Iona 2 - O LE TUSI PAIA

O LE MATAUPU II. O le tatalo a Iona.

¹ Na tatalo foi Iona ia Ieova lona Atua i le manava o le i‘a,

² ua faapea atu, Na a‘u valaau atu ia Ieova ona o lo‘u puapuaga, ua na faafofoga mai foi ia te au; na ou alaga atu nai le mea maulalo i tuugamau, ua e faafofoga i lo‘u leo.

³ Na e lafoina a‘u i le moana, i totonu lava o le sami; na siosioina lava a‘u e le au; na lofia a‘u i ou galu ma ou peau uma lava.

⁴ Ona ou faapea ai lea, Ua lafoaiina a‘u ai luma o ou fofoga; a ou te toe faasaga atu i lou malumalu paia.

⁵ Ua siosioina a‘u e le sami, na manū a‘u oti; ua ufitia a‘u i le moana, ua fusia lo‘u ulu i le limu.

⁶ Ua ou alu ifo i vae mauga; ua faamauina faamau o le lalolagi i luga ia te au e faavavau; a e te aveina ae lo‘u ola ai le lua, Ieova e lo‘u Atua.

⁷ Na ou manatua Ieova ina o vaivai o lo‘u loto i totonu ia te au; na oo atu foi la‘u tatalo ia te oe i lou malumalu paia.

⁸ O e ua anaana i mea faatauvaa ma le pepelo ua lafoaiina e i latou o mea e manuia ai i latou.

⁹ A o a‘u, ou te faitaulaga ia te oe ma le upu faafetai; ou te faia le mea na ou tauto ai. Mai ia Ieova le olataga.

¹⁰ Ua fetalai atu Ieova i le i‘a, ona luai lea e ia o Iona i le eleele matutu.