Ioane 7 - O LE TUSI PAIA

O LE MATAUPU VII. O le tausamiga o fale apitaga.

¹ Ua mavae ia mea, ona femaliuai ai lea o Iesu i Kalilaia; auā e lei finagalo o ia e femaliuai i Iutaia, auā ua mananao tagata lutaia e fia fasioti ia te ia.

² Ua latalata le tausamiga o Iutaia, o le tausamiga o fale apitaga.

³ O le mea lea ua fai mai ai ona uso ia te ia, Ia e tuua lenei mea, ma e alu ane i Iutaia, ina ia vaavaai atu foi ou soo i au galuega e te faia.

⁴ Auā e leai se tasi e fai faalilolilo se mea pe a manao o ia i le fia faaalia o ia; afai ua e faia ia mea, ia e faaalia oe e oe i le lalolagi.

⁵ Auā o ona uso foi, latou te lei talitonu ia te ia.

⁶ Ona fetalai atu ai lea o Iesu ia te i latou, E lei oo mai o‘u aso; a o aso uma lava e tatau mo outou.

⁷ E le mafai le lalolagi ona ‘ino‘ino ia te outou; a e ‘ino‘ino mai ia te au, auā ou te molimau i ai ua leaga ana amio.

⁸ O ae ia outou i lea tausamiga; ou te le alu ae nei i lea tausamiga, auā e lei oo mai o‘u po.

⁹ Ua ia fetalai atu ia mea ia te i latou, a ua nofo pea o ia i Kalilaia.

¹⁰ Ua o ae ona uso, ona maliu ae lea o ia i le tausamiga, e le i faaali, a e peiseai ua faalilolilo.

¹¹ Ona tausaili ai lea o Iutaia ia te ia i le tausamiga, ua faapea ane, O ifea o i ai o ia?

¹² Ua tele foi le femusuai o le motu o tagata ia te ia; ua faapea isi, O le tagata lelei o ia; a ua faapea isi, E leai, a ua ia faasese i le nuu.

¹³ A e lei tautala faali se tasi ia te ia, ona o le mata‘u ia Iutaia.

¹⁴ Ua oo i le aso tuloto o le tausamiga, ua maliu ae ai Iesu i le malumalu,

¹⁵ ua a‘oa‘o ai. Ona ofo ai lea o Iutaia, ua faapea ane, Pe faapefea ea ona poto o lenei tagata, a e lei a‘oa‘oina o ia?

¹⁶ Ua fetalai atu Iesu ia te i latou, ua faapea atu, O la‘u mataupu, e le o sa‘u lava, a o lana na auina mai a‘u.

¹⁷ Ai se tasi e fia fai lona finagalo, e iloa ai e ia le mataupu, pe mai le Atua, pe ou te tautala fua lava a‘u.

¹⁸ O lē tautala fua ia te ia, ua saili e ia lona lava viiga; a o lē saili ia viia le na auina o ia, e faamaoni lea, e leai foi sana amioletonu.

¹⁹ E lei tuuina atu ea e Mose le tulafono ia te outou, a e leai se tasi o outou e anaana i le tulafono; pe se a le mea tou te fia fasioti ai ia te au?

²⁰ Ona tali mai lea o le motu o tagata, ua faapea mai, O ia te oe le temoni; o ai ea e fia fasioti ia te oe?

²¹ Ua tali atu Iesu ia te i latou, ua faapea atu, Ua ou faia le galuega e tasi, na outou ofo ai uma lava.

²² O lea na tuu atu ai e Mose le peritome ia te outou, (e le ona ua mafua ia Mose, a o tamā,) o le sapati foi tou te faaperitomeina ai tagata.

²³ Pe afai e peritomeina se tagata i le sapati, ne‘i solia le tulafono a Mose, pe se a le mea tou te ita mai ai ia te au, auā na ou faamaloloina le tino atoa o le tagata i le sapati?

²⁴ Aua le soona faamasino, a ia faamasino i le faamasinoga tonu.

²⁵ Ona faapea ane lea o isi tagata o Ierusalema, E le o ia ea lenei latou te fia fasiotia?

²⁶ Faauta foi, o loo tautala faaali lava o ia, a e le fai atu sa latou upu ia te ia; po ua iloa lava e le au faipule o le Keriso moni lava lenei?

²⁷ Peitai ua tatou iloa le mea ua sau ai lenei tagata; a o le Keriso, pe a maliu mai o ia, e leai se tasi na te iloa pe maifea o ia.

