Ioane 8 - O LE TUSI PAIA

O LE MATAUPU VIII. O le fafine na mulilua. O aoaiga a Iesu ia Iutaia.

¹ Ona maliu atu lea o Iesu i le mauga o Olive.

² O le segisegi o le taeao na toe maliu ane ai Iesu i le malumalu; ua o mai foi le nuu uma ia te ia; ona nofo lea o ia i lalo, ma a‘oa‘o atu ia te i latou.

³ Ua ta‘ita‘iina mai e le au tusiupu ma le au faresaio le fafine na maua ina o mulilua; ua tuuina o ia e i latou i totonu;

⁴ ua faapea mai i latou ia te ia, Le a‘oa‘o e, na maua lenei fafine ina o mulilua ua mautinoa lava.

⁵ Ua poloai Mose ia te i tatou i le tulafono ia fetogi i maa o e faapea; a o oe, pe se a se mea e te fetalai mai i ai?

⁶ Ua latou faapea mai e tofotofo ia te ia, ina ia maua e i latou se mea e molia ai o ia; a ua punou Iesu, ma tusi i lona tamatamai lima i le eleele.

⁷ A ua latou fesili atu pea lava ia te ia; ona toe nofo lea o ia i luga, ma faapea atu ia te i latou, O so outou e leai sana agasala, ia lua‘i togi se maa ia te ia.

⁸ Ona toe punou lea o ia, ma tusi i le eleele.

⁹ Ua latou faalogo i ai, ua iloa a latou agasala i o latou loto fuatia ifo; ona taitoatasi lea o i latou ma alu i fafo, e afua mai i toeaina, ua oo atu i e aupito iti. Ua tuua na o Iesu lava, ma le fafine o loo tu i totonu.

¹⁰ Ua toe nofo i luga Iesu, ua silafia ua leai se tagata, ua na o le fafine lava, ona fetalai atu lea o ia ia te ia, Funa e, o ifea ea i latou e na molia oe? ua le faasala mai ea se tasi ia te oe?

¹¹ Ua fai mai o ia, Le Alii e, e leai lava se tasi. Ona fetalai atu lea o Iesu ia te ia, Ou te le faasala foi ia te oe; alu ia oe, aua e te toe agasala.

¹² Ona toe fetalai atu lea o Iesu ia te i latou, ua faapea atu, O a‘u nei o le malamalama o le lalolagi; o lē mulimuli mai ia te au, e le savali o ia i le pouliuli, a e ia te ia le malamalama o le ola.

¹³ Ona fai mai lea o le au faresaio ia te ia, Ua e molimau oe ia te oe; e le faamaoni lau mau.

¹⁴ Ua tali atu Iesu ia te i latou, ua faapea atu, E ui lava ina ou molimau a‘u ia te au, a e faamaoni lava la‘u mau; auā ua ou iloa le mea na ou sau ai, ma le mea ou te alu i ai; a ua outou le iloa le mea na ou sau ai, ma le mea ou te alu i ai.

¹⁵ Tou te faamasino faaletino; ou te le faamasino i se tasi.

¹⁶ A e afai ou te faamasino e moni la‘u faamasinoga; auā ou te le toatasi lava a‘u, peitai o i maua ma le Tamā ua auina mai a‘u.

¹⁷ Ua tusia i la outou tulafono, E moni le mau a tagata e toalua.

¹⁸ O a‘u nei lē molimau ia te au, o loo molimau foi ia te au le Tamā ua auina mai a‘u.

¹⁹ Ona latou fai mai lea ia te ia, O ifea lou Tamā? Ua tali atu Iesu, E lei iloa e outou o a‘u, po o lo‘u Tamā; ana iloa e outou o a‘u, po ua iloa foi e outou o lo‘u Tamā.

²⁰ Ua fetalai atu Iesu i nei mea i le mea e teu ai oloa, ina o a‘oa‘o atu ia i le malumalu; a e lei puea o ia e se tasi, auā ua le oo i ona po.

