Ioane 18 - O LE TUSI PAIA

O LE MATAUPU XVIII. O le faamasinoina o Iesu

¹ Ua fetalai atu ia upu, ona maliu atu ai lea o Iesu ma ona soo i le tasi itu o le alia o Ketarono, ua i ai le fanua, ua latou ō i ai ma ona soo.

² Ua iloa foi lea mea e Iuta le na faalataina o ia; auā na maliu atu soo i ai Iesu faatasi ma ona soo.

³ Ua maua foi e Iuta le ‘au ma auauna mai le au ositaulaga sili ma faresaio, ona alu atu lea o ia i lea mea ma sulu, ma lamepa, ma le auupega.

⁴ Ua silafia foi e Iesu mea uma o le a oo ia te ia, ua maliu atu, ma faapea atu ia te i latou, O ai ea tou te saili na?

⁵ Ua latou tali mai ia te ia, O Iesu le Nasareta. Ona fetalai atu lea o Iesu ia te i latou, O a‘u lenei. Ua tutū faatasi foi ma i latou o Iuta le na faalataina ia.

⁶ Ua faapea atu Iesu ia te i latou, O a‘u lenei; ona tuumuli ai lea o i latou, ua pauu foi i le eleele.

⁷ Ona toe fesili atu lea o Iesu ia te i latou, O ai ea tou te saili na? Ua fai mai i latou, o Iesu le Nasareta.

⁸ Ona tali atu lea o Iesu, Ua uma ona ou fai atu ia te outou, o a‘u lenei; o lenei, afai tou te saili mai ia te a‘u, tuu pea ia i latou nei, ia latou o;

⁹ ina ia taunuu ai le upu na ia faapea atu ai, O i latou na e foai mai ia te au, e lei fano so latou e toatasi.

¹⁰ O Simona Peteru foi, ua i ai le pelu, ua se‘i e ia, ma taia a‘i le auauna a le ositaulaga sili, ua tipiesea lona taliga taumatau; o Maliko le igoa o le auauna.

¹¹ Ona fetalai atu lea o Iesu ia Peteru, Ina sulu ia lau pelu i lona faamoega; ou te le inu ea i le ipu ua au mai ia te au e lo‘u Tamā?

¹² Ona pue atu lea e le ‘au, ma le ta‘ita‘i, ma auauna a Iutaia ia Iesu, ma noanoa ia te ia.

¹³ Ona latou uluai ta‘ita‘iina lea o ia ia Ana, auā o le tamā ia o le avā a Kaiafa, o le ositaulaga sili lea i lea tausaga.

¹⁴ O Kaiafa foi lea na fai atu ia Iutaia, ua aoga pe a fano se tagata toatasi e sui a‘i le nuu.

¹⁵ Ua mulimuli atu ia Iesu Simona Peteru ma le tasi soo; ua iloa foi lea soo e le ositaulaga sili; ua ulufale o ia faatasi ma Iesu i le maota o le ositaulaga sili;

¹⁶ a o Peteru, ua tu o ia i fafo i le faitotoa. Ona alu ane lea i fafo o le isi soo na iloa e le ositaulaga sili, ua tautala ane i le leoleo faitotoa, ma au mai ia Peteru i le fale.

¹⁷ Ona faapea mai lea o le auauna teine na leoleo i le faitotoa ia Peteru, E le o oe ea le tasi soo o lena tagata? Ua fai atu ia, E le o a‘u.

¹⁸ Ua tutū mai tautua ma auauna, ua latou tafu le afi malala, auā ua maalili, ua latou mumulu ai; ua tu foi Peteru faatasi ma i latou, ua mumulu ai.

¹⁹ Ona fesili mai lea o le ositaulaga sili ia Iesu i ona soo ma lana mataupu.

²⁰ Ua tali atu Iesu ia te ia, Ua ou tautala faaali i tagata uma; ua ou a‘oa‘o soo i sunako ma le malumalu, e faapotopoto soo ai Iutaia; a ou te lei tautala faalilolilo i se mea e tasi.

