Ioane 2 - O LE TUSI PAIA

O LE MATAUPU II. Ua liliu e Iesu le suavai e fai ma uaina.

¹ Ua oo i le aso tolu, ona fai ai lea o le tausamaaga i Kana i Kalilaia; sa i ai foi le tinā o Iesu.

² Na tala‘iina foi Iesu ma ona soo i le tausamaaga.

³ Ua uma foi le uaina, ona fai atu lea o le tinā o Iesu ia te ia, Ua leai sa latou uaina.

⁴ Ua fetalai mai Iesu ia te ia, Funa e, se a ea lau na ia te au? e lei oo i lo‘u itu aso.

⁵ Ua fai ane lona tinā i auauna, O se mea lava e fai mai ai o ia ia te outou, ia outou faia.

⁶ Sa i ai vai maa tetele e ono, e tailua pe taitolu paita i vai, pei o le tu o le faamamāina o Iutaia.

⁷ Ua fetalai atu Iesu ia te i latou, Ina faatutumu ia o vai i suāvai. Ona latou faatutumuina lea, ua oo lava i lau.

⁸ Ua fetalai atu ia ia te i latou, Ina asu ane ia, ina ave i lē pule i le tausamaaga. Ona latou avatua lea.

⁹ Ua tofo foi lē pule i le tausamaaga i le vai ua liu uaina, (a ua na le iloa le mea na maua ai, a o auauna na asu le vai ua latou iloa,) ona valaau atu lea o lē pule i le tausamaaga i le faatoafaiavā, ua fai atu ia te ia,

¹⁰ E muamua ona au mai e tagata uma o le uaina lelei; pe a tele foi le inu i ai o tagata, ona au mai ai lea o le uaina leaga; a ua tuu e oe le uaina lelei, ua oo mai i lenei itu aso.

¹¹ Na faia e Iesu lenei uluai faailoga i Kana i Kalilaia, ma faaali mai ai lona mamalu; ona talitonu ai lea o ona soo ia te ia.

¹² Mulimuli ane ua maliu ifo ai i Kapanaumi, o ia ma lona tinā, ma ona uso, ma ona soo; a e lei nonofo ai i ni aso e tele.

¹³ Ua lata mai foi le paseka a Iutaia; ona maliu ae lea o Iesu i Ierusalema.

¹⁴ Ua na silafia i le malumalu o e faatau povi, ma mamoe, ma lupe, ma e faatau tupe o nonofo mai ai.

¹⁵ Ua ia faia le sasa i maea tua iti, ona tutuli atu ai lea ia te i latou uma lava i fafo o le malumalu, o mamoe atoa ma povi; ua sasaa ifo foi tupe a tagata faatau tupe, ma fuli atu laulau.

¹⁶ Ua faapea atu foi o ia i e faatau lupe, Ave ese ia nei mea; aua le fai le fale o lo‘u Tamā ma fale faatau oa.

¹⁷ Ona manatu ai lea o ona soo i le upu ua tusia, Ua ‘aina lava a‘u i le manao tele i lou fale.

¹⁸ Ona fai mai ai lea o tagata Iutaia, ua faapea mai ia te ia, Se a se faailoga e te faaali mai ia te i matou, ina ua e faia nei mea?

¹⁹ Ua tali atu Iesu, ua faapea atu ia te i latou, Ina lepeti ia o lenei malumalu, ona ou toe faia lea i aso e tolu.

²⁰ Ona fai mai lea o Iutaia, E fagafulu ma le ono o tausaga o fai lenei malumalu, pe e te toe faia foi e oe i aso e tolu?

²¹ A o lona tino, o le malumalu lea na ia fetalai mai ai.

²² Na tu mai o ia nai e ua oti ona manatu ai lea o ona soo ua na fetalai mai lenei upu ia te i latou; ona latou talitonu lea i le Tusi, ma le fetalaiga a Iesu ua ia fetalai mai ai.

²³ Sa i Ierusalema o ia i le paseka, i le tausamiga, ona toatele ai lea o e na talitonu i lona suafa, ina ua latou vaai atu i faailoga na ia faia.

²⁴ A o Iesu, e lei faalagolago o ia ia te i latou, auā ua na silafia tagata uma lava.

²⁵ E le aoga foi ia te ia ina ia molimau o se tasi ia te ia i amio a tagata; auā foi ua na silafia mea o i loto o tagata.