Ioane 6 - O LE TUSI PAIA

O LE MATAUPU VI. Ua fagaina tagata i le vao.

¹ Ua mavae ia mea, ona maliu atu lea o Iesu i le tasi itu o le vai o Kalilaia, o le vai lea o Tiperia.

² Ona mulimuli atu lea ia te ia le motu o tagata e toatele, auā na latou matamata i ona faailoga sa faia i e na mamai.

³ Ua maliu ae Iesu i le mauga, ua nofo i lalo, o ia ma ona soo.

⁴ Ua latalata le paseka, o le tausamiga lea o Iutaia.

⁵ Ona tepa ae ai lea o Iesu ona fofoga, ua silasila atu foi, ua o mai ia te ia le motu o tagata e toatele, ona fetalai atu lea o ia ia Filipo, O ifea tatou te faatauina mai ai ni areto, ina ia aai ai i latou nei?

⁶ Ua faapea atu Iesu, o lana tofotofo ia te ia; auā ua silafia lava e ia le mea o le a na faia.

⁷ Ua tali mai Filipo ia te ia, E le lava areto, pe a faatauina i tenari e lua selau, ina ia tofu i latou ma sina mea itiiti.

⁸ Ona fai mai lea ia te ia o le tasi o ona soo, o Aneterea, o le uso o Simona Peteru,

⁹ O loo iinei le tama o ia te ia areto karite e lima, ma nai i‘a iti e lua lau; a e aumā ea ia mea ia i latou e toatele?

¹⁰ Ona faapea atu lea o Iesu, Ia outou fai ane ia taooto tagata. E tele foi le mutia i lea mea. Ona latou taooto ai lea, o le tau aofai o tane, pe lima o afe.

¹¹ Ona tago lea o Iesu i areto, ua faafetai, ona tufatufa lea i ona soo, a e tufatufa e ona soo i e taooto. Ua faapea foi ma i‘a, ua avatu faitalia i latou.

¹² Ua maoona lava i latou, ona fetalai ane lea o ia i ona soo, ia faapotopoto toe ‘aiga, ne‘i ai ni mea e māumau.

¹³ Ona faapotopoto ai lea, ua tutumu ai ‘ato e sefulu ma le lua i toe ‘aiga o areto karite e lima, o mea ia na totoe i e na aai.

¹⁴ Ua iloa ia tagata le faailoga na faia e Iesu, ona faapea lea o i latou, E moni, o lea lava perofeta lenei, o lē maliu mai i le lalolagi.

¹⁵ Ua silafia foi e Iesu, o le a o mai i latou e pue ia te ia, ina ia latou faia o ia ma tupu, ona toe maliu ese ai lea o ia e toatasi i le mauga.

¹⁶ Ua oo i le afiafi, ona o ifo lea o ona soo i le vai,

¹⁷ ua o ae foi i le vaa, ona latou o lea i Kapanaumi i le tasi itu o le vai. Ua pouliuli foi, a e lei maliu atu lava Iesu ia te i latou.

¹⁸ Ua sousou foi le vai i le matagi ua agi tetele.

¹⁹ Ua taualo i latou, pe lua sefulu ma le lima, pe tolugafulu o setatio, ona iloa atu lea o i latou ia Iesu, o savali lava i luga o le vai, ua latalata atu foi o ia i le vaa; ua latou fefefe ai.

²⁰ A ua fetalai atu ia ia te i latou, O a‘u lava lenei; aua tou te fefefe.

²¹ Ona talia lea o ia e i latou i le vaa ma le fiafia; ona oo atu loa lea o le vaa i le nuu ua latou o i ai.

²² O le taeao ua iloa ai e le motu o tagata e na tutū i le tasi itu o le vai ua leai se tasi vaa i lea mea, na o lea na o ai ona soo, e lei ō faatasi foi o Iesu ma ona soo i le vaa, na o ona soo lava na ō ai;

²³ (a ua o mai nisi vaa nai Tiperia, e lata ane i le mea na latou aai ai, ina ua faafetai e le Alii,)

²⁴ ua iloa e le motu o tagata e lei i ai Iesu, e lei i ai foi ona soo, ona o ai lea o i latou foi i vaa, ma o atu i Kapanaumi, o saili ia Iesu.

