mea na vaaia e Isaia le atalii o Amota ia Iuta ma Ierusalema.

² O aso e gata ai, e oo ina faatumauina ai o le mauga o i ai le fale o Ieova i tumutumu o atu mauga, e faamaualugaina foi e sili i mauga, ona gasolo ane ai lea o nuu uma i ai.

³ E o mai lava nuu e tele, ma latou faapea ane, O mai ia, tatou o ae ia i le mauga o Ieova, o le fale o le Atua o Iakopo; e a‘oa‘o mai foi o ia ia te i tatou ona ala, ona tatou savavali ai lea i ona ala; auā e alu atu le tulafono ai Siona, o le afioga foi a Ieova ai Ierusalema.

⁴ E faamasino foi o ia i nuu ese, ma aoai atu i nuu e tele; ona latou tu‘i ai lea i a latou pelu e fai ma uamea o suotosina, o latou tao foi e fai ma polo e teu a‘i vine; e le sii atu le pelu e le tasi nuu i le tasi nuu, latou te le toe a‘oa‘o foi i taua.

⁵ Le aiga o Iakopo e, o mai ia ina tatou savavali i le malamalama o Ieova.

⁶ Ua e lafoaiina lava lou nuu le aiga o Iakopo, auā ua tumu i latou i mea mai sasae, ma latou itea ao o le lagi faapei o Filisitia, ua latou osi feagaiga foi ma le fanau a tagata ese.

⁷ Ua tumu foi lo latou nuu i airo ma auro, e le masino foi o latou oloa. Ua tumu foi lo latou nuu i solofanua, e le masino lava o latou kariota.

⁸ Ua tumu foi lo latou nuu i tupua; ua latou ifo i galuega a o latou lima, o mea lava na faia i o latou tamatamai lima.

⁹ Ua lafotuina le tagata nuu, ua faamaulalo foi le alii; e te le faamagaloina foi i latou.

¹⁰ Alu ia i totonu o le papa, ina lafi ia i le eleele, ona o le matautia o Ieova, ma lona mamalu silisili.

¹¹ E faamaulaloina mata faasiasia o tagata nuu; e faamaulaloina foi le faamaualuga o alii; na o Ieova lava e viia i lea aso.

¹² Auā o le aso o Ieova o ‘au, e oo atu lea i e faasiasia ma e faamaualuga uma lava, atoa foi ma e o faafefeteina uma; ona faamaulaloina ai lea.

¹³ E oo i arasi uma ua uumi ma le maualuluga o Lepanona; e oo foi i aluna uma o Vasana;

¹⁴ e oo i atu mauga maualuluga uma; e oo foi i mauga tetele uma;

¹⁵ e oo i ‘olo maualuluga uma; e oo foi i pa uma e le aea;

¹⁶ e oo i vaa uma o Tasesa; e oo foi i mea matagofie uma.

¹⁷ E faamaulaloina lava le faasiasia o tagata nuu; e faamaulaloina foi le faamaualuga o alii; na o Ieova lava i viia i lea aso.

¹⁸ E matuā mavae lava tupua.

¹⁹ Latou te ulu atu foi i ana o papa, ma lua o le eleele, ona o le matautia o Ieova ma lona mamalu silisili, pe a tulai o ia e luluina le laueleele.

²⁰ O lea aso e lafoai atu ai e tagata a latou tupua ario ma a latou tupua auro, na latou faia mo i latou e ifo i ai, e lafoaiina lava i afora ma pe‘a.

²¹ Ina ia latou o atu i mavaevae o papa, atoa ma va i papa, ona o le matautia o Ieova ma lona mamalu silisili, pe a tulai o ia e luluina le laueleele.

²² O outou na, soia le faatuatua i tagata, o i ai lona mānava i ona pogaiisu; auā se a le mea e manatua ai o ia?