Iosua 13 - O LE TUSI PAIA

O LE MATAUPU XIII. O tuaoi o fanua.

¹ Ua toeaina lava o Iosua, ua tele ona tausaga; ona fetalai mai lea o Ieova ia te ia, Ua e toeaina lava, ua tele ou tausaga; e matuā tele foi le laueleele o totoe e fai mo outou.

² O le laueleele lenei o totoe; o le itu uma o Filisitia, ma Kasuri uma, e afua mai i Seora,

³ e feagai ma Aikupito, a e oo atu i le tuaoi o Ekerona i le itu i matu, ua ta‘ua ia o sa Kananā; o alii e toalima o Filisitia; o tagata o Kasa, ma tagata o Asetota, o tagata o Asekelona, o tagata o Kata, ma tagata o Ekerona, ma tagata o Gavi;

⁴ e afua mai i le itu i toga, o le nuu uma o sa Kananā, ma Meara o i sa Saitonū, e oo atu i Afeka, e oo i le tuaoi o sa Amorī;

⁵ o le nuu foi o tagata o Kivali, ma Lepanona uma i le itu e alu ae ai le la, e afua mai i Paalakato o i lalo o le mauga o Heremone, e oo i le mea e ui atu ai i Amato.

⁶ Ou te tulia i luma o le fanauga a Isaraelu o e nonofo uma i le atu mauga e afua mai i Lepanona, e oo atu i Meserefomaima, o tagata uma o Saitonu; tau ina e fai ai le vili ia Isaraelu e totofi ai le laueleele, e pei ona ou fai atu ai ia te oe.

⁷ O lenei, ia e vaevaeina atu lenei laueleele e fai ma tofi mo itu aiga e iva, ma le vaega o le itu aiga o Manase.

⁸ O sa Reupenā, ma sa Katō, ua maua e i latou o latou tofi faatasi ma i latou, na avatu e Mose ia te i latou i le la itu i sasae o Ioritana, e pei ona avatu ia te i latou e Mose le auauna a Ieova;

⁹ e afua mai i Aroeru, o i le auvai o le alia o Arinona, ma le aai o i totonu o le alia, ma le eleele laugatasi uma o Metepa, e oo atu i Tipona;

¹⁰ o aai uma foi o Sekono le tupu o sa Amorī, o le na fai ma tupu i Hesepona, e oo i le tuaoi o le fanauga a Amoni;

¹¹ o Kiliata foi, ma le nuu o tagata o Kasuri, ma tagata o Maaka, ma le mauga a Heremoni uma, ma Vasana uma e oo atu i Saleka.

¹² O le malo uma o Oko i Vasana, o le na toe i sa Rafā, o le na fai ma tupu i Aserota, ma Eterei; na fasia foi i latou e Mose, ma tulia i latou.

¹³ Na le tulia foi e le fanauga a Isaraelu tagata o Kasuri, ma tagata o Maaka; a ua nonofo Kasuri, ma Maaka faatasi ma Isaraelu, e oo lava i le aso nei.

¹⁴ Na o le itu aiga o sa Levī, na ia le avatu ai se tofi; o taulaga e fai i le afi ia Ieova le Atua o Isaraelu o lo latou tofi lea, e pei ona fetalai mai ai o ia ia te i latou.

¹⁵ Na avatu e Mose le tofi i le itu aiga o le fanauga a Reupena e tusa ma o latou aiga;

¹⁶ e afua mai foi lo latou tuaoi i Aroeru, o i le auvai o le alia o Arinona, ma le aai o i totonu o le alia, ma le eleele laugatasi uma o i Metepa;

¹⁷ o Hesepona, ma ona aai uma o i le eleele laugatasi; o Tipona, ma Pamotapaala, ma Petepaalameona,

¹⁸ ma Iaesa ma Katemoti, ma Mefata,

¹⁹ ma Kiriataima, ma Sepema, ma Saretasaara o i le mauga o le vanu,

²⁰ ma Petepeoro, ma Asetotapeseka, ma Petesemota;

²¹ o aai uma foi i le eleele laugatasi, ma le malo uma o Sekono le tupu o sa Amorī, o le na fai ma tupu i Hesepona, na fasia o ia e Mose faatasi ma alii sili o Mitiana, o Evi, ma Rekema, ma Suro, ma Huro, ma Repa, o alii sa ia Sekono, sa nonofo i le nuu.

²² O Palaamo foi le atalii o Peoro, o le na fai togafiti faataulāitu, na fasiotia e le fanauga a Isaraelu i le pelu faatasi ma e na latou fasia.

²³ O le tuaoi o le fanauga a Reupena o Ioritana lea, ma ona tuaoi. O le tofi lea o le fanauga a Reupena e tusa ma o latou aiga, o aai ma o latou faoa aai.

²⁴ Na avatu e Mose le tofi i le itu aiga o Kato, o le fanauga a Kato, e tusa ma o latou aiga.

²⁵ O lo latou tuaoi o Iasaru, ma aai uma o Kiliata, ma le vaeluaga o le laueleele o le fanauga a Amoni, e oo atu i Aroeru, e feagai ma Rapa;

²⁶ e afua mai foi i Hesepona, e oo atu i Ramamesepa; ma Patanima; e afua mai foi i Maanaima e oo atu i le tuaoi o Tiperi;

²⁷ o aai foi i le vanu, o Petearama, ma Petenimara, ma Sukota, ma Sefono, o toe o le malo o Sekono le tupu o Hesepona, o Ioritana ma ona tuaoi, e oo atu i le mea e gata mai ai le vai o Kinereta i le la itu i sasae o Ioritana.

²⁸ O le tofi lea o le fanauga a Kato e tusa ma o latou aiga, o aai ma o latou faoa aai.

²⁹ Na avatu e Mose le tofi i le tasi vaega o le itu aiga o Manase; o le tofi lenei o le vaega o le itu aiga o le fanauga a Manase e tusa ma o latou aiga.

³⁰ O latou tuaoi e afua mai i Maanaima, o Vasana uma, o le malo uma o Oko le tupu o Vasana, ma Havota-iairo uma o i Vasana, o aai e onogafulu;

³¹ ma le tasi itu o Kiliata, ma Aserota, ma Eterei, o aai o le malo o Oko i Vasana, na i ai i le fanauga a Makiro le atalii o Manase, o le vaeluaga o le fanauga a Makiro e tusa ma o latou aiga.

³² O nuu ia na tofia e Mose mo i latou i le eleele laugatasi o Moapi, i le la itu o Ioritana, e feagai ma Ieriko i sasae.

³³ A ua le avatu e Mose se tofi i le itu aiga o sa Levī; o Ieova le Atua o Isaraelu o ia lo latou tofi, e pei ona fetalai mai ai o ia ia te i latou.