²⁵ Ua iloa o ia e i latou i le tasi itu o le vai, ona faapea mai lea o i latou ia te ia, Rapi e, na e maliu mai ea iinei anafea?

²⁶ Ua tali atu Iesu ia te i latou, ua faapea atu, E moni, e moni, ou te fai atu ia te outou, e lei saili mai outou ia te au, auā na outou vāai mai i faailoga, a e peitai ua outou aai i areto, ma outou maoona ai.

²⁷ Aua tou te galulue i mea e ‘ai e pala, a o mea e ‘ai e tumau i le ola e faavavau, e foaiina atu ia te outou e le Atalii o le tagata; auā ua faaalitinoina mai o ia e le Atua le Tamā.

²⁸ Ona faapea mai lea o i latou ia te ia, Se a se mea matou te faia, ina ia matou galulue i galuega a le Atua?

²⁹ Ua tali atu Iesu, ua faapea atu ia te i latou, O lenei le galuega a le Atua, ia outou faatuatua ia te ia ua auina mai e ia.

³⁰ Ona faapea mai lea o i latou ia te ia, Se a se faailoga e te faia matou te vaai atu i ai, ma faatuatua ai ia te oe?

³¹ Se a se galuega e te faia? Na aai e o matou tamā le manai i le vao, faapei ona tusia, Na ia avatua ia te i latou le areto mai le lagi e aai ai.

³² Ona fetalai atu lea o Iesu ia te i latou, E moni, e moni, ou te fai atu ia te outou, E le o Mose na avatu ia te outou lena areto mai le lagi; peitai o lo‘u Tamā, na te avatu ia te outou le areto moni mai le lagi;

³³ auā o le areto mai le Atua, o le mea ua alu ifo mai le lagi lea, ma au mai le ola i le lalolagi.

³⁴ Ona fai mai lea o i latou ia te ia, Le Alii e, au mai ia te i matou lena areto, aua le aunoa.

³⁵ Ua fetalai atu Iesu ia te i latou, O a‘u nei le areto o le ola; o lē sau ia te au, e le laina lava ia; o lē faatuatua foi ia te au, e le toe fia inu lava ia.

³⁶ A ua ou fai atu ia te outou, ua outou vaavaai mai ia te au, a e tou te lei faatuatua mai lava.

³⁷ O i latou uma ua foaiina mai ia te au e le Tamā, e o mai i latou ia te au; o ia foi e sau ia te au, ou te le tulia lava i fafo.

³⁸ Auā ou te lei alu ifo mai le lagi e fai lo‘u lava loto, a o le finagalo o le ua auina mai a‘u.

³⁹ O lenei foi le finagalo o le Tamā o le ua auina mai a‘u, ia le māumau lava se tasi ua ia foaiina mai ia te au, a ia ou toe faatuina o ia i le aso gataaga.

⁴⁰ O lenei foi le finagalo o le ua auina mai a‘u, ia maua le ola e faavavau e i latou uma o e vaai i le Atalii, ma faatuatua ia te ia, ou te toe faatuina foi i latou i le aso gataaga.

⁴¹ Ona muimui ai lea ia te ia o Iutaia, auā ua fetalai atu ia, O a‘u le areto ua alu ifo mai le lagi;

⁴² ua faapea ane foi i latou, E le o Iesu ea lenei le atalii o Iosefa, ua tatou iloa lona tamā ma lona tinā? o lenei foi, pe faapefea ona fai mai o ia, ua ou alu ifo mai le lagi?

⁴³ Ona tali atu lea o Iesu ia te i latou, ua faapea atu, Aua tou te muimui.

⁴⁴ E le mafai se tasi ona sau ia te au, pe a le tosina mai e le Tamā ua auina mai a‘u; ou te toe faatuina foi o ia i le aso gataaga.

⁴⁵ Ua tusia i le au perofeta, E a‘oa‘oina i latou uma lava e le Atua. O lenei, o i latou uma o e faalogo i le Tamā, o e a‘oa‘oina foi, e o mai i latou ia te au;

⁴⁶ a e le ona ua vaai se tasi i le Tamā; na o ia mai le Tamā, ua vaai atu lava ia i le Tamā.

