Iosua 23 - O LE TUSI PAIA

O LE MATAUPU XXIII. O upu faamafanafana a Iosua.

¹ Ua mavae aso e tele talu ona avatua e Ieova le mapusaga mo Isaraelu, i e ita mai uma e vagavagai; ua toeaina foi Iosua, ua tele ona tausaga;

² ona feauina atu ai lea e Iosua o Isaraelu uma, o latou toeaina, ma o latou alii sili, ma o latou faamasino, ma o latou faipule, ua ia fai atu ia te i latou, Ua toeaina lava a‘u, ua tele o‘u tausaga;

³ a o outou, ua iloa e outou o mea uma ua faia e Ieova lo outou Atua i ia nuu uma ona o outou; auā o Ieova o lo outou Atua o ia na tau ai le taua mo outou.

⁴ Faauta, ua ou vaevaeina ia te outou o ia nuu o totoe e fai ma tofi mo o outou itu aiga, e afua mai i Ioritana, ma nuu uma ua ou faaumatia, e oo atu i le sami tele i le mea e goto ai le la.

⁵ O Ieova foi o lo outou Atua, o ia lava na te teteeina i latou i o outou luma, ma tutuli ia te i latou i o outou luma, e fai mo outou o lo latou laueleele, e pei ona fetalai mai ai Ieova o lo outou Atua ia te outou.

⁶ A ia outou matuā faamalosi e anaana e fai o mea uma ua tusia i le tusi o le tulafono a Mose, ina ne‘i outou o ese i le itu taumatau po o le itu tauagavale;

⁷ ina ne‘i faatasi outou ma ia nuu, o i latou o e totoe ia te outou; aua foi le ta‘uta‘u e outou le igoa o latou atua, aua le tauto i ai, aua le auauna atu ia te i latou, aua foi tou te ifo atu ia te i latou;

⁸ a ia outou pipii atu ia Ieova lo outou Atua, e pei ona outou faia, ua oo i le aso nei,

⁹ Auā ua tulia e Ieova i o outou luma o nuu tetele ma le malolosi; a o outou, e lei tu se tasi i o outou luma e tetee atu ia te outou, ua oo i le aso nei.

¹⁰ E tulia le toaafe e le toatasi o outou; auā o Ieova lo outou Atua, o ia e tau ai le taua mo outou, e pei ona fetalai mai ai o ia ia te outou.

¹¹ Ia outou matuā faaeteete ia te outou, ina ia alolofa atu ia Ieova lo outou Atua.

¹² Auā afai tou te toe foi i tua, ma outou pipii atu i e o totoe o ia nuu, o i latou o e totoe ia te outou, ma feavagai ma i latou, ma outou o atu ia te i latou, ma latou o mai ia te outou;

¹³ ia outou matuā iloa e le toe tulia e Ieova lo outou Atua se isi o ia nuu i o outou luma; a e fai i latou ma mailei, ma matasele ia te outou, ma sasa i o outou itu, ma mea matuitui i o outou mata, seia faaumatia outou ai lenei nuu lelei ua foaiina atu e Ieova lo outou Atua ia te outou.

¹⁴ Faauta mai foi, o a‘u nei, o le a ou alu i le aso nei i le ala o le lalolagi uma; a ua outou iloa ma o outou loto atoa, ma o outou agaga atoa, e lei iuvale se upu e tasi i upu lelei uma na fetalai mai ai Ieova lo outou Atua ia te outou; ua taunuu uma ia te outou, ua le iuvale se upu e tasi.

¹⁵ O lenei, e pei ona taunuu ia te outou o upu lelei uma na fetalai mai ai Ieova lo outou Atua ia te outou, e faapea foi ona faataunuu e Ieova o mea leaga uma ia te outou, seia faaumatia outou e ia ai lenei nuu lelei ua foaiina mai e Ieova lo outou Atua ia te outou;

¹⁶ a solia e outou le feagaiga a Ieova lo outou Atua na fetalai mai o ia ia te outou, ma outou o ma auauna i atua ese, ma outou ifo atu ia te i latou; ona tupu ai lea o le toasa o Ieova ia te outou, e vave ona faaumatia outou ai le nuu lelei ua na foai mai ia te outou.