Isaia 17 - O LE TUSI PAIA

O LE MATAUPU XVII O le malaia o Tamaseko.

¹ O le avega a Tamaseko. Faauta ua aveeseina Tamaseko, e le fai ma aai; e avea ma faupuegāfale ua pauu.

² E tuulafoaiina aai o Aroeru; e fai mo lafu manu, latou te taooto ai, e leai foi se faamatau i ai.

³ E faaumatia le ‘olo i Efaraima, ma le malo i Tamaseko, atoa ma e o totoe o nuu o Suria; e pei o le mamalu o le fanauga a Isaraelu e faapea lava i latou, o loo fetalai mai ai o Ieova o ‘au.

⁴ O lea aso foi e faaitiitia ai le mamalu o Iakopo, e tino vale foi o ia sa puta.

⁵ E avea ai foi e faapei ona ao o saito o tu e le ua selesele, na te selesele foi ‘au saito i lona lima; e avea lava e faapei o lē ao ‘au saito i le vanu o sa Rafā.

⁶ E totoe foi i ai nai toe fuifui vine, e faapei ona sasaina ifo o olive e lua pe tolu nai fua i le tumutumu o le laau; e fa pe lima i la laau e fua; o loo fetalai mai ai Ieova le Atua o Isaraelu.

⁷ O lea aso e faasaga atu ai le tagata i Le na faia o ia, e vaavaai atu foi ona mata i le Paia o Isaraelu.

⁸ E le faasaga atu o ia i fata faitaulaga, o mea na faia e ona lima; e le vaavaai foi o ia i mea na faia e ona tamatamai lima, o tupua o Asaira ma tupua o le la.

⁹ O lea aso e avea ai ana aai nofo ‘olo e pei o se mea ua tuua o le vao matua ma le tumutumu o le laau, sa latou tuua i luma o le fanauga a Isaraelu, e avea foi ma mea e faatafunaina.

¹⁰ Auā ua galo ia te oe le Atua o lou olataga, ua e le manatua foi le papa e te malosi ai; o le mea lea e te totō ai laau matagofie, ma e totō ai se laau mai le nuu ese;

¹¹ o le aso e te totō ai e te sio ai i le āi, o le taeao foi e te faatupuina lau fua ia olaola; a e sola le fuata i le aso na fai a maua mai ai, e i ai le tiga e tele lava.

¹² Aue! le vāvāō o nuu e tele; ua latou vāvāō e pei o le taalili o le sami; o le u foi o nuu, ua latou u e pei o le u o vai tetele.

¹³ Ua u nuu e pei ona u o vai tetele, a e aoai o ia ia te i latou, ona sosola mamao ai lea; e tulieseina foi i latou e pei ona lelea o le aputi o saito i mauga i le matagi, e pei o le mea taavalevale foi i le asiosio.

¹⁴ A oo i le afiafi, faauta, o le mata‘u; a o lei oo i le taeao, ua leai lava i latou. O le tofi lea o e ua faasaua mai ia te i tatou, o le tofi foi o e ua vete a tatou mea.