Ioane 14 - O LE TUSI PAIA

O LE MATAUPU XIV. Ua faamafanafana atu Iesu i ona soo.

¹ Aua le atuatuvale o outou loto; ia outou faatuatua i le Atua, ia faatuatua mai foi ia te au.

² E tele mea e nonofo ai i le maota o lo‘u Tamā; ana leai, po ua ou fai atu ia te outou; ou te alu e sauni se mea e nonofo ai outou.

³ Afai foi ou te alu ma sauni se mea e nonofo ai outou, ou te toe sau, ou te talia foi outou ia faatasi ma a‘u; ina ia i ai outou i le mea ou te i ai a‘u.

⁴ Ua outou iloa le mea ou te alu i ai, ua outou iloa foi le ala.

⁵ Ua fai mai Toma ia te ia, Le Alii e, matou te le iloa le mea e te maliu atu i ai, matou te mafaia faapefea ona iloa o le ala?

⁶ Ua fetalai atu Iesu ia te ia. O a‘u nei le ala, ma le upu moni, ma le ola; e le alu atu lava se tasi i le Tamā, pe a le ui mai ia te au.

⁷ Ana iloa e outou o a‘u, po ua iloa foi e outou lo‘u Tamā; e amata nei foi ona iloa o ia e outou; tou te vaai foi ia te ia.

⁸ Ua fai mai Filipo ia te ia, Le Alii e, ia e faailoa mai le Tamā ia te i matou, ona gata ai lea o matou manao.

⁹ Ua fetalai atu Iesu ia te ia, Filipo e, ua loa lava ona ou i ai ia te outou, a e te lei iloa ea a‘u? O le ua vaai mai ia te au, ua vaai o ia i le Tamā; pe se a foi e te fai mai ai, Faailoa mai le Tamā ia te i matou?

¹⁰ E te le talitonu ea, o a‘u o i totonu o le Tamā, o le Tamā foi o i totonu ia te au? O upu ou te tautala atu ai ia te outou, ou te le tautala fua na o a‘u; a o le Tamā o loo nofo i totonu ia te au, o ia lava na te faia ia galuega.

¹¹ Ia outou talitonu mai ia te au, o a‘u o i totonu o le Tamā, o le Tamā foi o i totonu ia te au; a le o lea ia outou talitonu mai ia te au ona o ia galuega.

¹² E moni, e moni, ou te fai atu ia te outou, o lē talitonu mai ia te au, e faia lava e ia o galuega ou te faia; e fai foi e ia mea e sili i ia mea, auā ou te alu i lo‘u Tamā.

¹³ O mea uma foi tou te ole atu ai i lo‘u igoa, ou te faia lava; ina ia viia le Tamā ona o le Atalii.

¹⁴ Afai tou te ole atu i se mea i lo‘u igoa, ou te faia lava.

¹⁵ Afai tou te alofa mai ia te au, ia outou tausi mai i a‘u poloaiga.

¹⁶ Ou te fai atu foi i le Tamā, ona foai mai ai lea e ia ia te outou le tasi Fesoasoani, ina ia tumau pea o ia ia te outou e faavavau;

¹⁷ o le Agaga lea e tupu mai ai le upu moni, e le mafai e le lalolagi ona talia o ia, auā, ua le vaaia o ia, ua le iloa foi o ia; a o outou, ua outou iloa o ia, auā e tumau pea ia ia te outou, e i ai foi o ia i totonu ia te outou.

¹⁸ Ou te le tuua outou o mātuaoti, ou te sau ia te outou.

¹⁹ E toe itiiti ona le vaai mai lea o le lalolagi ia te au, a e vaai mai pea outou ia te au; ou te ola a‘u, o le mea lea e ola ai outou.

²⁰ O lea aso e iloa ai e outou, ou te i totonu o lo‘u Tamā; o outou foi o i totonu ia te au, o a‘u foi o i totonu ia te outou.

²¹ O le ua ia te ia a‘u poloaiga ma tausi i ai, o ia lea e alofa mai ia te au; o lē alofa mai foi ia te au, e alofaina o ia e lo‘u Tamā; ou te alofa foi ia te ia, ma ou faaali ia te ia.

²² Ua fai mai ia te ia Iuta, (e le o le Sekara lea,) Le Alii e, pe se a le mea o le a e faaali mai ai oe ia te i matou, a e le o le lalologi?

²³ Ona tali atu lea o Iesu, ua faapea atu ia te ia, Afai e alofa mai se tasi ia te au, e tausia e ia la‘u upu; e alofa foi lo‘u Tamā ia te ia; e o mai foi i maua ia te ia, matou te nonofo ma ia.

²⁴ O le le alofa ia te au, e le tausia e ia a‘u upu; o le upu foi tou te faalogologo i ai, e le sa‘u lea, a o le upu a le Tamā ua auina mai a‘u.

²⁵ O mea ia ua ou fai atu ia te outou, manū o tatou o nonofo.

²⁶ A o le Fesoasoani, o le Agaga Paia lea, e auina mai e le Tamā i lo‘u igoa, o ia lava na te a‘oa‘o ia te outou i mea uma lava; e faamanatu mai foi o ia ia te outou i mea uma ua ou fai atu ai ia te outou.

²⁷ Ou te tuuina atu ia te outou le manuia; o lo‘u manuia ou te avatu ai ia te outou; ou te le avatu ia te outou faapei ona avatu e le lalolagi. Aua le atuatuvale o outou loto, aua foi tou te matatau.

²⁸ Ua outou faalogo mai, ua ou fai atu ia te outou, Ou te alu, ma ou toe sau ia te outou. Ana outou alofa mai ia te au, po ua outou olioli i lo‘u fai atu, Ou te alu atu i le Tamā; auā e sili lo‘u Tamā ia te au.

²⁹ Ua ou fai atu nei foi ia te outou a o lei taunuu; ina ia outou talitonu mai pe a taunuu.

³⁰ Ou te le toe tautala atu ia te outou i ni upu e tele; auā o le a sau le alii o lenei lalolagi, a e le mana e ia se mea ia te au.

³¹ Peitai ona ia iloa e le lalolagi, ou te alofa i le Tamā faapei ona poloai mai foi o le Tamā ia te au, e faapea lava ona ou faia. Tutū ia i luga, ina tatou o ese ia.