⁴⁷ E moni, e moni, ou te fai atu ia te outou, o lē faatuatua mai ia te au, ua ia te ia le ola e faavavau.

⁴⁸ O a‘u o le areto o le ola.

⁴⁹ Na aai e o outou tamā le manai i le vao, a ua oti i latou.

⁵⁰ O lenei le areto ua alu ifo mai le lagi; ai se ‘ai ai ona le oti lea o ia.

⁵¹ O a‘u le areto ola na alu ifo mai le lagi; pe a ‘ai se tasi i lenei areto ona ola ai lea o ia e faavavau. O le areto foi ou te avatua, o lo‘u tino lea, ou te avatua ma ola o le lalolagi.

⁵² Ona fefinauai ai lea o Iutaia, ua faapea ane, E mafai faapefea e lenei tagata ona au mai o lona tino ia te i tatou, tatou te aai ai?

⁵³ Ona fetalai atu lea o Iesu ia te i latou, E moni, e moni, ou te fai atu ia te outou, afai tou te le aai i le tino o le Atalii o le tagata, a le inu foi i lona toto, ua le i totonu ia te outou le ola.

⁵⁴ O lē ‘ai i lo‘u tino ma inu i lo‘u toto, ua ia te ia le ola e faavavau; ou te toe faatuina foi o ia i le aso gataaga;

⁵⁵ auā o lo‘u tino o le mea e ‘ai moni lea, o lo‘u toto foi o le mea e inu moni lea.

⁵⁶ O lē ‘ai i lo‘u tino ma inu i lo‘u toto, e tumau o ia ia te au, o a‘u foi ia te ia.

⁵⁷ E faapei ona soifua o le Tamā ua na auina mai a‘u, o loo ola foi a‘u i le Tamā; e faapea foi o lē ‘ai ia te au, e ola lea ia te au.

⁵⁸ O lenei le areto ua alu ifo mai le lagi, e le pei o outou tamā na aai le manai, a ua oti i latou; o lē ‘ai i lenei areto e ola ia e faavavau lava.

⁵⁹ O mea ia na fetalai ai Iesu ina o a‘oa‘o o ia i le sunako i Kapanaumi.

⁶⁰ Ua faalogologo ai isi ona soo e toatele, ona faapea ai lea o i latou, O le upu faigata lena; o ai ea se na te mafaia ona faalogologo i ai?

⁶¹ Ua silafia e Iesu i lona lava finagalo, ua muimui ona soo i lena mea, ona fetalai atu ai lea o ia ia te i latou. Tou te tausuai ea i lena mea?

⁶² Pe faapefea pe a outou vaai atu i le Atalii o le tagata, o alu ae ia i le mea sa i ai anamua?

⁶³ O le agaga lea e tupu ai le ola, e le aoga le tino i se mea; o upu ou te fai atu ia te outou, o le agaga ia, o le ola foi ia.

⁶⁴ Peitai o isi o outou e le talitonu lava; auā ua silafia e Iesu talu lava le amataga o isi o e na le talitonu, ma le tasi na te faalataina o ia.

⁶⁵ Ua ia fetalai atu foi, O le mea lea na ou fai atu ai ia te outou, e le mafai e se tasi ona sau ia te au, pe a le foaiina atu ai ia te ia, e lo‘u Tamā.

⁶⁶ Talu ai ua o ese isi o ona soo e toatele i tua, a e lei toe feoai i latou ma ia.

⁶⁷ Ona faapea atu lea o Iesu i le toasefulu ma le toalua, Pe tou te fia o ese foi?

⁶⁸ Ona tali mai lea o Simona Peteru ia te ia, Le Alii e, a matou o ea ia te ia? o ia te oe upu o le ola e faavavau.

⁶⁹ Ua matou talitonu, ma ua matou iloa o oe o le Keriso, o le Alo o le Atua soifua.

⁷⁰ Ua tali atu Iesu ia te i latou, Na ou le filifilia ea outou e toasefulu ma le toalua? a o le tasi o outou o le tiapolo ia.

⁷¹ Ua fetalai atu ai o ia ia Iuta le atalii o Simona le Sekara; auā o ia o le a na faalataina o ia, o le tasi foi lea o le toasefulu ma le toalua.