²⁸ Ona alaga lea o Iesu, ina o a‘oa‘o i le malumalu, ua faapea atu, Ua outou iloa a‘u, ua iloa foi e outou le mea ua ou sau ai; ou te lei sau fua lava a‘u, a ua moni lava o ia ua auina mai a‘u, e lei iloa o ia e outou;

²⁹ a o a‘u, ua ou iloa o ia, auā mai ia te ia lava a‘u; o ia foi ua auina mai a‘u.

³⁰ Ona latou fia pue lea ia te ia; a e lei oo se lima o se tasi ia te ia, auā e lei oo i ona po.

³¹ A e toatele ua talitonu ia te ia nai le motu o tagata, ma latou faapea ane, Pe a maliu mai le Keriso, e tele ea faailoga e faia e ia i faailoga ua faia e lenei tagata?

³² Ua faalogo le au faresaio i le femusuai o le motu o tagata ia te ia i ia mea; ona aauina lea e le au faresaio ma le au ositaulaga sili o auauna e pue ia te ia.

³³ Ona faapea atu lea o Iesu ia te i latou, Toe itiiti nai aso ou te i ai ia te outou i lo‘u alu atu ai ia te ia ua auina mai a‘u.

³⁴ E saili outou ia te au, a e le iloa a‘u; o le mea foi ou te i ai a‘u, tou te le mafai ona ō i ai.

³⁵ Ona faapea ane lea o Iutaia o le tasi i le tasi, Po o fea a alu i ai o ia, e le mafai ai ona tatou iloa o ia? Pe alu ia i e ua taapeape i Eleni, e a‘oa‘o ai foi i Eleni?

³⁶ O le a lena upu na ia fai mai ai, E saili outou ia te au, a e le iloa a‘u; o le mea foi ou te i ai a‘u, tou te le mafai ona ō i ai?

³⁷ O le toe aso, o le aso tele o le tausamiga, ua tulai ai Iesu, ma alaga, ua faapea atu, Afai e fia inu se tasi, ina sau ia ia te au e inu ai.

³⁸ O se faatuatua ia te au, e faapei ona fai mai o le Tusi, E tafe mai o vaitafe mai totonu ia te ia, o le vai ola lava.

³⁹ Ua fetalai atu o ia lena upu i le Agaga, e maua e i latou ua faatuatua ia te ia; auā o ona po ia e lei maua ai le Agaga Paia, auā e lei oo Iesu i lona mamalu.

⁴⁰ E toatele o le motu o tagata ua faalogo i lea upu, ona faapea ai lea o i latou, E moni, o lea lava perofeta lenei.

⁴¹ Ua faapea foi isi, O le Keriso lenei; a ua faapea isi, Pe tupu mai le Keriso mai Kalilaia?

⁴² ua le fai mai ea le Tusi, e tupu mai le Keriso mai le fanauga a Tavita, mai Peteleema foi, o le aai, sa i ai Tavita?

⁴³ Ua vaeluaina ai le motu o tagata ia te ia.

⁴⁴ Ua fia pue atu ia te ia nisi o i latou, a e lei tago atu se lima o se tasi ia te ia.

⁴⁵ Ua foi atu auauna i le au ositaulaga sili ma le au faresaio; ona faapea mai ai lea o i latou ia te i latou, Pe se a le mea ua outou le ta‘ita‘i mai ai ia te ia?

⁴⁶ Ona tali atu lea o auauna, Ua leai lava se tagata e tautala pei o lena tagata.

⁴⁷ Ona tali mai lea o le au faresaio ia te i latou, Po ua faaseseina foi outou?

⁴⁸ Po ua talia o ia e se tasi o le au faipule, po o se tasi o le au faresalo?

⁴⁹ A o lenei vao tagata ua le iloa le tulafono, ua fetuuina lava i latou.

⁵⁰ Ua fai atu Nikotemo ia te i latou, o ia na alu ia te ia i le po, o le isi foi o i latou,

⁵¹ Pe faasalaina ea se tagata i la tatou tulafono, a o lei muai faalogologo ia te ia, ma iloa ana mea ua faia?

⁵² Ona tali mai lea o i latou, ua faapea mai ia te ia, E te se Kalilaia ea foi oe? Ia e saili ma ia e iloa, e le tu mai lava se perofeta mai Kalilaia.

⁵³ Ona taitasi lea ma alu i lona fale.