Ioane 16 - O LE TUSI PAIA

O LE MATAUPU XVI. O le mavaega a Iesu.

¹ Ua ou fai atu nei mea ia te outou, ina nei tausuai outou.

² E tulia outou i sunako e i latou; a e oo lava i le aso e manatu ai se na te fasioti ia te outou, ua na faia le taulaga i le Atua.

³ E faia foi e i latou ia mea ia te outou, auā latou te lei iloa le Tamā atoa ma a‘u.

⁴ A ua ou fai atu ia te outou nei mea, ina ia outou manatua pe a oo i le aso, na a‘u fai atu ai ia te outou. Ou te lei fai atu nei mea ia te outou i le amataga, auā na ou i ai ia te outou.

⁵ A ou te alu atu nei ia te ia na auina mai a‘u; e lei fesili mai foi se tasi o outou, Po o fea e te alu i ai?

⁶ A ua tutumu o outou loto i le faanoanoa, ina ua ou fai atu nei mea ia te outou.

⁷ A e peitai a‘u, o le upu moni lava ou te fai atu ai ia te outou, e aoga ia te outou pe a a‘u alu ese; auā afai ou te le alu ese, e le maliu mai le fesoasoani ia te outou; a e afai ou te alu, ou te auina mai o ia ia te outou.

⁸ A maliu mai foi o ia, na te faailoa atu i le lalolagi le agasala, ma le amiotonu, ma le faamasinoga.

⁹ O le agasala, auā ua le faatuatua ia te au;

¹⁰ o le amiotonu, auā ou te alu atu i lo‘u Tamā, tou te le toe vaai mai foi ia te au;

¹¹ o le faamasinoga, auā ua faamasinoina le alii o le lalolagi nei.

¹² Ua totoe ia te au mea e tele e fai atu ai ia te outou, a e tou te le mafaia ona talia i nei ona po.

¹³ A e a maliu mai o ia, o le Agaga lea e tupu mai ai le upu moni, e ta‘ita‘i e ia ia te outou i upu moni uma; auā e le tautala fua ia na o ia, a o mea uma e faalogo i ai o ia, e tautala a‘i lava, ma faailoa mai ia te outou mea e oo mai.

¹⁴ O ia lava e vivii mai ia te au, auā e maua e ia mai ia te au, ma faailoa atu ai ia te outou.

¹⁵ O mea uma lava o i le Tamā, o ia te au foi ia; o le mea lea na ou fai atu ai, e maua e ia mai ia te au, ma faailoa atu ai ia te outou.

¹⁶ E toe itiiti ona outou le vaai mai ai lea ia te au; e toe itiiti foi ona outou toe vaai mai ai lea ia te au, auā ou te alu atu i le Tamā.

¹⁷ Ona fetautalatala‘i lea o isi ona soo. Pe se a lenei mea ua ia fetalai mai ai ia te i tatou. E toe itiiti ona outou le vaai mai ai lea ia te au; e toe itiiti foi ona outou toe vaai mai ai lea ia te au, auā ou te alu atu i le Tamā?

¹⁸ Ona latou faapea ane lea, Pe se a lenei mea ua ia fetalai mai ai, E toe itiiti? Tatou te lei iloa le mea ua ia fetalai mai ai.

¹⁹ Ua silafia e Iesu lo latou fia fesili mai ia te ia; ona faapea atu lea o ia ia te i latou. Pe tou te felafolafoai ea i le mea na ou fai atu na, E toe itiiti ona outou le vaai mai ai lea ia te au; e toe itiiti foi ona outou toe vaai mai ai lea ia te au?

²⁰ E moni, e moni, ou te fai atu ia te outou, e tagi outou ma taufaitagiaue, a e olioli le lalolagi; e tiga outou, a e liua lo outou tiga ma olioli.

²¹ A fanau se fafine ua tiga ai o ia, auā ua oo i lona aso; a uma ona fanau mai o lana tama, ua le toe manatu e ia lona tiga, ona o le olioli, ina ua fanau mai le tagata i le lalolagi.

²² O lenei foi, ua maua nei outou e le tiga; a e tatou te toe feiloai ma a‘u, ona olioli ai lea o outou loto, e le aveeseina foi e se tasi lo outou olioli.

²³ O lea aso tou te le toe fesili mai ai ia te au i se mea e tasi. E moni, e moni, ou te fai atu ia te outou, o mea uma tou te ole atu ai i le Tamā i lo‘u igoa, e foai mai e ia ia te outou.

²⁴ Ua oo mai nei lava tou te lei ole atu i se mea i lo‘u igoa; ina ole atu ia, ona outou maua ai lea, ina ia atoatoa ai lo outou olioli.

²⁵ Ua ou tautala atu ia te outou i nei mea i upu faatusa; a e oo atu i ona aso ou te le toe tautala ai ia te outou i upu faatusa; a e ou te matuā faailoa atu ia te outou mataupu i le Tamā.

²⁶ O lea aso e ole atu ai outou i lo‘u igoa; ou te le fai atu foi ia te outou ou te faatoga i le Tamā mo outou;

²⁷ auā e alofa mai lava le Tamā ia te outou, ina ua outou alofa mai ia te au, ma ua outou talitonu o a‘u nei ua ou sau mai le Atua.

²⁸ Ua ou sau mai le Tamā, ma ou sau i le lalolagi; o le a a‘u toe tuua le lalolagi, ma alu atu i le Tamā.

²⁹ Ona fai mai lea o ona soo ia te ia, Faauta, o lenei, ua e ta‘utino mai lava, ua e le fetalai mai i le upu faatusa.

³⁰ O lenei, ua matou iloa ua e silafia mea uma lava, e le aoga foi ia te oe ina fesili atu se tasi ia te oe; o le mea lea ua matou talitonu ai, na e maliu mai mai le Atua.

³¹ Ua tali atu Iesu ia te i latou, Ua outou talitonu mai nei ea?

³² Faauta, e oo i le aso, ua oo nei foi i ai, e taapeape ai outou, e taitasi ma alu i lona aiga, a e tuua a‘u e toatasi; a ou te le toatasi lava, auā ua ia te au le Tamā.

³³ Ua ou fai atu nei mea ia te outou, ina ia outou maua le manuia ia te au; e maua foi outou e le puapuaga i le lalolagi, a ia outou loto tetele, ua ou manumalo i le lalolagi.