Hosea 12 - O LE TUSI PAIA

O LE MATAUPU XII. E tatau ina salamo o e fai mea leaga.

¹ O loo ‘ai Efaraima le matagi, ua naunau atu o ia i le matagi mai sasae; ua faateleina e ia le pepelo ma le malaia i aso uma lava; ua osia foi la latou feagaiga ma Asuria, ma ua avatu i Aikupito suāuu.

² Ua ia Ieova le finauga ma Iuta, na te faasalaina Iakopo e tusa ma ana amio; na te taui atu ia te ia e tusa ma ana galuega.

³ Na ia tago i le mulivae o lona uso a o i ai i le manava; o lona malosi na ia malo ai i le Atua.

⁴ Na ia malo i le agelu, na manumalo ai lava; na ia tagi, ma aioi atu ia te ia; na ia iloa ia te ia i Peteli, na tŭlei mai ai foi lona siufofoga ia te i tatou.

⁵ O Ieova lava o le Atua o ‘au; o Ieova o lona suafa lea e manatua ai o ia.

⁶ O lenei, ia e toe foi i lou Atua; ia e tausi le alofa ma le faamasinoga, aua le aunoa ona e faatalitali atu i lou Atua.

⁷ O le faatauoa ia, o i lona lima o fua faatautau faaletatau; e fiafia o ia i le faasaua.

⁸ Ua faapea mai foi a Efaraima, E moni, o a‘u o le mau mea, ua ou maua oloa mo a‘u; latou te le iloa se leaga ia te au, se mea o se agasala i a‘u galuega uma.

⁹ O a‘u foi o Ieova lou Atua talu mai le nuu o Aikupito, ou te toe faanofo ia te oe i fale ie faapei o ona po o le tausamiga.

¹⁰ Na ou tautala atu i perofeta, na ou faateleina faaaliga; o le au perofeta foi na ou sauni atu ai upu faataoto.

¹¹ Ua leaga lava Kiliata, e pepelo lava i latou; latou te fai taulaga i povi poa i Kilikala; o latou fata faitaulaga foi, e pei o faupuegāmaa ia i atu pue o le laueleele.

¹² Na sola Iakopo i le nuu o Suria; na auauna Isaraelu e maua ai lana avā; na ia leoleo mamoe e maua ai lana avā.

¹³ O le perofeta na aveina ae ai Isaraelu e Ieova mai Aikupito; o le perofeta foi na leoleoina ai o ia.

¹⁴ Na matuā faaonoono Efaraima ia te ia, o le mea lea na te tuu ai pea lona toto ia te ia; o lona luma foi e faafoisia ia te ia e lona Alii.