Ioane 15 - O LE TUSI PAIA

O LE MATAUPU XV. O le vine moni ma ona la.

¹ O a‘u nei o le vine moni, a o lo‘u Tamā o lē galue vine ia.

² O la uma lava o ia te au e le fua, e aveeseina o ia; a o la uma e fua, e teuteu e ia, ina ia fua mai ai atili.

³ Ua uma ona faamamāina o outou i le upu na ou tautala atu ai ia te outou.

⁴ Ina tumau ia o outou ia te au, o a‘u foi ia te outou. Faapei o le la e le mafai ona fua pe a na o ia, pe afai e le mau i le vine; a faapea foi outou, pe afai tou te le tumau ia te au.

⁵ O a‘u nei o le vine, o la outou. O lē tumau ia te au, ma a‘u ia te ia, o ia lava e fua tele mai; auā e le mafaia e outou ona fai o se mea e tasi pe a a‘u le i ai.

⁶ Afai e le tumau se tasi ia te au, ona lafoaiina lea o ia i tua pei o le la laau, ma faapopoina, ona faapotopotoina ai lea e tagata, ma lafo i le afi, ua susunu ai.

⁷ Afai tou te tumau ia te au, a tumau foi a‘u upu ia te outou, o mea uma lava tou mananao i ai, tou te ole atu ai, ona faia lea mo outou.

⁸ E viia lo‘u Tamā i lenei mea, pe a outou fua tele mai; ona fai ai lea outou mo‘u soo.

⁹ Faapei ona alofa mai o le Tamā ia te au, e faapea lava ona ou alofa atu ia te outou; ia tumau pea outou i lo‘u alofa.

¹⁰ Afai tou te tausia a‘u poloaiga, ona tumau lea o outou i lo‘u alofa; pei ona ou tausia poloaiga a lo‘u Tamā, ma ou tumau i lona alofa.

¹¹ Ua ou fai atu nei mea ia te outou, ina ia tumau ai lo‘u olioli ia te outou, ia atoatoa foi lo outou olioli.

¹² O la‘u poloaiga lenei, ia outou fealofani, pei ona ou alofa atu ia te outou.

¹³ E le sili lava le alofa o se tasi i lenei alofa, ia tuuina atu e se tasi lona ola e sui a‘i ana uo.

¹⁴ O a‘u uo outou, pe afai tou te faia mea uma lava ou te fai atu ai ia te outou.

¹⁵ Ou te le toe ta‘ua outou o auauna, auā e le iloa e le auauna mea e faia e lona alii; a ua ou ta‘ua outou o uo, auā ua ou faailoa atu ia te outou mea uma na ou faalogo ai i lo‘u Tamā.

¹⁶ Ua le filifilia a‘u e outou, a ua filifilia outou e a‘u; ua ou tuuina atu foi outou, ia outou ō, ma ia outou fua mai ni fua, ma ia tumau o outou fua; ina ia foaiina atu ia te outou e le Tamā mea uma lava tou te ole atu ai ia te ia i lo‘u igoa.

¹⁷ Ou te fai atu ia te outou ia mea, ina ia outou fealofani.

¹⁸ Afai e ‘ino‘ino mai le lalolagi ia te outou, ua outou iloa ua muamua ona ‘ino‘ino mai ia te au, i lona ‘ino‘ino ia te outou.

¹⁹ Afai a ni tagata o le lalolagi outou, po ua alofa mai le lalolagi i ona tagata; a e le ni o le lalolagi outou, a ua ou filifilia outou nai le lalolagi, o le mea lea e ‘ino‘ino ai le lalolagi ia te outou.

²⁰ Ia outou manatua le upu na ou fai atu ai ia te outou. E le sili le auauna i lona alii. Afai ua latou faasaua mai ia te au, e faasaua foi ia te outou; afai ua latou tausia la‘u upu, latou te tausia foi la outou.

²¹ A e faia e i latou ia mea uma ia te outou ona o lo‘u igoa, auā e lei iloa e i latou o ia ua auina ma a‘u.

²² Afai ana a‘u le sau ma tautala atu ia te i latou, po ua leai sa latou agasala; a o lenei, e leai se mea e ufiufi a‘i la latou agasala.

²³ O lē ‘ino‘ino mai ia te au, ua ‘ino‘ino foi o ia i lo‘u Tamā.

²⁴ Ana a‘u lei faia ia te i latou o galuega e lei faia lava e se tasi, po ua leai sa latou agasala; a o lenei, ua latou vaai mai, ma latou ‘ino‘ino mai ia te au atoa ma lo‘u Tamā.

²⁵ A e peitai ia taunuu ai le upu ua tusia i la latou tulafono, Ua latou ‘ino‘ino mai fua lava ia te au.

²⁶ A maliu mai le Fesoasoani, o le ou te auina mai ia te outou mai le Tamā, o le Agaga lea e tupu mai ai le upu moni, o lē maliu mai mai le Tamā, o ia lava e molimau ia te au.

²⁷ Tou te molimau foi, auā ua outou faatasi ma a‘u talu le amataga.