²¹ Ona toe fetalai atu lea o Iesu ia te i latou, Ou te alu ese, ona outou saili lea ia te au, a e oti outou i a outou agasala; e le mafai e outou ona ō i le mea ou te alu i ai.

²² Ona fai ane lea o Iutaia, E fasioti ea o ia ia te ia? ina ua faapea mai o ia, E le mafai e outou ona ō i le mea ou te alu i ai.

²³ Ua fetalai atu foi o ia ia te i latou. O outou o lalo nei, o a‘u mai lugā; o outou e ō le lalolagi nei, e le so le lalolagi a‘u.

²⁴ O lea ua ou fai atu ai ia te outou. E oti outou i a outou agasala; auā a outou le talitonu, o a‘u lenei o ia, ona oti lea o outou i a outou agasala.

²⁵ Ona fai mai ai lea o i latou ia te ia, O ai ea oe? Ona fetalai atu lea o Iesu ia te i latou. O a‘u le ua oa fai atu ai ia te outou talu le amataga.

²⁶ E tele mea ua ia te au e tautala atu ai ma faamasino ai ia te outou: a o ia ua auinia mai a‘u, e moni lava o ia. O mea ua ou faalogo ai ia te ia, o mea ia ou te fai atu ai i le lalolagi.

²⁷ E lei iloa e i latou ua ia fetalai ia te i latou i le Tamā.

²⁸ Ona fetalai atu lea o Iesu ia te i latou. Pe a siitia i luga e outou le Atalii o le tagata, ona iloa lea e outou o a‘u lenei o ia: ou te le fai fua foi se mea, a e peitai, faapei ona a‘oa‘o mai e lo‘u Tamā ia te au, o mea ia ou te tautala atu ai.

²⁹ O ia foi ua auina mai a‘u o loo ia te au ia; e le tuua a‘u e toatasi e le Tamā, aua ou te faia pea lava o mea e lelei ia te ia.

³⁰ Ua fetalai atu ia i nei mea, ona toatele ai lea o e na talitonu ia te ia.

³¹ Ona fetalai atu lea o Iesu ia Iutaia, e ua talitonu ia te ia. Afai tou te tumau pea i la‘u mataupu, o o‘u soo moni outou.

³² E iloa foi e outou le mea moai, e tuu sa‘oloto foi outou e le upu moni.

³³ Ona tali mai lea o i latou ia te ia, O i matou nei o le fanau a Aperaamo, e lei fai lava i matou ma pologa o se tasi: pe faapefea ona e fai mai, E tuu sa‘oloto outou?

³⁴ Ua tali atu Iesu ia te i latou. E moni, e moni, oa te fai atu ia te outou, o sē faia le agasala, o le pologa lea o le agasala.

³⁵ O le pologa foi, e le tumau pea ia i le aiga; a o le atalii, e tumau pea lava ia.

³⁶ O lenei, pe a tuu sa‘oloto outou e le Atalii, ona sa‘oloto faamaoni ai lea o outou.

³⁷ Ua ou iloa o le fanau outou a Aperaamo: a ua outou fia fasioti ia te au, auā ua le i ai la‘u upu i totonu ia te outou.

³⁸ O a‘u nei ou te tautala i mea ua ou iloa i lo‘u Tamā: o outou foi tou te faia mea ua outou iloa mai lo outou tamā.

³⁹ Ona tali mai lea o i latou ia te ia, ua faapea mai, O Aperaamo lo matou tamā. Ua fetalai atu Iesu ia te i latou, Afai o le fanau outou a Aperaamo, po ua faia e outou o le amio a Aperaamo.

⁴⁰ A ua outou fia fasioti ia te au le tagata ua tautala atu ia te outou i le upu moni, sa ou faalogo ai mai le Atua: e lei faia lea e Aperaamo.

