Iakopo 5 - O LE TUSI PAIA

O LE MATAUPU V. O le toasa o le Atua i e saua; o le onosai; o le aoga o le tatalo.

¹ Faauta mia ia; outou e tamaoaiga, ia outou fetagisi ma uio ona o puapuaga o le a oo mai ia te outou.

² Ua pala la outou oloa, ua atiatia o outou ofu i mogamoga; ua elea o outou auro ma ario;

³ e fai foi ma molimau ia te outou o latou ele, e ‘aina ai o outou tino pei o se afi; ua outou faaputu mea i ona aso e gata ai.

⁴ Faauta, o le totogi o e galulue, e na faaputu le fua o outou fanua, ua taofia e outou, ua alaga ia; o le alaga foi o e na selesele saito ua faafofogaina lava e le Alii o Sapaota.

⁵ Ua outou nonofo i le nuu ma le sololelei, ma le fiafia i la le tino; ua fafagaina outou e outou, faapei o manu mo le aso e fafasi ai.

⁶ Ua outou faasala ma fasioti lē amiotonu, ua le tetee mai o ia ia te outou.

⁷ O lenei, le au uso e, onosai ia seia oo i le afio mai o le Alii. Faauta, e faatali lē galue fanua i le fua aoga o le eleele, e faatalitali i ai, seia maua le uaga muamua ma lē mulimuli;

⁸ ia onosai foi outou, ia faatumauina o outou loto, auā ua latalata le afio mai o le Alii.

⁹ Le au uso e, aua tou te femuimuiai, ne‘i faasalaina outou; faauta, ua tu mai le faamasino i luma o le faitotoa.

¹⁰ O‘u uso e, ia outou faaa‘oa‘o i le faatoatoa i le leaga, atoa ma le onosai o le au perofeta, e na tautala mai i le suafa o le Alii.

¹¹ Faauta, ua tatou ta‘uamuia i e onosai; ua outou faalogologo i le onosai o Iopu, ua outou iloa foi le iuga i la le Alii, ina ua mutimuti vale tele le Alii ma le alofa naunau.

¹² O‘u uso e, e muamua lava i mea uma lenei, aua lava ne‘i outou tauto, po o i le lagi, po o i le fanua, po o se tasi lava tautoga; a e tau lava o la outou ioe, ioe, ma la outou leai, e leai; ina ne‘i faasalaina ai outou.

¹³ Ua tigaina ea so outou? ina tatalo ia. Ua fiafia ea se tasi? ina pese ia.

¹⁴ Ua ma‘i ea so outou? ina aami atu ia i toeaina o le ekalesia, ia latou tatalo mo ia, pe a uma ona faauu ia te ia i le suāuu i le suafa o le Alii.

¹⁵ O le tatalo foi e faia i le faatuatua e faaolaina ai le ma‘i, e faatuina foi o ia e le Alii; afai foi ua agasala, e faamagaloina ia.

¹⁶ Ia fefaaaliai a outou agasala, ma tatalo le tasi mo le tasi, ina ia faamaloloina outou. Ua aoga tele le tatalo faatauanau a le tagata amiotonu.

¹⁷ O Elia o le tagata ia e tusa ma i tatou, ua matuā tatalo o ia ina ia le ua; ona le uaina ai lea o le fanua i tausaga e tolu ma masina e ono.

¹⁸ Ua toe tatalo foi, ona to ifo ai lea o le ua mai le lagi, ona fua mai ai lea o le eleele i ona lava fua.

¹⁹ Le au uso e, ai se tasi o ia te outou ua sese i le upu moni, a ua faafoi mai se tasi ia te ia,

²⁰ ia iloa e ia, o lē faafoi mai le tagata agasala nai lona ala sese, e faaolaina e ia le agaga nai le oti, e ufiufi foi e ia le vao agasala.