²¹ Pe se a le mea e te fesili mai ai ia te au? Ia e fesili i e na faalogo ai, se mea na ou tautala atu ai ia te i latou; faauta, ua latou iloa mea na ou fai atu ai.

²² Ua fetalai atu o ia ia mea, ona po mai lea ia Iesu o le tasi auauna sa tu ai, ua faapea mai, E te tali atu ea faapea i le ositaulaga sili?

²³ Ona tali atu lea o Iesu ia te ia, Afai ua leaga la‘u upu, ia molimau i lona leaga; a e afai ua lelei, se a le mea ua e po mai ai ia te au?

²⁴ Ua auina o ia e Ana ia Kaiafa le ositaulaga sili, o noanoatia.

²⁵ Sa tu ai Simona Peteru, ua mumulu; ona latou fai mai lea ia te ia, E le o oe ea le tasi o ona soo? Ua faafiti atu ia, ua fai atu, E le o a‘u.

²⁶ Ua fai mai ia te ia le tasi auauna o le ositaulaga sili, o le aiga o le na tipiesea lona taliga e Peteru, Ou te lei vaai atu ea ia te oe faatasi ma ia i le fanua?

²⁷ Ona toe faafiti atu lea o Peteru, ona vivini loa lea o moa.

²⁸ Ona latou ta‘ita‘iina lea o Iesu nai ia Kaiafa i le maota o le alii; ua ao foi; a e lei ulufale i latou i le maota o le alii, ne‘i leaga i latou, ona le mafai lea ona aai i le paseka.

²⁹ Ona alu ai lea i fafo o Pilato ia te i latou, ua fai atu, Se a se mea ua outou momoli ai i lena tagata?

³⁰ Ua latou tali mai, ua faapea mai ia te ia, Afai ana le pagota o ia, po ua matou le tuuina atu o ia ia te oe.

³¹ Ona fai atu lea o Pilato ia te i latou, Ina ave ia e outou ia te ia, ina faamasino ia te ia i la outou tulafono. Ona fai mai lea o Iutaia ia te ia, E sa ona matou fasioti o se tasi.

³² Ua taunuu ai le fetalaiga a Iesu, na fetalai atu ai o ia, ina ua ta‘u atu le uiga o lona maliu o le a maliu ai o ia.

³³ Ona toe ulufale lea o Pilato i le maota o le alii, ua valaau ia Iesu, ua fai mai ia te ia, O oe ea le tupu o tagata Iutaia?

³⁴ Ua tali atu Iesu ia te ia, Pe se upu mai ia te oe lea upu, pe na ta‘ua a‘u e nisi ia te oe?

³⁵ Ua tali mai Pilato, Ou te se Iutaia ea? Ua tuuina mai oe ia te au e lou nuu ma le au ositaulaga sili; pe se a le mea ua e faia?

³⁶ Ua tali atu Iesu, E le mai le lalolagi nei lo‘u malo; afai ana mai le lalolagi nei lo‘u malo, po ua tau a‘u auauna, ina ne‘i tuuina atu a‘u ia Iutaia; a o lenei, e le mai iinei lo‘u malo.

³⁷ Ona fai mai lea o Pilato ia te ia, O lena foi, e te se tupu ea oe? Ua tali atu Iesu, O lea lava, o a‘u o le Tupu. O le mea lenei na fanau mai ai a‘u, o le mea foi lenei na ou sau ai i le lalolagi, ina ia ou molimau i le upu moni. O i latou uma lava o i le upu moni, e faalogo mai i latou i lo‘u leo.

³⁸ Ua fai mai Pilato ia te ia, Po o le a le upu moni? Ua fai mai lea upu, ona toe alu lea o ia i fafo ia Iutaia, ua fai atu foi ia te i latou, Ou te lei iloa se mea e sala ai o ia.

³⁹ A o la outou tu lea, ia ou tatalaina atu ia te outou se tasi tagata i le paseka; o lenei, pe tou te mananao ea ina ia ou tatalaina atu ia te outou le tupu o tagata Iutaia?

⁴⁰ Ona toe alalaga lea o i latou uma lava, ua faapea atu, Aua lava lena, a o Parapa. O le fao mea foi Parapa.