Failauga 11 - O LE TUSI PAIA

O LE MATAUPU XI. O le amio alofa ma le faautauta lelei; o le oti ma le aso faamasino.

¹ Ina lafo ia lau mea e ‘ai i luga o le vai; auā a mavae aso e tele e te toe maua.

² Avatu se tufaaga i le toafitu, po o le toavalu; auā e te le iloa pe se a se mea leaga e tupu i le lalolagi.

³ Afai e tutumu ao, e totō ifo ai le ua i le lalolagi; afai foi e paū se laau i le itu i toga, po o le itu i matu, o le mea e paū i ai le laau, e i ai pea ia.

⁴ O le na te manatunatu i le matagi e le lulu saito e ia; o le na te vaavaai foi i ao e le selesele lava o ia.

⁵ E pei ona le iloa e oe le ala o le matagi, ma ona tutupu o ivi i le manava o le ua to, e faapea foi ona le iloa e oe le galuega a le Atua, o le na te faia mea uma lava.

⁶ O le taeao ia e lulu ai au saito, aua foi le mapu lou lima i le afiafi; auā e te le iloa po o le fea e manuia, o lenei, po o lena, pe gatusa ona lelei o ia mea e lua.

⁷ E lelei lava le malamalama, o le mea foi e fiafia ai mata pe a iloa atu le la;

⁸ a e afai e ola se tagata i tausaga e tele, ma olioli i ia tausaga uma; a ia manatu o ia i aso e pouliuli ai, auā e tele ia; o mea uma foi e oo mai, o mea faatauvaa lava ia.

⁹ Le taulealea e, ina olioli ia i lou tama itiiti, ia fiafia foi lou loto i aso o lou taulealea, ma ia e savali i ala ua e loto i ai, ma mea e vaai i ai ou mata; a ia e iloa e faamasinoina oe e le Atua ona o na mea uma.

¹⁰ O lenei, ina faatea ese atu ia le tiga i lou loto, ma tuu ese atu le leaga i lou tino; auā o le tama itiiti ma le taulealea e faatauvaa ia.