Iopu 9 - O LE TUSI PAIA

O LE MATAUPU IX. O le tali a Iopu ia Pilitati, ua ta‘u atu ai le amiotonu ma le mana o le Atua.

¹ Ona tali atu lea o Iopu, ua faapea atu,

² Ua ou iloa e moni lava, o loo faapea; a e faapefea ona amiotonu o le tagata i luma o le Atua?

³ Afai e finagalo o ia ona finau ma ia, e le mafai ona tali atu o ia ia te ia se upu e tasi i le afe o upu.

⁴ E poto lona finagalo, e malosi foi lona mana. Po o ai ea se ua faamaaa lona loto e tetee atu ia te ia a e sao ai.

⁵ O le na te siitia mauga, a e lei iloa e i latou, o le na te fulisia i latou i lona toasa.

⁶ O le ua lulueseina le lalolagi i le mea sa i ai, ona gagau ai lea o ona pou tu.

⁷ O lē fetalai atu i le la, ona le alu ae ai lea, ma na faamaufaailogaina fetu.

⁸ O lē fofola le lagi, na o ia lava, ma savali atu i luga o peau o le sami.

⁹ O lē na faia Asa, ma Kisila, ma Kima, atoa ma ana o i le itu i toga.

¹⁰ O le ua faia mea tetele e le masuesueina, ma vavega e le mafai ona faitaulia.

¹¹ Faauta, ua afio ane o ia i o‘u luma, a ou te le iloa o ia; ua afio atu foi o ia, a ou te le iloa o ia.

¹² Faauta, e faoa e ia, po o ai ea sē faafoi atu ia te ia? Po o ai ea e fai atu ia te ia, O le a ea le mea ua e faia?

¹³ E le faafoisia e le Atua lona toasa; e ifo i lalo ia te ia o fesoasoani faamaualuga.

¹⁴ A e faapefea a‘u nei ona ou tali atu ia te ia, ma a‘u filifilia ni upu e fai atu ia te ia?

¹⁵ Ana ou amiotonu po ua ou le tali atu ia te ia, a e faatoga atu i lo‘u faamasino.

¹⁶ Ana ou valaau atu, ma ua tali mai o ia ia te au, ua ou le manatu ua faafofogaina mai e ia lo‘u leo.

¹⁷ Auā na te tu‘imomomoina a‘u i le afā, ma faateleina fua o‘u manua.

¹⁸ Na te le tuuina mai a‘u, seia ou mānava ifo, a ua na faama‘onaina mai a‘u i mea oona.

¹⁹ Afai ou te tautala i le malosi, faauta mai, ua malosi lava o ia; afai foi ou te tautala i le faamasinoga, o ia ea se na te atofaina se aso mo a‘u?

²⁰ Afai ou te ta‘uamiotonuina a‘u e a‘u, e faasalaina a‘u i lo‘u lava gutu; afai ou te fai atu, ua sao la‘u nei amio, e ta‘ua ai a‘u o le faapiopio.

²¹ Afai ou te fai atu, o a‘u nei ua sao, ou te le iloa ai lo‘u agaga, ou te ‘ino‘ino i lo‘u ola.

²² E tasi lea mea, o le mea lea na ou fai atu ai, O loo faaumatia e ia o le ua sao lana amio atoa ma le ua amio leaga.

²³ Afai e fasioti faafuasei le sasa, e ‘ata ai o ia i le tofotofoga o e ua le sala.

²⁴ Ua tuuina mai le lalolagi i le lima o lē amio leaga; e ufitia e ia o mata o faamasino o i ai; afai ua le faapea, po o fea o i ai o ia? po o ai ea o ia?

²⁵ Ua tele vavave o‘u aso e sili i le ua momo‘e; ua mavae atu ia ma le le iloa se mea lelei.

²⁶ Ua mavae atu e pei o vaa tele vavave; e pei o le aeto foi ua lele tele vave i lana mea e ‘ai.

²⁷ Afai ou te fai atu, ou te faagalogaloina lo‘u tagi, ou te le toe mata faanoanoa, a e ou te mata fiafia.

²⁸ Ua ou fefe i o‘u tiga uma, ua ou iloa, e te le ta‘usaoina a‘u.

²⁹ Ua ou amio leaga, se a ea le mea ou te tautiga fua ai a‘u?

³⁰ Afai ou te taele i le suāvai kiona, ma ou faamamāina o‘u lima i le moli;

³¹ a e te fufui ia te au i le lua; e faainosia foi a‘u i o‘u lava ofu.

³² Auā e le se tagata o ia, e pei o a‘u, ou te tali atu ai ia te ia, ma te o faatasi ai i le faamasinoga.

³³ E le o i ai foi se faamasino i lo ma va, e tago mai lona lima ia te i maua.

³⁴ Ia aveeseina e ia o lana sasa ia te au, aua ne‘i faamatautia foi a‘u i lona matautia.

³⁵ Ona ou tautala atu ai lea ma le le fefe ia te ia; a o a‘u, o loo le faapea ia te au.