Iosua 4 - O LE TUSI PAIA

O LE MATAUPU IV. O le sopoia atu o Ioritana e Isaraelu.

¹ Ua uma ona sopoia atu o Ioritana e le nuu uma, ona fetalai mai ai lea o Ieova ia Iosua, ua faapea mai,

² Ina fa‘ifa‘i mai ia ni o outou tagata e toatinoagafulu ma le toalua, o le itu aiga ma le tagata e toatasi;

³ ia outou fai atu foi ia te i latou, ia faapea atu, Ia outou avae maa e sefulu ma le lua ai lenei mea i totonu o Ioritana, o le mea sa tutumau ai vae o faitaulaga; ma ia outou avatu ai, ma tuu ai i le mea e momoe ai, tou te momoe ai i le po nanei.

⁴ Ona valaau atu ai lea o Iosua i tagata e toasefulu ma le toalua na tofia e ia ai le fanauga a Isaraelu, taitasi le itu aiga ma le tagata e toatasi.

⁵ Ua fai atu foi Iosua ia te i latou, Ia outou ui atu i luma o le atolaau a Ieova, lo outou Atua, i totonu o Ioritana, ma ia outou taitasi ma sii ae se maa i lona ua, e tusa ma le faitau o itu aiga o le fanauga a Isaraelu;

⁶ ina ia faia lenei mea ma faailoga ia te outou, pe a fesili mai a outou fanau i se aso, e faapea mai, Pe se a ea le uiga o na maa ia te outou?

⁷ Ona outou tali atu ai lea ia te i latou, Na vavaeina le vai o Ioritana i luma o le atolaau o le feagaiga a Ieova, na ui atu ai i Ioritana, ona vavaeina ai lea o le vai o Ioritana. E faia foi na maa ma faamanatuga i le fanauga a Isaraelu e faavavau.

⁸ Ua faapea ona faia e le fanauga a Isaraelu e pei ona fai atu ai o Iosua; ua latou avae maa e sefulu ma le lua ai totonu o Ioritana, e pei ona fetalai mai ai o Ieova ia Iosua, e tusa ma le faitau o itu aiga o le fanauga a Isaraelu, ma latou avatu ai i le mea na momoe ai, ma tuu ai i lea mea.

⁹ Ua faatuina foi e Iosua o maa e sefulu ma le lua i totonu o Ioritana, i le mea na tutū ai vae o faitaulaga o e na ave le atolaau o le feagaiga; o i ai foi i lea mea ua oo i le aso nei.

¹⁰ Ua tutū i totonu o Ioritana o faitaulaga o e na ave le atolaau, seia uma ona fai o mea uma na fetalai mai ai Ieova ia Iosua e fai atu ai i le nuu, e pei o mea uma na poloai mai ai Mose ia Iosua: ona faataalise ai lea o le nuu, ma latou sopoia atu ai.

¹¹ Ua uma ona sopoia atu e le nuu uma, ona ui atu ai lea o le atolaau a Ieova ma faitaulaga i luma o le nuu.

¹² Na sopoia atu le fanauga a Reupena, ma le fanauga a Kato, ma le tasi vaega o le itu aiga o Manase, o sauni i le taua, i luma o le fanauga a Isaraelu, e pei ona fai mai ai o Mose ia te i latou;

¹³ pe fa sefulu o afe o i latou o sauni i le taua, na ui atu ai i luma o Ieova, e tau ai le taua i le eleele laugatasi o Ieriko.

¹⁴ O le aso lea na faatupuina ai e Ieova le mamalu o Iosua i luma o Isaraelu uma; na latou matatau ia te ia, e pei ona latou matatau ia Mose, i aso uma o lona ola.

¹⁵ Ua fetalai mai foi Ieova ia Iosua, ua faapea mai,

¹⁶ Ia e fai atu i faitaulaga o e ave le atolaau o le tulafono, ia latou o ae i Ioritana.

¹⁷ Ona fai atu ai lea o Iosua i faitaulaga, ua faapea atu, O ae ia outou i Ioritana.

¹⁸ Ona o ae ai lea o faitaulaga o e na ave le atolaau o le feagaiga a Ieova nai totonu o Ioritana, ma ua tutū ae alofivae o faitaulaga i le laueleele matutu; ona toe tafe mai ai lea o le vai o Ioritana i lona ala vai, ua lofia foi ona auvai uma lava, e pei o anamua.

¹⁹ Na o ae le nuu nai Ioritana i le aso e sefulu o le masina muamua, ma latou to lauapi i Kilikala i le tuaoi i sasae o Ieriko.

²⁰ Ona faatuina lea e Iosua i Kilikala o na maa e sefulu ma le lua na latou avae i Ioritana.

²¹ Ua ia fai atu foi i le fanauga a Isaraelu, ua faapea atu, A fesili mai i se aso a outou fanau i o latou tamā, e faapea mai, Pe se a le uiga o na maa?

²² Ona outou faailoa atu ai lea i a outou fanau, ia faapea atu, Na sopoia mai Ioritana nei, e Isaraelu i le iliti vai matutu;

²³ auā na faamateina e Ieova lo outou Atua le vai o Ioritana i o outou luma, ina seia tou sopoia atu, e pei ona faia e Ieova lo outou Atua i le sami Ulaula, na ia faamateina i o tatou luma ina seia tatou sopoia atu:

²⁴ ina ia iloa e nuu uma o le lalolagi e malosi le aao o Ieova: ina ia outou matatau ia Ieova lo outou Atua i aso uma lava.