Iopu 5 - O LE TUSI PAIA

O LE MATAUPU V. O isi upu o le aoaiga a Elifasa ia Iopu, ma lana apoapoai ia te ia.

¹ Ina valaau atu ia, pe ai se tasi e tali mai ia te oe? Po o ai foi so le au paia e te faasaga i ai?

² O le ita e fasia ai le tagata valea, o le mataua foi e oti ai le vale.

³ Na ou iloa le tagata valea ua sosolo ona aa; a ua ou faafanoloaina le mea na mau ai o ia.

⁴ Ua mamao lana fanau i le olataga, ua solia foi i latou i le faitotoa, ae leai se na te laveaiina.

⁵ Ua ‘aina lana saito e le ua fia‘ai, ua avea ai foi e ia ai mea matuitui, ua naunau atu le malaia i o latou oloa.

⁶ Auā e le alu ae mai le eleele le malaia, e le tupu mai foi mai le laueleele le tiga.

⁷ A ua fanau mai le tagata ia tigaina, e pei ona lele ae o aloiafi.

⁸ Ae peitai a‘u, ou te saili atu i le Atua, ou te tuuina atu la‘u mea i le Atua;

⁹ o le ua faia mea tetele e le masuesueina, o vavega e le mafaitaulia.

¹⁰ O le ua foaiina mai le ua i le laueleele, o le ua tuuina mai foi o vai i le vao.

¹¹ E avae i le mea maualuga o e ua maulalo; e faaeaina foi o e ua faanoanoa ia saogalemu ai.

¹² Ua faaleaogaina e ia o mafaufauga o e fai togafiti, ona le fai ai lea i o latou lima mea ua latou manatu i ai.

¹³ E maua e ia o e popoto i a latou lava togafitiga, e faaleaogaina foi le pule a e faa‘ole‘ole.

¹⁴ Ua oso atu i latou i le pouliuli ao ao, latou te tāutago foi i le aoauli e peiseai o le po.

¹⁵ Ae faaolaina e ia o e matitiva ai le pelu, ma o latou gutu, ma le lima o le ua malosi.

¹⁶ O le mea lea ua fai ai se faamoemoe o le ua vaivai, ua punitia ai foi le gutu o lē amio leaga.

¹⁷ Faauta mai, amuia le tagata ua aoaiina e le Atua; o le mea lea aua e te ta‘ufaatauvaaina ai aoaiga a Le e ona le malosi uma lava.

¹⁸ Auā o ia na te faatigaina, o ia foi na te fusia; o ia e manua ai, o ona aao foi e fofō ai.

¹⁹ E laveai mai o ia ia te oe i puapuaga e ono, o lona fitu lava e le papai atu ai se leaga ia te oe.

²⁰ Na te laveaiina oe i le oge ia le oti ai, na te laveaiina foi oe i le pelu i le taua.

²¹ E te lilo ai oe i le sasa a le laulaufaiva, e te le fefe foi i le faatafunaina pe a oo mai.

²² E te ‘ata i le faatafunaina ma le oge, e te le mata‘u foi i manu feai.

²³ Auā e fai sa outou feagaiga, o oe ma maa o le eleele; tou te lelei foi ma manu feai.

²⁴ E te iloa foi, ua saogalemu lou fale ie; e te asiasi lava i lou fale, a e te le agasala.

²⁵ E te iloa foi e toatele lau fanau, e tusa foi e ua tutupu ia te oe ma le vao iti o le laueleele.

²⁶ E te oo i le tuugamau o e toeaina lava, e pei ona alu ae o le faaputugāsaito i lona tau.

²⁷ Faauta, ua matou suesueina lenei mea, o loo faapea lava ia; ina e faafogafoga mai i ai, ma ia e silafia ai.