⁴¹ Ua faia lava e outou amio a lo outou tamā. Ona faapea mai lea o i latou ia te ia, E le ni tama toifale i matou; e tasi lo matou Tamā, o le Atua lea.

⁴² Ona fetalai atu lea o Iesu ia te i latou, Afai o lo outou Tamā le Atua, po ua outou alofa mai ia te au, auā ua ou sau mai le Atua, ma ou sau iinei; auā foi ou te lei sau fua, a o ia lava ua auina mai a‘u.

⁴³ Se a le mea e le lagona ai e outou la‘u nei upu? auā tou te le mafaia ona faalogo i la‘u mataupu.

⁴⁴ O outou nai lo outou tamā le tiapolo, tou te fia faia foi mea e tu‘inanau i ai lo outou tamā. O le fasioti tagata ia talu le amataga, e lei tumau lava ia i le upu moni, auā e le o i totonu lava ia te ia le upu moni; a tautala ia i le tala pepelo, o lana lava lea e tautala a‘i, auā o le pepelo ia, ma le tamā o le pepelo.

⁴⁵ A o a‘u nei, tou te le talitonu mai ia te au, auā ou te fai atu le upu moni.

⁴⁶ O ai ea so outou na te faailoa mai sa‘u agasala? Afai foi ou te tautala i le mea moni, pe se a le mea tou te le talitonu mai ai ia te au?

⁴⁷ O lē mai le Atua, e faalogo ia i afioga a le Atua; o le mea lea tou te le faalogo ai, auā e le mai le Atua outou.

⁴⁸ Ona tali mai lea o Iutaia, ua faapea mai ia te ia, E le ua tonu ea la matou upu. O le Samaria oe, o loo ia te oe foi le temoni?

⁴⁹ Ua tali atu Iesu, E le ia te au le temoni; a ou te ava lava a‘u i lo‘u Tamā; tou te le ava mai foi ia te au.

⁵⁰ Ou te le saili foi i so‘u viiga; o le tasi o loo saili, o loo faamasino foi.

⁵¹ E moni, e moni, ou te fai atu ia te outou; ai se tausi i la‘u upu, e le iloa e ia le oti, e oo i le faavavau.

⁵² Ona fai mai lea o Iutaia ia te ia, O lenei ua matou iloa ua ia te oe le temoni; ua oti Aperaamo ma le au perofeta, a ua e fai mai oe. Ai se tausi i la‘u upu e le oo le oti ia te ia e oo i le faavavau.

⁵³ Ua sili ea oe i lo matou tamā o Aperaamo, ua oti o ia? ma le au perofeta, ua oti i latou; po o ai ea oe e fai fua lava oe ia te oe?

⁵⁴ Ua tali atu Iesu, Afai ou te vivii a‘u ia te au, e le aoga la‘u viiga; o lo‘u Tamā o ia na te viia mai a‘u, ua outou fai mai, o lo outou Atua lea.

⁵⁵ E lei iloa foi o ia e outou, a ua ou iloa lava o ia; afai foi ou te fai atu, ua ou le iloa lava o ia, ona avea lea o a‘u o le pepelo, e pei o outou; peitai ua ou iloa lava o ia, ou te tausi foi i lana afioga.

⁵⁶ O Aperaamo lo outou tamā, na matuā fiafia o ia ina a iloa e ia lo‘u nei aso, na ia iloa foi, ma olioli ai.

⁵⁷ Ona faapea mai lea o Iutaia ia te ia, E lei oo i le limagafulu o ou tausaga, po ua e iloa ea Aperaamo?

⁵⁸ Ua faapea mai Iesu ia te i latou, E moni, e moni, ou te fai atu ia te outou, sa a‘u i ai, a o lei leai se Aperaamo.

⁵⁹ Ona latou fetagofi lea i maa e fetogi ia te ia. Ona lafi lea o Iesu, ua ulufafo i le malumalu, ua ui ane i totonu ia te i latou, ma maliu ese ai.